ಹಸಿವು ಮತ್ತು ಕವಿತೆ

ಹಸಿವುಗಳು ಇರುವವರು ಮಾತ್ರ
ದುಃಖ ದುಮ್ಮಾನಗಳನ್ನರಿಯಬಲ್ಲರು
ಬದುಕು ತೇಯ್ದು ನಿದ್ದೆಗೆಟ್ಟು
ಕವಿತೆಗಳನ್ನು ಬರೆಯಬಲ್ಲರು
ಇಂಥ ಹಸಿವುಗಳಿಂದ ನರಳುತ್ತಿದ್ದ
ಬುದ್ಧನು ಕೂಡ ಆ ಸರಿರಾತ್ರಿ
ನಿದ್ದೆ ಬಿಟ್ಟು ಎದ್ದು ಹೋದ
ಭಿಕ್ಷೆ ಯಾಚಿಸಿ ತಿಂದುಂಡು ತಿರುಗಲಲ್ಲ;
ಇಡೀ ಬದುಕನ್ನು ಕವಿತೆಯನ್ನಾಗಿ ಮಾಡಲು
ಹೊಟ್ಟೆ ತುಂಬಿದ
ಹಸಿವುಗಳಿಲ್ಲದ ಪುಣ್ಯಾತ್ಮರು ಮಾತ್ರ
ಹಸಿದ ಪಾಪದವರನ್ನು ಅಣಕಿಸುತ್ತ
ಕುಳಿತಲ್ಲಿಯೇ ತೂಕಡಿಸಬಲ್ಲರು;
ಮೆತ್ತೆ ಮೇಲೆ ಗೊರಕೆ ಹೊಡೆಯಬಲ್ಲರು

- ತೇರಳಿಎನ್ ಶೇಖರ್