ಅಜ್ಜಿ ಚಿಟ್ಟೆ

ರೆಕ್ಕೆ ಕತ್ತರಿಸಿದ ಅಜ್ಜಿ ಚಿಟ್ಟೆಯನ್ನು
ಮಾಯವಾಗಿಸಿದ್ದು
ಕಾಲದ ಜೋಪಡಿ ಮುಚ್ಚಿಹಾಕಿದೆ
ಹಾರಾಡುವ ಹದ್ದಿಗೂ
ಹುಡುಕಲು ಕ್ಷಣ ಪುರುಸೊತ್ತಿಲ್ಲ
ಸಾಲಾಗಿ ಎದ್ದಿವೆ ಅಂಗಡಿಯ ಮುಂಗಟ್ಟುಗಳು
ಆಟಿಕೆಯಾದವು ಇವು ಮಕ್ಕಳ ಬಾಯಲ್ಲೂ

ಸಪೂರ ನುಣಪಿನ
ಹೊಳೆವ ಮುಚ್ಚಟೆಯಲ್ಲಿ
ದುಂಡನೆ ಉದ್ದನೆ
ಬಣ್ಣದ ಚಾಕಲೇಟಿನ ಗುಳಿಗೆ
ಬಿಳಿ ಏಪ್ರಾನಿನ ಕೆಳಗೆ
ತತ್ಕಾಲದ ತಾತ್ಕಾಲಿಕ ಉಪಶಮನಕ್ಕೆ
ಅಗ್ಗವಾಗಿ ಲಭ್ಯ ಮಾರುಕಟ್ಟೆಯಲ್ಲಿ
ತೆರೆದ ಹೃದಯದಿ ನಿರ್ವಹಿಸುವವು
ತಮಗೆ ವಹಿಸಿದ ಪಾತ್ರ

ಕಲುಷಿತ ನೆತ್ತರನ್ನು ಶುದ್ಧೀಕರಿಸುವ
ಮಂದಾದ ರಕ್ತವನ್ನು ತಿಳಿಗೊಳಿಸುವ
ಗರ್ಭವನ್ನು ನಿರಾಳವಾಗಿ ಶುಚಿಗೊಳಿಸಿ
ರಕ್ತನಾಳವನ್ನು ಹಿಗ್ಗಿಸುವ
ಸಿಟ್ಟನ್ನು ಅಂಕೆಯಲ್ಲಿಟ್ಟು ಮಂದಹಾಸ ಬೀರುವ
ಶನಿಯುಂಗುರದ ಬೊಜ್ಜು ಕರಗಿಸಿ
ಮಾಂಸಖಂಡಗಳ ಛೇಧಿಸಿ
ನಿರ್ದಿಷ್ಟ ನರ ತಲುಪಿ ಕ್ರಿಯ ಮಾಡಿ
ವಾಯುವನ್ನೂ ಹೊಡೆದೋಡಿಸಿ
ಬದುಕಿಸಿ ಮಾನವೀಯತೆ ಮೆರೆಯುತ್ತವೆ

ಇವೆಲ್ಲವೂ ಉತ್ತಮ ಆ‘ರೋಗ’ಕ್ಕಾಗಿ
ಎಲ್ಲಾ ಹೀನತೆಯ ಮೀರುವ ಇವು
ಕಾಲು ಶತಮಾನದಿಂದ ಬಿಡುಗಡೆಗಂ‍ಟದ
ಜೀವದ್ರವ್ಯ
ಇಲ್ಲಿ ಗುಟ್ಟಾಗಿ ಅಡಗಿವೆ ನಿಮ್ಮ ನಿತ್ಯ ಚೇತನಾದಿಗಳು
ಅಕೋ ಇನ್ನೇಕೆ ತಡ ಬನ್ನಿ ಬನ್ನಿ ಕೊಂಡುಕೊಳ್ಳಿ
ಕೊಂಡು ನಿಧಾನವಾಗಿ ಸಾಯಿರಿ