ಅಜ್ಜಿಯ ಊರು

ರಜೆ ಬಂತೆಂದರೆ ಹಾರುತ್ತಿದ್ದೆ
ಅಜ್ಜಿಯೂರಿಗೆ
ಮರಳಿ ನನ್ನೂರಿಗೆ ಬರುತ್ತಿದ್ದುದು
ನಾಳೆ ಶಾಲೆ ಎಂದಾಗಲೇ

ಓಡಾಡದ ಕೇರಿಗಳಿಲ್ಲ
ಹತ್ತದ ದಿಬ್ಬಗಳಿಲ್ಲ
ಕೆರೆ ದಾಟಿ ಮೈಲು ದೂರ ನಡೆದು
ಕದ್ದು ಹೋದ ಸಿನಿಮಾ ಟೆಂಟ್‌ಗಳು
ಇಂದು ಅಸ್ತಿತ್ವದಲ್ಲೇ ಇಲ್ಲ

ಹತ್ತದ ಗಾಡಿಗಳಿಲ್ಲ
ಎತ್ತಿನಗಾಡಿ, ಟ್ರ್ಯಾಕ್ಟರ್,
ಲಾರಿಯನ್ನೂ ಬಿಟ್ಟಿಲ್ಲ
ಆದರೆ ಊರ ಸೇರಲು ಮಾತ್ರ

ತುಂಬು ಬಸುರಿ ನಟರಾಜ ಬಸ್ಸ್... ಉಸ್ಸ್!!

ಹುಳಿಸೆ ಬೆಲ್ಲದ ಲಾಲಿಪಾಪ್ಪಿನ ಸವಿ
ವಡೆ ಕಜ್ಜಾಯ, ಅಟ್ಟಕ್ಕೇರಿ ಮೆಲ್ಲುತ
ಓರಗೆಯವರೊಡನೆ ಸಾಲಾಗಿ ಹಾಸಿ
ಕತೆಯಲ್ಲಿನ ರಾಜಕುಮಾರನ ಜಾಡು ಹಿಡಿದು
ಭೂತ ಪ್ರೇತಗಳ ರೋಚಕ ಸರಣಿಗಳು.

ಊಟಕೆ ಕುಳಿತರೆ ಸಾಲಾದ ಪಂಕ್ತಿ
ಶಿಸ್ತಿನ ಸಿಪಾಯಿಗಳಂತೆ ನಮ್ಮ ಯುಕ್ತಿ
ನಿವಾಳಿಸೋ ಅಂಚಿಕಡ್ಡಿಗೆ ತದೇಕ ದೃಷ್ಟಿ

ಆಳುಕಾಳುಗಳಿಗೆ ಕೊರತೆಯಿರಲಿಲ್ಲ
ಕುರಿ ಕೋಳಿಗಳಿಗೆ ಲೆಕ್ಕವೇ ಇರಲಿಲ್ಲ
ಹಿತ್ತಲ ದನ ಎಮ್ಮೆಗಳು ತಾಸುಗಟ್ಟಲೆ
ಜಗಿಯುತ್ತಿದ್ದುದು ಏಕೆಂದು ಅರಿವಾದದ್ದು

ಹೈಸ್ಕೂಲು biology ಓದಿದಾಗಲೇ..

ಅಪ್ಪನ ಢರ್ ಢರ್ ಸ್ಕೂಟರಿನ ಸದ್ದಿಗೆ
ಕತ್ತು ಕೊಂಕಿಸಿ, ಕಿಟಕಿ ಕಿಂಡಿಯ ಇಣುಕಿ
ಕೈಯಲ್ಲಿ ಪೆನ್ಸಿಲ್ಲು, ಬಿಡಿಸಲಾರದ ಲೆಕ್ಕ ಬಿಡಿಸುತ್ತ
ಕೆರೆದಂಡೆಯ ಕನಸು ಕಾಣುತ್ತಲೇ
ವಿಧೇಯ ವಿದ್ಯಾರ್ಥಿಗಳಾಗುತ್ತಿದ್ದೆವು ಕೆಲ ಹೊತ್ತಿಗೆ

ಇಲ್ಲವೇ,
ಕಳ್ಳ ನಿದ್ದೆಯ ನಾಟಕ ಶುರು

ಕತ್ತಲಾವರಿಸುತಿದೆ... ಕಂದೀಲು ಉರಿಯುತಿದೆ
ದೀಪ ಹಚ್ಚುವ ಸಮಯವಾಗಿದೆ
ದೇವರ ಕೋಣೆಯಲ್ಲಿ ಚಾಪೆ ಹಾಸಿದೆ
ಒಂದರ ಹಿಂದೊಂದು ದೇವರನಾಮ ಉಲಿಯುತಿದೆ
ಒಬ್ಬೊಬ್ಬರ ಕೈಯಲ್ಲ್ಲೂಒಂದೊಂದು ತಾಳವಿದೆ
ಭಜನೆಗಳಿಗೆ ಲೆಕ್ಕವೇ ಇಲ್ಲ

ಅಂತ್ಯ ಬಂದಾಗ ಸಾಕು ಅನ್ನಿಸಲಿಲ್ಲ

ಪುರಿ ಬತ್ತಾಸು ಕೊಳ್ಳಲು, ಕಾಸಿಗೆ
ಅಜ್ಜನ ಕೊಠಡಿಯ ಹೊಸಿಲಲಿ ತವಕದಿ ನಿಂತದ್ದು
ನೆನಪಿಂದ ಮಾಸಿಲ್ಲ
ಅಂಗೈಯಲ್ಲಿ ಮುಚ್ಚಿಟ್ಟ ಐದು ಪೈಸೆಗೆ ಕಣ್ಣರಳಿಸಿ
ಜಾತ್ರೆಯಲ್ಲಿ ಕೊಂಡ ಪೀಪಿ, ಬಣ್ಣದ ಕನ್ನಡಕವೇರಿಸಿ

ಮೆರೆದದ್ದು ಕನಸಲ್ಲ

ಹಬ್ಬಹರಿದಿನ ಜಾತ್ರೆ ತೇರೆಂದು
ಒಗ್ಗೂಡಿ ಆಚರಿಸದ ದಿನಗಳೇ ಇರಲಿಲ್ಲ
ಮದುವೆ, ಹೆರಿಗೆ ಬಾಣಂತನದ ಸರಣಿಗಳಲ್ಲಿ
ಕೂಸುಗಳು ಬೆಳೆದು ಪುರ್ರೆಂದು ಹಾರಿದವು

ಗಲಗಲವೆನ್ನುತ್ತಿದ್ದ ಭಂಗಲೆ
ಇದೀಗ ಸದ್ದಿಲ್ಲದೆ ತಲೆ ಬಗ್ಗಿಸಿದೆ
ಕೊಟ್ಟಿಗೆ ಬಿಕೋ ಎನ್ನುತ್ತಿದ್ದರೂ
ಆಕಳ ಅಂಬಾ. ಕೂಗು ಕಿವಿಯಲ್ಲಿ
ಇನ್ನೂ ಪ್ರತಿಧ್ವನಿಸುತ್ತಿದೆ
ಗಂಜಲ ಸಗಣಿಯ ಘಾಟು
ನಾಸಿಕಕ್ಕಿನ್ನೂ ಅಂಟಿದೆ

ಗೋಡೆ ಗೋಡೆಗಳೂ ಮಾತನಾಡುತ್ತಿದ್ದವು ಅಂದು.
ಇಂದು, ಮಂದ ಬೆಳಕೂ ಇಲ್ಲವಾಗಿದೆ
ಮೌನವೇ ಬಸಿರಾಗಿ, ನಿರ್ಜೀವ ಗೂಡಾಗಿದೆ

-ಧಾರಿಣಿ ಮಾಯಾ