ಚೆನ್ನುಡಿ (ಪರಿವರ್ಧಿನಿ ಷಟ್ಪದಿ)

ಚಿನ್ನದ ನಾಡಲಿ ಕನ್ನಡ ಭಾಷೆಯು
ಹೊನ್ನಿನ ತೆರದಲಿ ಹೊಳೆಯುತಲಿರುವುದು
ಮಣ್ಣಿನ ಗಂಧವು ಸುತ್ತಲು ಸುಳಿಯಲು ತನುವನು ಮರೆಸುವುದು
ಕಣ್ಣಿಗೆ ತಂಪಿನ ಹಸಿರಿನ ಹೂಬನ
ಮನ್ನಣೆ ಗಳಿಸಿದೆ ಜಗದೆಲ್ಲೆಡೆಯಲಿ
ಬಣ್ಣಿಸಲರಿಯದ ನಲಿವನು ಹಂಚುತ ಮೆಲ್ಲಗೆ ಕಾಡುವುದು

ಹರಿಯುವ ನದಿಗಳ ಜುಳು ಜುಳು ನಾದವು
ಕರೆಯಿತು ಕಾಣದ ಲೋಕಕೆ ರಸಿಕರ
ಬಿರಿಯಿತು ಹೂವಿನ ತೆರದಲಿ ಭಾವವು ಬರೆಸುತ ಕವಿತೆಯನು
ಮರೆಯಲಿ ತೋರುವ ತರುಲತೆ ಸೊಬಗಲಿ
ಮರೆಯಿತು ಮನಸಿನ
ಬೇಸರವೆಲ್ಲವು
ಸರಿಸಿತು ಕವಿದಿಹ ಮಂಜಿನ ತೆರೆಯನು ಹಿಗ್ಗನು ತುಂಬುತಲಿ

ವೀರರು ಧೀರರು ಬದುಕಿದ ಮಣ್ಣಿದು
ಶೂರರು ಕಲಿಗಳು ಬಾಳಿದ ಬೀಡಿದು
ಸಾರುತ ಸಂಸ್ಕೃತಿ ಸೌರಭ ಸೂಸುತ ಲೋಕದಿ ಮೆರೆಯುತಿದೆ
ನಾರಿಯರೆಲ್ಲರು ಹರುಷದಿ ಹಾಡುತ
ಸೇರುವ ಪರಿಯದು ಖ್ಯಾತಿಯ ಹಬ್ಬಿಸಿ
ಮೇರೆಯ ಮೀರಿತು ಸುಂದರ ಸುಮಧುರ ಡಿಂಡಿಮ ಬಾರಿಸಲು

ಕಂದನ ತೊದಲಿನ ನುಡಿಯಿದು ತಿಳಿಯಿರಿ
ಗಂಧದ ಗುಡಿಯಲಿ ಮುತ್ತುತ ತಬ್ಬುತ
ಬಂಧವ ಬೆಸೆಯುತ ಮನುಜರ ಕೂಡಿಸಿ ಸಂತಸ ತರುತಿಹುದು
ಚಂದದ ಚೆಲುವಿನ ನಲಿವಿನ ನಂದನ
ಮಂದಿಯ ಗಮನವ ತನ್ನೆಡೆ ಸೆಳೆದಿದೆ
ಅಂದದ ನಾಡಿನ ಕೀರ್ತಿಯು ಬೆಳಗಲು ಹೆಮ್ಮೆಯು ಮೂಡುತಿದೆ

ರನ್ನನು ಪಂಪನು ಹೊಗಳುತ ಹಾಡಿದ
ಚೆನ್ನುಡಿ ನಮ್ಮಯ ತಾಯಿಯ ಭಾಷೆಯು
ಮುನ್ನುಡಿ ಬರೆದಿದೆ ಕವಿಗಳ ಕಲ್ಪನೆ ಖುಷಿಯನು ಹುಟ್ಟಿಸುತ
ಕನ್ನಡಿಯಂತೆಯೆ ಹೊಳೆಯುತ ಲಿರುವುದು
ಕಣ್ಣಲಿ ಕನಸನು ಮುದ್ರಿಸುತಿರುತಲಿ
ತಣ್ಣನೆ ಜೀವವ ಕುಣಿಸುತ ನನ್ನಯ ಚಿತ್ತವ ಜಗ್ಗುವುದು

-ಪಂಕಜಾ..ಕೆ. ಮುಡಿಪು