ಜೀವನ

ಕ್ರೂರಿಗು ಶೌರಿಗೂ ಅಂತರ ಬಹಳಿದೆ
ಅಗಣಿತ ಸಂತಾನ ಜಿಂಕೆಗಳು
ಎಣಿಕೆಗೆ ನಿಲುಕಿವೆ ಸಿಂಹಗಳು ॥ಪ॥

ಮುಳ್ಳಿನ ನಡುವಲಿ ಹೂವಿನ ಜೀವನ
ಮುಳ್ಳಿಗೆ ಕಂಟಕ ಸೌಂದರ್ಯ
ಗಾಳಿಯು ಸೋಕಲು ತುಸು ಅಲುಗಾಡಲು
ಕ್ರೌರ್ಯವ ಮೆರೆಯಿತು ಔದಾರ್ಯ

ಬೆಂಕಿಯ ಕೆಂಡದಿ ಬಂಗಾರ ಬೆಂದರೆ
ಅಪ್ಪಟ ಹೊಳಪಿನ ಅಪರಂಜಿ
ಸುತ್ತಿಗೆ ಏಟಿಗೆ ಮಾಟವಿದಾಯಿತು
ತಪ್ಪುಗಳಾಗದು ಗುಲಗಂಜಿ

ಹಲ್ಲಿನ ನಡುವಲಿ ನಾಲಿಗೆ ಬದುಕಿದೆ
ನಿಶ್ಚಿತ ಸಿಕ್ಕರೆ ತುಂಡುಗಳು
ನಾಲಿಗೆ ನುಡಿಯಲಿ ಹದ್ದು ಮೀರಿದರೆ
ಹಲ್ಲುಗಳುದುರಿವೆ ದಂಡಗಳು

ಕುರಿಮರಿ ಗೆಳೆತನ ಮಾಡಿದ ತೋಳಕೆ
ಹಸಿವಿಲ್ಲೆಂಬುದು ತಿಳಿದಿರಲಿ
ನಾಗರ ಧರಿಸಲು ಶಿವನೆಂದರಿದರೆ
ಶವನಾಗೊ ಸಂಭವ ಸನಿಹದಲಿ ೪

ದಡಗಳಿಗೊಂದಿನ ಸುನಾಮಿ ಮುತ್ತಲು
ಬೆಳಕಿದು ಸಾಯಲು ಕತ್ತಲೆಯು
ಬೈತಲೆಯೆಂದಿಗೂ ದಾರಿಗಳಾಗವು
ಒಳದೆಲೆ ಯೋಚನೆ ಬೆತ್ತಲೆಯು

ಜೀವರಾಜ ಹ ಛತ್ರದ