ಅಳತೆಗೋಲು

ಒಲವೆಂದರೆ ಹಾಗೇ ಮಾಪನವಿರದ
ಅಳತೆಗೋಲು
ಅಳೆಯಬಾರದು ಏನನ್ನೂ.
ಸಂಖ್ಯೆಗಳ ಬರೆದು ಪ್ರಮಾಣಗಳ
ಹೇಳಬಾರದು.
ಅಡ್ಡ ಉದ್ದ ಚೌಕ ಆಯತ
ಏನು ಬೇಕಾದರೂ ಆಗಬಹು
ಕಣ್ಣಳತೆಗೆಲ್ಲ ಅದು ಖಾತ್ರಿ ಆಗಿಬಿಡಬೇಕು.

ಸುತ್ತುವರಿದಿದ್ದರೆ ಅದು ಗೆರೆಯೇ ಅಲ್ಲ
ನೀನೆಷ್ಟೇ ಎಳೆದರೂ
ಒಳಗಿನ ಗೆರೆ ಬೆಳೆಯುವುದೇ ಇಲ್ಲ
ದಾಟಿ ಬೆಳೆದರೆ ಅಲ್ಲೊಂದು ಊನ
ನಾನಷ್ಟು ನೀನಷ್ಟು ಅವರಷ್ಟು ಇವರಿಷ್ಟು
ಎಂದು ಭಾಗ ಮಾಡಿಕೊಂಡರೆ
ಅಳತೆ ತಪ್ಪಿ ಅಯೋಮಯ.

ಅಳೆತೆಗೋಲಿಲ್ಲದೇ ಎಳೆವ ಗೆರೆ
ಬೆಳೆಸಬಹುದು ಎಷ್ಟು ಬೇಕಾದರೂ
ಅದಕ್ಕೊಂದು ಸಾಧನ ಹಿಡಿದರೆ
ಮುಯಗಿಯಲೇ ಬೇಕು
ಹಿಂದಿನದನ್ನೇ ಎತ್ತಿ ಮತ್ತೆ
ಮುಂದಿಡಬೇಕು.

ಒಂದರ ಜೊತೆ ಇನ್ನೊಂದು
ನೇರ ಎಳೆದರೆ ಬೆಳೆಯಬಹುದು
ಆದರೆ ಕೂಡುವದಿಲ್ಲ
ಅಳತೆಗೋಲ ಮರೆತು
ಸುಮ್ಮನೇ ಎಳೆಯುತ್ತಿರು
ಎಲ್ಲಾದರೂ ಒಮ್ಮೆ ಕೈ ಸೋತು
ಕೂಡಬಹುದು.

- ಸ್ಮಿತಾ ರಾಘವೇಂದ್ರ