ಖಾಲಿಯಾಗಬೇಕು

ಬಯಲಂತೆ ಬಟಾ ಬಯಲಾಗಬೇಕು
ಮಾತುಗಳು ಹರಿಯಲಿ ಸರಾಗವಾಗಿ
ಬಯಲಲಿ ಅಲೆವ ಗಾಳಿಯಂತೆ
ಸುತ್ತಿ ಬಳಸದೆ
ಒಳಗೊಂದು ಹೊರಗೊಂದಾಗದೆ
ಖಾಲಿಯಾಗಬೇಕು ಬಯಲಿನಂತೆ

ವಿಶಾಲವಾಗಬೇಕು
ನೀಲಾಗಸದಂತೆ
ಮೋಡವೆಂಬ ದುಗುಡವನ್ನೆಲ್ಲಾ
ಮಳೆಯೆಂಬ ಕಣ್ಣೀರಲಿ ಹೊರಹಾಕಿ
ಸ್ವಚ್ಛಂದ ಬಾನಾಗಬೇಕು
ಮನವೆಂಬ ಹಕ್ಕಿ ರೆಕ್ಕೆಬಿಚ್ಚಿ ಹಾರಲು

ಹದವಾಗಬೇಕು ನೆಲದಂತೆ
ಬಿದ್ದ ಬೀಜವನ್ನೆಲ್ಲ
ಮರವನ್ನಾಗಿಸುವ ಮಣ್ಣಾಗಿ
ಅನ್ನದಾತನಿಗೆ ಕಣ್ಣಾಗಿ
ಅನುಭವವ ಪಡೆದು ಹಣ್ಣಾಗಬೇಕು

ನೀರಾಗಬೇಕು
ಒರಟನ್ನೂ ನುಣುಪಾಗಿಸಿ
ಅಡೆ ತಡೆಗಳೆಲ್ಲವ ಮೀರಿ ಹರಿವಂತೆ
ಆಗಾಗ ಭೋರ್ಗರೆವ ಜಲಪಾತದಂತೆ
ಕಾದ ಭೂಮಿಯ ತಂಪಾಗಿಸುವ
ಮಳೆಯ ಹನಿಯಂತೆ

ಹಾಗಾಗಬೇಕು
ಹೀಗಾಗಬೇಕು
ಅವರಂತೆ ಇವರಂತೆ ಎಲ್ಲರಂತೆ
ಕೊನೆಗೊಮ್ಮೆ ಉಳಿಯಬೇಕು
ನಾನು ನಾನಾಗಿಯೇ
ಜಗದಲಿ ಉಳಿಯಲಿ ಒಳಿತೆಂಬುದು ಒಂದೇ

ರಶ್ಮಿ ಶಮಂತ್
ಶಿವಮೊಗ್ಗ