ಹಿಂತಿರುಗಿ ಬಾ ಕನಸೇ

ಅದೆಂದೋ ಜಾರಿಹೋದೆ ಬಾಲ್ಯದಂತೆ
ಭಾವ ಬಾಳ ಆಕ್ರಮಿಸುವ ಮೊದಲೇ
ಮುಂದೆಂದೋ ಬರುವ ಭಾಷೆಯನೀಯದೆ
ನೋವ ಉಳಿಸಿ ಕ್ರಮಿಸಿದೆ

ಹಲವು ಬಣ್ಣಗಳು ಹಾರಿ ಹಗುರದಿ ಮನಸಿಗೆ
ತೋರಣ ಕಟ್ಟುವ ಕಾಲದಿ
ಹಲವು ಬಣಗಳಾಗಿ ಒಡೆದುಹೋಗಿ
ಕಾರಣವಿಲ್ಲದೆ ಕಹಿ ಕಾರುತ್ತಿವೆ

ಸುತ್ತ ಸುಳಿಯುತ್ತಲೇ ಇದ್ದವು
ಹತ್ತು ಹಲವು ಬಯಕೆಗಳು
ಹತ್ತಿಕ್ಕುವ ಮನಸಾದರೂ, ಅಪ್ಪಿಕೊಂಡೆ
ದಾರಿಗುಂಟ ಜಾರಿದರೂ
ಕನಸೊಂದಾದರೂ ಉಳಿಯಬಹುದೇ ಎಂದು

ಸತ್ತ ಕನಸುಗಳ ಸುತ್ತ
ಬೆಂಕಿಯುಗುಳಿ ಕುಣಿಯುತ್ತಿವೆ
ಅಸ್ತಿಪಂಜರದವತಾರಗಳು
ಸಂಜೀವನಿ ತಂದು, ಒಂದು ಕನಸನ್ನಾದರೂ
ಬದುಕಿಸುವ ಒಂದು ಯತ್ನ

ಸಾಗಿರಬಹದು ಗಡಿಯಾಚೆ
ಚಿಮ್ಮಿರಬಹದು ಆಗಸಕೆ
ಸ್ಮಶಾನದ ಸಮಾಧಿ ಸೇರಿ ಸುಖಿಸುತ್ತಿರಬಹುದು
ಒಮ್ಮೆಯಾದರೂ ಹಿಂತಿರುಗಿ ಬಾ ಕನಸೆ
ಭಾವಕಾವ್ಯ ಕಟ್ಟುವ

ರಚನೆ: ಎಂ.ವಿ. ಶಶಿಭೂಷಣ ರಾಜು