ವರುಷಕೊಮ್ಮೆ ಹೊಸತು ಹುರುಪು

ಬರಿದಿನಗಳ ಎಣಿಕೆಯಲ್ಲ ಹೊಸವರ್ಷದ ಸಂಭ್ರಮ
ಭೂಮಂಡಲ ಬದಲಾಯಿತು ನವಪಲ್ಲವ ಭೂರಮ ॥ಪ॥

ಹಳೆಯದನ್ನು ಬಿಚ್ಚಿಎಸೆದು ಹೊಸಪತ್ತಲು ಉಟ್ಟಿದೆ
ಹಳೆಬೇರಿಗೆ ಬಲವಿಟ್ಟವು ಹಳೆಎಲೆಗಳು ಒಟ್ಟಿದೆ
ಪಕ್ಕೆಲುವಿವು ಹರಿಕೊಂಬೆಯು ತೆರೆದು
ಮುಚ್ಚುತ್ತಿವೆ ಎಳೆದಳಿರಿವು ಪೊರೆದು

ಒಗರುಂಡವು ಕೋಗಿಲೆಗಳು ಮಾಮರದಲಿ ಕುಳಿತು
ಹೊಸಗಾನವು ಹೊಸವರ್ಷದ ಪಂಚಮದನಿ ಮೊಳೆತು
ಮಾವಿನಫಲ ಗಿಣಿಗಡುಕನ ರುಚಿಯು
ಬಾಂದಳವನು ತೊಳೆದಿಟ್ಟನು ಶುಚಿಯು

ಮಾವುಬೇವು ಗೆಳೆತನದಲಿ ಸಮರಸವಿದೆ ಬದುಕು
ಹೊಸಮಳೆಗಳು ಪೆಳೆಮಳೆಗಳು ಮೃಗಸಂತತಿ ಉಕ್ಕು
ವರುಷಕೊಮ್ಮೆ ಹೊಸತುಹುರುಪು ಧರತಿ
ಪೊರೆಕಳಚಿತು ಹರೆವುಕ್ಕಿತು ಪ್ರಕೃತಿ

ಯುಗಯುಗಕು ಮರುಭರ್ತಿಯು ಒಳಚೇತನ ಹಿಗ್ಗಿ
ಶಾವಿಗೆಯೆಳೆ ಹಾಲುತುಪ್ಪ ಬೆಲ್ಲಬೆರೆತು ಹುಗ್ಗಿ
ನುಗ್ಗೆಕಾಯಿ ಸಾರಿಗಿಳಿದ ಸ್ವಾದ
ಚಿಗುರೆಲೆಗಳು ಅಡಿಕೆ ಸುಣ್ಣ ಮೋದ

ನೇಗಿಲಿಳಿಸಿ ಹೊಸಹೂಟಿಯು ರೈತನೆತ್ತು ಪೂಜೆ
ಹೊಂಗೆಯಮರ ಜೇನ್ಮಳೆಗಿಳೆ ಮಧುಬಟ್ಟಲ ಹೂಜಿ
ಚಿತ್ತಾರದ ನವಚೈತ್ರವು ಹಸಿರು
ಭರವಸೆಗಳು ಬದುಕಿಗೊಂದು ಉಸಿರು

ರಣಗಡಲಲಿ ಬಿಸಿತಾಪಕೆ ತಂಪಿಳಿಸಿದೆ ಕಾರು
ಒಣಭೂಮಿಗೆ ಹಸುರುಕ್ಕಲು ಮುಗುಳಿಕ್ಕಿವೆ ಚಿಗುರು
ಬಾಯ್ದೆರೆದಿರೊ ಕೆರೆಕಟ್ಟೆಯು ತೆರೆದು
ಹುಡಿಮಣ್ಣಿಗೆ ರಾಡಿನೀರು ಹರಿದು

- ಜೀವರಾಜ ಹ ಛತ್ರದ