ಕದತಟ್ಟುವ ಕವಿತೆ

ಸೂರ್ಯನಂತೆ ಎದ್ದು ಚಂದ್ರನಂತೆ ಬದಲುತ್ತ
ಮೊಗ್ಗಿನಂತೆ ಚಿಗುರಿ ಹಣ್ಣಿನಂತೆ ಬಲಿಯುತ್ತ

ಗೋಡೆಯಂತೆ ನಿಂತು ಬಾಗಿಲಂತೆ ತೆರೆಯುತ್ತ
ನೆರಳಿನಂತೆ ಹಿಂಬಾಲಿಸಿ ನೀರಿನಂತೆ ಹರಿಯುತ್ತ

ಕಲ್ಲಿನಂತೆ ಇದ್ದರೂ ಹುಲ್ಲಿನಂತೆ ಬಾಗುತ್ತ
ಎಲೆಗಳೆಲ್ಲ ಬಿದ್ದರೂ ಹೂಬಿಟ್ಟು ನಗುತ್ತ

ಗುಟ್ಟಿನಂತೆ ಅಡಗಿಯೂ ಬೆಳಕಿನಂತೆ ಚೆಲ್ಲುತ್ತ
ಬೆಟ್ಟದಂತೆ ಮಲಗಿಯೂ ಗರಿಕೆಯಂತೆ ನಿಲ್ಲುತ್ತ

ಶಬ್ಧದಂತೆ ತೋರುತ್ತ ಅರ್ಥದಂತೆ ಮುಳುಗುತ್ತ
ನಾಳೆಯಂತೆ ಕರೆಯುತ್ತ ನಿನ್ನೆಯಂತೆ ಮರುಗುತ್ತ

ಗಾಳಿಯಂತೆ ಅಲೆಯುತ್ತ ಗೀಳಿನಂತೆ ಉಳಿಯುತ್ತ
ನೆಂಟರಂತೆ ಮರಳುತ್ತ ನೋವಿನಂತೆ ನರಳುತ್ತ

ನಿಮ್ಮ ಕಣ್ಣ ಬಿಂಬವಾಗಿ, ನಿಮ್ಮ ಮನದ ರಾಗವಾಗಿ
ಬೀಜದಂತೆ ಸಾಂದ್ರವಾಗಿ ಕನಸಿನಂತೆ ಗೂಢವಾಗಿ

ಕವಿತೆಯಂತೆ ಕದತಟ್ಟಿ ಒಳಬರಲು ಕಾಯುವೆ
ನಿಮ್ಮ ನಾಡಿಬಡಿತಗಳಲಿ ನಗುವಾಗಿ ಅರಳುವೆ

- ಕಮಲಾಕರ ಕಡವೆ