ಆತ್ಮ ಸಾರಥಿ 

ನಾನು ಹಡೆದ ಮಗುವ ತೆರದೆ
ಕವಿತೆ ತೊದಲನು ನುಡಿದಿದೆ
ನೋವ ಬಿಕ್ಕುಗಳಲ್ಲಿ ಎಂದೂ
ನನ್ನ ಕೈಯನು ಹಿಡಿದಿದೆ

ಮನದ ಮೂಲೆಯ ಆಸೆ ಮಲ್ಲಿಗೆ
ಕವಿತೆ ಸಾಲಲಿ ಘಮ್ಮಿಸಿ
ನಲಿವ ನಾಳೆಯ ಎಲ್ಲ ಕನಸನು
ಹೆಕ್ಕಿ ಪದದಲಿ ಜೋಡಿಸಿ

ಪೊರೆವ ಬಯಲದು ಕವಿತೆ ಎಂದೂ
ಭಾವಬೀಜವ ಬಿತ್ತಿದೆ...
ಭರವಸೆಯ ಟಿಸಿಲದು ಮೊಳಕೆಯೊಡೆಯುತ
ಚಿಗುರಿ ಮನದಲಿ ಹಬ್ಬಿದೆ

ಮಬ್ಬು ಬೆಳಕಲಿ ದಾರಿತೋರುವ
ಗುರುವಿನಂದದಿ ಕವಿತೆಯೂ
ಇದ್ದೂ ಇರದ ಮಂದಿ ನಡುವಲಿ
ಆತ್ಮ ಸಾರಥಿ ಕವಿತೆಯೂ

ವಿದ್ಯಾಶ್ರೀ ಅಡೂರ್
ಮುಂಡಾಜೆ