ಹೂವ ನೇಯುವ ಸುಖ

ಅವ್ವ,ಅಮ್ಮ,ಚಿಕ್ಕಮ್ಮನಾದಿ ಯಾಗಿ
ಅಕ್ಕನು ಕಲಿಯುತ್ತಾ
ಹೂ ಮಾಲೆ ನೇಯುವಾಗ
ಈ ಕಲೆ ನನಗೆ ಒಲಿಯಬಹುದೇ
ಎಂದು ಸೋಜಿಗದಿಂದ ನೋಡಿದ ಬಾಲ್ಯವಿತು !
ಭಯದ ಎದೆಯಲ್ಲಿ ...
ಚುಕ್ಕರ ಕುಳಿತು ಬೆರಗು ಕಣ್ಣಲ್ಲಿ ನೋಡಿದ್ದನ್ನು ಈಗ
ತನ್ನ ತೆಕ್ಕೆಗೆ ದಕ್ಕಿಸಿಕೊಂಡಿದೆ ಕಾಲ.

ನಯ - ನಾಜೂಕಿನ ಮೃದು
ಅಚ್ಚ ಬಿಳುಪಿನ ಶುಭ್ರ ಮಲ್ಲಿಗೆಯ
ಸುಖದ ಸ್ಪರ್ಶದ ಮಾಲೆ ಹೆಣೆಯುತ್ತಾ
ಇನ್ನೇನು ಬೆರಳ ತುದಿಯಲ್ಲಿ ಇತ್ತೆಂದಾಗ
ತೊಟ್ಟು ತುಂಡಾಗುವ ವೈರುಧ್ಯಗಳು .

ಆಚೆ ತೊಟ್ಟು ಈಚೆ ತೊಟ್ಟು ಸೇರಿಸಿ
ಎಳೆ ಬಾಳೆ ನಾರಿನ ದಾರದಿ
ಸುತ್ತು ಹಾಕಿ ಎರಡೆಳೆಯ ಒಂದು ಗಂಟು
ಹಾಗೆಯೇ ಎರಡನೆಯ ಗಂಟು
ಮೂರೂ ಗಂಟು ಹಾಕಿ ಬಿಡುತ್ತೇವೆ ಬೆರಳ ಚಮತ್ಕಾರಲ್ಲಿ
ಶಾಶ್ವತವೆಂಬ ಭ್ರಮೆಯಲ್ಲಿ....

ಮೂರರ ಆಸೆಯ ಮೂವತ್ತರ ಹರೆಯಕ್ಕು ದಾಟಿಸಿ
ಈಗ ಒಂದಲ್ಲ ,ಎರಡಲ್ಲ
ಮೊನ್ನೆ ತಾನೆ ಮೂರನೆ ನಮೂನಿಯ
ಮಾಲೆ ಕಟ್ಟಲು ಕಲಿತ ಬಿಸುಪು
ಇನ್ನು ಬೆರಳ ತುದಿಯಲ್ಲಿ ಇತ್ತೆಂದಾಗ
ಈಗದೇ ಮಗಳ ಸೋಜಿಗದ ಕಣ್ಣು
ನನ್ನ ಸುತ್ತಲೇ ಗಸ್ತು ತಿರುಗುತ್ತಾ ನೇಯುವ ಅವಳದೇ ಆಸೆ
ನನ್ನೆದೆ ತುಂಬುತ್ತಿದೆ.

ಅವ್ವನಿಂದ ,ಅಮ್ಮನಿಗೆ
ಅಮ್ಮನಿಂದ ,ನನಗೆ
ನನ್ನಿಂದ ,ಮಗಳಿಗೆ
ಹಿಂತಿರುಗಿ ನೋಡಿದರೆ
ಹೀಗೆ ರವಾನಿಸಲ್ಪಟ್ಟ
ಈ ನೇಯುವ ಸುಖದ ಕಲೆಯ
ಇತಿಹಾಸ ಹೆಣ್ಣು.

- ಸಂಗೀತಾ ರವಿರಾಜ್ ಚೆಂಬು.