ಭ್ರೂಣ ಹತ್ಯೆ

ಕೊಲೆಮಾಡಿ ತಲೆಯೆತ್ತಿ ಬದುಕಿರುವ ಬಂಧುಗಳೆ
ಖಿನ್ನತೆಗೆ ಸತ್ತುಬಿಡಿ ನೆಲಖಾಲಿಯು
ಭಂಡಮನ ಕಲ್ಲೆದೆಯು ಜನಸಾಲಿಯು ॥ಪ॥

ನಾನೊಬ್ಬ ಕೊಲೆಗಾರ ಕೊಂದಿದ್ದು ಜೋಡಿಕೊಲೆ
ಬೆಂಬಿಡದ ಬೇತಾಳ ಪಾಪಪ್ರಜ್ಞೆ
ಮುಖನೋಡೆ ಕೈಕಾಲು ದೇಹ ಮೂಡುವ ಮೊದಲೆ
ಹೊರಬಿದ್ದು ಹೆಣವಾಗಿ ದುಃಷ್ಟ ಆಜ್ಞೆ

ಫಲಹೊತ್ತ ಭೂಮಿಗದೊ ಕಡಲಾಳ ದುಃಖಹೊಳೆ
ಹೊರಗೆಳೆದು ಹಾಕಿದ್ದು ವೈದ್ಯ ಮದ್ದು
ಬೆಳಗದಿರು ಚಂದ್ರಾರ್ಕ ಮಿನುಗದಿರಿ ತಾರೆಗಳೆ
ಮೊಳಕೆಯಲಿ ಚಿವುಟಿದ್ದು ಭಾರಿಗುದ್ದು

ಪಿಂಡಾಂಡ ಮಾಂಸಗಳು ಚಹರೆ ಮೂಡುವ ಮುನ್ನ
ಆಲಯವ ತೊರೆದಾಯ್ತು ಜೋಡಿಮೂರ್ತಿ
ಒಂದಿರಲಿ ಎರಡಿರಲಿ ಮೂರು ಬೇಡೆಂದವರು
ಗರ್ಭಗುಡಿ ಕದಮುಚ್ಚಿ ಬೀಗಪೂರ್ತಿ

ಶೂನ್ಯದಲಿ ಬಿಡುಗಣ್ಣು ಬರಿಹೊಟ್ಟೆ ನೊಂದಿತ್ತು
ಸಿಡುಕುವಳು ಆಗಾಗ ನೆನಪು ತೆಗೆದು
ಶತಕೋಟಿ ಭಾರತಕೆ ಅನಿವಾರ್ಯ ಕ್ರಮವೆಂದು
ಸಂತೈಕೆ ತಲೆಸವರಿ ಕಲೆಮಾಯದು

ಹುಟ್ಟುವುದು ತಡೆಯದಿರೆ ಕಷ್ಟವಿದೆ ಜಗದಲ್ಲಿ
ನಿದ್ರಿಸಲು ಸ್ಥಳವಿಲ್ಲ ಮುಂಜಾಗ್ರತೆ
ಹಡೆಯುವದು ನೆಪಮಾತ್ರ ಕಾಲಗತಿ ತಿರುಗುತಿದೆ
ಪ್ರಕೃತಿಯಿದ ಬಯಸಿತ್ತು ನಿಷ್ಪನ್ನತೆ

ಹಡೆದಷ್ಟು ಹುಟ್ಟಿದರೆ ಈನೆಲದ ಗತಿಯೇನು?
ತಡೆರಹಿತ ಖಗಮಿಗವು ಬದುಕಿಲ್ಲವೆ?
ಮಾನವನ ಕಪಿಮುಷ್ಠಿ ತನ್ನಕುಲ ರಕ್ಷಿಸಲು
ಉಳಿದೆಲ್ಲ ಜೀವಿಗಳ ಕೊಂದಿಲ್ಲವೆ?