ದೇವ -  ದಾನವ

ಒಳಿತಿಗೊಂದು ಕೆಡುಕು ಜಂಟಿ
ಪ್ರಕೃತಿಯ ನಿಯಮವಿದಲ್ಲ
ಅಲ್ಲಿರುವುದು ಹೊಸ ಸೃಷ್ಟಿ
ಬದಲಾಯಿಸಿದ್ದು ಮಾನವ ದೃಷ್ಟಿ

ಸಿಂಹದಂತೆ ಮೊಲವೂ
ಹುಲಿಯಂತೆ ಹರಿಣವೂ
ಆನೆಯಂತೆ ತೋಳವೂ
ನೀರು, ನೆರಳಿನಂತೆ ಸಹಜ
ಭಿನ್ನ ಭಿನ್ನ

ರಾಮನೆದುರು ರಾವಣ
ಮಾಡಿದಾಗ ಕದನ
ಸೋತಿದ್ದು ಕೆಡುಕೆ?
ಗೆದ್ದಿದ್ದು ಒಳಿತೆ?
ಯಾರದು ನಿರ್ಧಾರ, ಏಕೆ?

ಮಾವ ಕಂಸನದು
ಸಂಹಾರಿಯ ಮೇಲೆ ಪ್ರಹಾರ
ಕೊಲುವುದರಲ್ಲೂ
ಒಳಿತು - ಕೆಡುಕುಗಳ ಪ್ರಕಾರ
ಪಡೆಯಿತು ದೇವ - ದಾನವ ಆಕಾರ
ಕೊಟ್ಟವರ ಕರಾಮತ್ತು ಸಾಕಾರ

ಬಸವಣ್ಣಗೊಬ್ಬ ಬಿಜ್ಜಳ
ಕಾಯಕದೆದುರು ಕ್ರೌರ್ಯದ ತಾಳ
ಹಾಕುವ ಕೈಗಳು ಹಿರಿದು ಕತ್ತಿಗಳ
ತರಿದು ತಲೆಗಳ
ಮೆರೆಯುತ್ತವೆ ಅಲಲಾ!!
ಬೋಧಿಸುತ್ತವೆ ಧರ್ಮದ ತಿರುಳ

ಚಿಗುರು,ಹೀಚು,ಹೂ,ಕಾಯಿ,ಹಣ್ಣು
ದೇವನ ರುಜುವಾತು
ಹಿಡಿ-ಬಡಿ, ಕೊಚ್ಚು- ಕೊಲ್ಲು
ದಾನವನ ಹಿಕಮತ್ತು
ಯಾರು ದೇವ, ಯಾರು ದಾನವ
ಉತ್ತರವಿದೆಯೇ ಮಾನವ?

- ನೂತನ ದೋಶೆಟ್ಟಿ