ಕೇದಿಗೆಯ ಪೊದೆಯೊಳಗೆ ನಾಗರದ ಹೆಡೆಕಂಡು 

ಹೀಗೆ ಆಡುವಾಗ ಮರದ ಬೊಡ್ಡೆಗೆ ಬೆನ್ನುಜ್ಜಿ
ಬೆನ್ನಮೇಲೊಂದು ಚಿತ್ರ, ಬುಡದ ಮೇಲೆಯೂ!
ಎಂಥೆಂಥಾ ಕಥೆಯ ಕತ್ತಲೆಗೆ ಬೆಳಕಿನ ರೇಕು ಬಳಿದಂತೆ
ಮಾತು
ಇಲ್ಲಿ ಆಡುವುದು, ಹಾಡುವುದು ಎರಡು ನಿಶಿದ್ಧ.
ಹೀಗೆನ್ನುವಾಗಲೇ
ಮರದ ಬೇರುಗಳು ಕವಲಾಗಿ ಕಾಲುಗಳಾಗಿ
ಕಾಂಡದೊಳಗೆ ಯೋನಿ ಮೂಡಿ ಕೂಡುವ ಕಾತುರಕೆ
ಕೇದಿಗೆಯ ಪೊಂದೆಯಲ್ಲೊಂದು ಹೂ
ಹೂವೆಂದರೆ ಹೂ ಮಾತ್ರವಲ್ಲ ಗಂಧಕ್ಕೊಂದು ಘಮಲು ಸಣ್ಣ ಮುಳ್ಳುಗಳು
ಕಾಯುತ್ತಿವೆ
ನಾಟಬೇಕಿರುವ
ತಿಂಗಳು ದಾಟಿದ ಹೆಣ್ಣೊಡಲ ಒಳಗೆ
ಇನ್ನೂ ಅಲುಗಾಡದ ಕೂಸ ಮೂಡಿರದ
ಮೃದು ಕೈ ಬೆರಳ!
ಇತ್ತಿತ್ತಲಾಗಿ ಒತ್ತಿ ಮೂಲಕ್ಕೆ ಎಸೆದ ಕಾಡಿನ ಕಾವಲ್ಲಿ ಕವಣೆ ಕಲ್ಲಾಟ
ಮೇಲೆ ಎಸೆವಾಗ ಖುಷಿಗೆ
ಸೀಪತ್ಲೆ ಬೀಜಗಳು ಗಟ್ಟಿಗೊಳ್ಳುತ್ತಾ ಕಪ್ಪಗಾಗುತ್ತಿವೆ
ನೆನ್ನೆ ಕೆರಯ ಬಳಿಯಿಂದ ಹೊತ್ತೊಯ್ದ ಮೀನ
ಮೂಳೆಗಳು ಗಿಡದ ಬುಡದಲ್ಲಿ
ಕರ್ರೆನ್ನುವ ಕಾಗೆಗೆ
ಈಗ ಬೀಜ ಬಲಿಯುವ ಸದ್ದು ಕೇಳುತ್ತದೆ ನಿಖರವಾಗಿ
ಮಸೆವ ಕೊಕ್ಕಲ್ಲಿ ಉಳಿದ ಮೀನವಾಸನೆಯ ಶಿಂಡು
ಸೀಪತ್ಲೆ ಕಾಯಿಗೂ ಅಂಟಬಹುದು
ಈಗ ಕಾಗೆಗೂ ಕೀಳಲು ಕಾಯುವ ಕೈಗಳಿಗೂ ದೊಡ್ಡ ಜಗಳ
ಕಟ್ಟಿಟ್ಟಬುತ್ತಿ.
ಸೂರ್ಯ ಬೆಳ್ಳಗಾದಂತೆ ಕಾವೂ ಜಾಸ್ತಿ
ಯಾವುದೂ ವಿಕಾರವಲ್ಲ ಕೆರೆಯಲ್ಲಿ ಕಾಣುವ ಮುಖವೂ
ಎಲ್ಲದರ ಜೊತೆ ಅಖಂಡ
ಕಾರೆ ಮುಳ್ಳುಗಳ ನಡುವೆ
ಗೊಂಡೆಗೆ ಮುಡಿವ ಹೂವಿಗಾಗಿ ಅರಸಿ ಬರುವ ಹುಡುಗಿ
ಬೆನ್ನಲ್ಲಿ ಹಚ್ಚೆ
ಸರಿವ ಹಾವಿಗೂ ರೋಮಾಂಚನ ಅವಳ ಆ ಹೆಜ್ಜೆ
ಹುಡುಗಿ ಕೈ ಹರಿದಡೆಯೆಲ್ಲಾ ಹಾವೂ ಹರಿದು
ಅವಳ ಕೈ ಜೊತೆ ಕೇಳಿಯಾಟ
ಕಿಲ ಕಿಲ ನಗುವಿಗೆ
ಬಾನು ತಾನಿಳಿದು ಹಗಲ ಕತ್ತಲಾಗಿಸುವ ರೆಂಬೆಗಳ ಹೆಣೆದ
ಮರಗಳ ಸಂಕಷ್ಟ ಈಗ ಹೇಳತೀರದು
ಬಣ್ಣದ ಹಂಗು ತೊರೆದರೂ ತಾನೇ ಬಣ್ಣವಾಗುವ
ನಿಚ್ಚಣ ಕೆಯ ಕೆಳಗೆ
ಈ ಹುಡುಗಿ ಆ ಹಾವು
ಬೊಡ್ಡೆಗೆ ಕೂತು ಬೆನ್ನಲ್ಲೆ ಚಿತ್ರ ಮೂಡಿಸಿಕೊಂಡ ನಾವೆಲ್ಲಾ
ದಂಗು ಬಡಿದಂತೆ ನಿಶ್ಚೇತ!
ಕೇದಿಗೆಯ ಘಮಲು ಹುಡುಗಿಯ ಮೂಗ ಕೆದಕಿ
ಅದ ಕೀಳುವಾಗ ಶಿವ ಶಿವಾ ಆ ಹಾವ ಹೆಡೆ ಅವಳ ಕೈಮೇಲೆ ಆಡುತ್ತಿದೆ
ಫ್ರೀಜ್ ಎನ್ನಿ ಪ್ಲೀಸ್
ಕ್ಯಾನ್ವಾಸಿನ ಎದೆಯ ಮೇಲೆ ಈತ ಬರೆಯಲು ಶುರು ಮಾಡಿದ್ದಾನೆ
ಜಗತ್ತಿನ ಎಲ್ಲವೂ ಈಗ ಚಿತ್ರಗಳೇ

- ಪಿ. ಚಂದ್ರಿಕಾ