ಪ್ರಾಸ 

ಮಂದಿ ಒಂದಾಗಬೇಕಾದರೆ ಕೂಡಬೇಕು ಸಂಬಂಧ
ಮನೆ ಊರು ದೇಶಕ್ಕೂ ಇರಲಿ ಪ್ರಾಸಬಂಧ

ಪ್ರಾಸವೆಂದರೆ ಹೊಂದಬೇಕು ಒಂದಕ್ಕೊಂದು:
ಬಿದಿರ ಗಳುವಿಗೆ ಸ್ವರದ ಮನೆ
ಪಾಯಸಕ್ಕೆ ಬೆಲ್ಲ ಸಂಜೆಗೆನ್ನೆಗೆ ಕೆಂಪು
ಸುಂದರ ಹೆಜ್ಜೆಗೊಂದು ಅಂದದ ಗೆಜ್ಜೆ
ಮಲ್ಲಿಗೆಗೆ ಮಲ್ಲಿಗೆಯದೇ ಪರಿಮಳ
ತುಟಿಗಳಿಗೆ ಅಳುವೋ ನಗುವೋ
ಸಂದರ್ಭಕ್ಕೆ ತಕ್ಕಂತೆ

ಕೂಡಿಕೊಂಡರೇನೆ ಪ್ರಾಸ. ಅಳುವ ಸಂದರ್ಭದಲ್ಲಿ
ನಕ್ಕರೆ ಹೇಗೆ? ರಾಜಕೀಯದಲ್ಲಿ ಪಳಗಿದ ಹುರಿಯಾಳು
ಬೊಬ್ಬೆ ಹಾಕುವುದನ್ನು ಬಿಟ್ಟು
ಹಾಡಿದರೇನು ಚಂದ ಮಾಯಾಮಾಳವಗೌಳ?
ಇರಿಯಬಹುದೆ ಚೂರಿ ತನಗೆ ನೋವಾದರೆ?
ಹೊಂದಿಕೊಂಡೀತೆ ಮಹಾಕಾವ್ಯದ ಮಹಾಛಂದಸ್ಸಿನ ಜತೆ ಹನಿಗವನ?
ನದಿಗಳಷ್ಟೇ ಸಾಕೆ ಸಮುದ್ರಕ್ಕೆ?

ಪ್ರಾಸಕ್ಕೂ ಬೆಸಸಂಖ್ಯೆಗೂ ಎಣ್ಣೆಸೀಗೆ. ಸಮಸಂಖ್ಯೆಯಾದರೆ
ಕನಸಿನಲ್ಲಾದರೂ ಸುಸಂಗತವಾದೀತು ಬದುಕು
ನವೋದಯ ಕಾವ್ಯದ ಹಾಗೆ
ಛಂದೋಬದ್ಧ ಪ್ರಾಸ ಒಳಪ್ರಾಸ ಅನುಪ್ರಾಸ ಸುಹಾಸ
ಸಮಸಮನಾಗಿ ಎಡ ಬಲ

ಬಲವಿದ್ದರೇನೇ ಎಡಕ್ಕೆ ಪ್ರಾಸ
ಅಥವಾ ಬಲಕ್ಕೆ. ಇಲ್ಲದಿದ್ದರೆ ಬರೀ ಪರಿಹಾಸ

ಮನುಷ್ಯನ ಪಾಡು ನೋಡಿ: ಪ್ರೀತಿಸಬೇಕು ದ್ವೇಷಿಸಬೇಕು ಒಟ್ಟಿಗೆ
ಅಳಬೇಕು ನಗಬೇಕು ಅವೇ ಕಣ್ಣುಗಳಿಂದ
ತಲೆ ಸವರಬೇಕು ಕಲ್ಲೆಸೆಯಬೇಕು ಅವೇ ಕೈಯಿಗಳಿಂದ
ಶಪಿಸಬೇಕು ಕ್ಷಮಿಸಬೇಕು
ನೆನಪಿಟ್ಟುಕೊಳ್ಳಬೇಕು ಮರೆತುಬಿಡಬೇಕು

ಹೆಚ್ಚುಕಡಿಮೆಯಾದರೆ ಪ್ರಾಸದ ಹ್ರಾಸ
ವ್ಯವಸ್ಥೆ ಅವ್ಯವಸ್ಥೆ ಅರ್ಥ ಅಪಾರ್ಥ
ಕಲೆ ಧರ್ಮ ನ್ಯಾಯ ಕಾನೂನು ಸ್ವಾತಂತ್ರ್ಯ ಅನುಕಂಪ ಇತ್ಯಾದಿ
ಇದ್ದೂ ಇಲ್ಲದಂತೆ ವ್ಯರ್ಥ

ಅದಕ್ಕೇ ನೋಡಿ ಅಪರೂಪದಲ್ಲಿ ಅಪರೂಪ ಗಾಂಧಿ ಅಂಬೇಡ್ಕರರು
ಯಾರಿದ್ದಾರೆ ಅವರಿಗೆ ಪ್ರಾಸವಾಗುವವರು?