ಬಾಶೆ-ಬಾಶೆಯ ಕವುಶಲಗಳು ಮತ್ತು ಕಲಿಕೆ

Date: 26-06-2025

Location: ಬೆಂಗಳೂರು

"ಒಂದು ಬಾಶೆಯ ದ್ವನಿಗಳಲ್ಲಿ ಸಾಕಶ್ಟು ವಯಿವಿದ್ಯತೆ ಇರುತ್ತದೆಯಾದರೂ ಅದರ ಬರಹದ ರೂಪವನ್ನು ಕಲಿಯುವಾಗ ಉಚ್ಚರಿಸುವ ದ್ವನಿಗಳು ಸಹಾಯಕವಾಗಿರುತ್ತವೆ. ಇಲ್ಲಿ ತಾಯ್ಮಾತಿನ ಶಿಕ್ಶಣವಾದರೆ ಮಗುವೊಂದು ಶಾಲೆಯಲ್ಲಿ ಕಲಿಯುವ ಲಿಪಿರೂಪಗಳು ತನ್ನ ಮಾತಿನಲ್ಲಿ ಬಳಸುವ ದ್ವನಿಗಳ ಬರಹದ ರೂಪ ಎಂಬುದನ್ನು ಬಾವಿಸಿಕೊಂಡಾಗ ಕಲಿಕೆ ಸರಳವಾಗುತ್ತದೆ," ಎನ್ನುತ್ತಾರೆ ಅಂಕಣಕಾರ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಬಾಶೆ-ಬಾಶೆಯ ಕವುಶಲಗಳು ಮತ್ತು ಕಲಿಕೆ’ ಕುರಿತು ಬರೆದಿದ್ದಾರೆ.

ಶಾಲೆಯಲ್ಲಿ ಬಾಶೆಯ ಬರೆಯುವ ಮತ್ತು ಓದುವ ಕವುಶಲಗಳನ್ನು ಕಲಿಸುವಾಗ ಅಕ್ಶರಗಳನ್ನು, ಮುಂದುವರೆದು ಅಕ್ಶರಗಳ ಜೋಡಣೆಯನ್ನು ಅಂದರೆ ಪದಗಳನ್ನು ಕಲಿಸಲಾಗುವುದು. ಅಕ್ಶರಗಳನ್ನು ಕಲಿಸುವಾಗ ಮಕ್ಕಳು ಅವುಗಳನ್ನು ತಾವು ಉಚ್ಚರಿಸುವ ದ್ವನಿಗಳ ಜೊತೆಗೆ ಅವುಗಳನ್ನು ಹೋಲಿಸಿಕೊಂಡು ಕಲಿಯಲು ಸುಲಬವಾಗುತ್ತದೆ. ಒಂದು ಬಾಶೆಯ ದ್ವನಿಗಳಲ್ಲಿ ಸಾಕಶ್ಟು ವಯಿವಿದ್ಯತೆ ಇರುತ್ತದೆಯಾದರೂ ಅದರ ಬರಹದ ರೂಪವನ್ನು ಕಲಿಯುವಾಗ ಉಚ್ಚರಿಸುವ ದ್ವನಿಗಳು ಸಹಾಯಕವಾಗಿರುತ್ತವೆ. ಇಲ್ಲಿ ತಾಯ್ಮಾತಿನ ಶಿಕ್ಶಣವಾದರೆ ಮಗುವೊಂದು ಶಾಲೆಯಲ್ಲಿ ಕಲಿಯುವ ಲಿಪಿರೂಪಗಳು ತನ್ನ ಮಾತಿನಲ್ಲಿ ಬಳಸುವ ದ್ವನಿಗಳ ಬರಹದ ರೂಪ ಎಂಬುದನ್ನು ಬಾವಿಸಿಕೊಂಡಾಗ ಕಲಿಕೆ ಸರಳವಾಗುತ್ತದೆ. ಇಲ್ಲದಿದ್ದರೆ ಮಗು ತನಗೆ ಶಾಲೆಯಲ್ಲಿ ಕೊಡುವ ಲಿಪಿ ರೂಪಗಳನ್ನು ಮಾತ್ರ ಕಲಿಯುತ್ತದೆ. ಬಾರತದ ಸಂದರ‍್ಬದಲ್ಲಿ ಇಂಗ್ಲೀಶಿನ ಮೂಲಕ ಶಿಕ್ಶಣವನ್ನು ಕೊಡುವಾಗ ಇದನ್ನು ಗಮನಿಸಬಹುದು. ಕನ್ನಡ ಮಾತನ್ನಾಡುವ ಮಗುವೊಂದಕ್ಕೆ ಕನ್ನಡದ ದ್ವನಿಗಳ ಲಿಪಿರೂಪವನ್ನು ಕಲಿಸುವಾಗ ಆ ಲಿಪಿರೂಪ ಯಾವ ದ್ವನಿಯನ್ನು ಪ್ರತಿನಿದಿಸುತ್ತದೆ ಎಂದು ಹೇಳುವ ಅವಶ್ಯಕತೆ ಇರುವುದಿಲ್ಲ. ಮಗು ಅದನ್ನು ನಿರೀಕ್ಶಿಸುವುದೂ ಇಲ್ಲ. ಬದಲಿಗೆ ಕನ್ನಡ ತಾಯ್ಮಾತಿನ ಮಗುವೊಂದು ಇಂಗ್ಲೀಶನ್ನು ಕಲಿಯುತ್ತಿದೆ ಎಂದಾದರೆ ಇಂಗ್ಲೀಶಿನ ದ್ವನಿಗಳ ಲಿಪಿರೂಪವನ್ನು ಕಲಿಯಬೇಕು. ಮಗು ಅವುಗಳನ್ನು ಚಿತ್ರದ ಹಾಗೆ ನೆನಪಿಟ್ಟುಕೊಂಡು ಕಲಿಯಬೇಕಶ್ಟೆ. ವಾಸ್ತವವಾಗಿ ಅವುಗಳನ್ನು ತನ್ನ ಜೀವನದ ಯಾವುದಕ್ಕೂ, ಮುಕ್ಯವಾಗಿ ಉಚ್ಚರಿಸುವ ದ್ವನಿಗಳಿಗೆ ಹೋಲಿಸಿಕೊಳ್ಳಲು ಸಾದ್ಯವಿಲ್ಲ.

ಹಾಗಾದರೆ ಮಗು ಈಗ ಅವುಗಳನ್ನು ಲಿಪಿಯಾಗಿ ಮಾತ್ರ ಕಲಿಯುತ್ತದೆ. ಇಲ್ಲಿಂದಲೆ ಸಮಸ್ಯೆ ಶುರುವಾಗುತ್ತದೆ. ಈಗ ಚಿತ್ರದ ರೀತಿಯಲ್ಲಿ ಕಲಿತ ಇಂಗ್ಲೀಶಿನ ಲಿಪಿಗಳನ್ನು ಕೆಲವು ದ್ವನಿಗಳ ಪ್ರತಿನಿದಿ ಎಂದು ಕಲ್ಪಿಸಿಕೊಳ್ಳಬೇಕು. ಇದು ಸಾದ್ಯವಾಗುವುದಕ್ಕೆ ಸಾಕಶ್ಟು ಸಮಯ ಕಳೆಯುತ್ತದೆ. ಅದಕ್ಕಾಗಿ ನಮ್ಮ ಬಾರತೀಯ ಶಾಲೆಗಳಲ್ಲಿ ಇಂಗ್ಲೀಶಿನ ಲಿಪಿಗಳು ಯಾವ ಯಾವ ದ್ವನಿಗಳನ್ನು ಪ್ರತಿನಿದಿಸುತ್ತವೆ ಎಂಬುದನ್ನೂ ಹೇಳಿಕೊಡಲಾಗುತ್ತದೆ. ಇದರ ನಂತರವೂ ಮಕ್ಕಳಿಗೆ ಇಂಗ್ಲೀಶಿನ ಲಿಪಿ ಒಂದು ಸಮಸ್ಯೆಯಾಗಿ ಮುಂದುವರೆಯುತ್ತದೆ. ಸ್ಪೆಲ್ಲಿಂಗ್ ಎಂಬ ಬೂತವಾಗಿ ಮಕ್ಕಳ ಬದುಕಿನೊಂದಿಗೆ ಅಂಟಿಕೊಂಡುಬಿಡುತ್ತದೆ. ಆದರೆ ಕನ್ನಡದ ಸಂರ‍್ಬದಲ್ಲಿ ಈ ಯಾವುದರ ಅವಶ್ಯಕತೆಯೂ ಇರುವುದಿಲ್ಲ. ಕನ್ನಡದ ಲಿಪಿಗಳನ್ನು ದ್ವನಿಗಳಾಗಿ ಅಂದರೆ ದ್ವನಿಗಳ ಬರಹರೂಪವಾಗಿ ಕಲಿಯುತ್ತದೆ. ವಾಸ್ತವದಲ್ಲಿ ಕನ್ನಡದ ಲಿಪಿಗಳೂ ಕೂಡ ಬಳಕೆಕನ್ನಡದ ವಿವಿದ ದ್ವನಿಗಳನ್ನು ಪ್ರತಿನಿದಿಸುತ್ತವೆ. ಇದನ್ನು ಇಲ್ಲಿ ಚರ‍್ಚೆಗೆ ತೆಗೆದುಕೊಳ್ಳುವುದು ಅಶ್ಟು ಅವಶ್ಯಕವಿಲ್ಲ, ಬೇರೆಡೆ ಚರ‍್ಚಿಸಬಹುದು. ಇಂಗ್ಲೀಶಿನ ಲಿಪಿಗಳ ಕಲಿಕೆ ಸಮಸ್ಯೆ ಇಲ್ಲಿಗೆ ನಿಲ್ಲುವುದಿಲ್ಲ. ಇಂಗ್ಲೀಶಿನ ಲಿಪಿ ವ್ಯವಸ್ತೆಗೂ ಕನ್ನಡದ ಕಾಗುಣಿತ ವ್ಯವಸ್ತೆಗೂ ಯಾವುದೆ ರೀತಿಯ ಸಂಬಂದ ಇಲ್ಲ. ಕನ್ನಡದ ಲಿಪಿ ವ್ಯವಸ್ತೆ ಅಕ್ಶರಾತ್ಮಕ ಮತ್ತು ಇಂಗ್ಲೀಶಿನ ಲಿಪಿವ್ಯವಸ್ತೆ ದ್ವನ್ಯಾತ್ಮಕ. ಅದಕ್ಕಾಗಿ ಕನ್ನಡದಾಗ ಕಾಗುಣಿತಗಳನ್ನು ಬರೆಯಲು ಸಾದ್ಯ ಮತ್ತು ಅವನ್ನು ಹೇಳಿಕೊಡುವುದು ಅವಶ್ಯ. ಕರ‍್ನಾಟಕದ ಹಲವು ಕಡೆ ಪ್ರಾತಮಿಕ ಶಾಲೆಗಳು ಇಂಗ್ಲೀಶಿಗೆ ಹೀಗೆ ಕನ್ನಡ ಮಾದರಿಯ ಕಾಗುಣಿತಗಳನ್ನು ಅಂದರೆ ಕ, ಕಾ, ಕಿ, ಕೀ ಮೊದಲಾದವುಗಳನ್ನು ಞಚಿ, ಞಚಿಚಿ, ಞi, ಞii ಎಂದು ಕಲಿಸುವ ಪದ್ದತಿಯನ್ನು ಬೆಳೆಸಿಕೊಂಡಿರುವುದನ್ನು ಬಹುಶಾ ಎಲ್ಲರೂ ಬಲ್ಲರು. ಈ ರೀತಿಯಲ್ಲಿ ಕಲಿಸುವುದರಿಂದ ಯಾವುದೆ ಲಾಬಗಳು ಇಲ್ಲ ಎಂಬುದು ವಾಸ್ತವ.

ಇದರ ಮುಂದುವರಿಕೆಯನ್ನು ಪದಗಳನ್ನು ಕಟ್ಟುವುದನ್ನು ಕಲಿಯುವಾಗ ಗಮನಿಸಬಹುದು. ಪದಗಳನ್ನು ಹೇಳುವಾಗ ಸಹಜವಾಗಿ ಮಕ್ಕಳು ತಮ್ಮ ಸಾಮಾಜಿಕ ಹಿನ್ನೆಲೆಯನ್ನು ಬಳಸಿಕೊಳ್ಳುತ್ತವೆ. ಸಮಾಜದಲ್ಲಿ ಇರುವವುಗಳನ್ನು ಪರಿಬಾವಿಸಿಕೊಳ್ಳುತ್ತವೆ. ಅ-ಅರಸ, ಆ-ಆನೆ ಎಂದು ಹೇಳಿಕೊಡುವಾಗ ಅರಸ ಎಂಬುದು, ಆನೆ ಎಂಬುದು ಮಕ್ಕಳಿಗೆ ಅವರ ಅದುವರೆಗಿನ ಬದುಕಿನ ಬಾಗದಲ್ಲಿ ಮಕ್ಕಳ ಅರಿವಿನ ಹರಹಿನೊಳಗೆ ಸೇರಿಕೊಂಡಿರುತ್ತವೆ. ಅಂದರೆ ಮಕ್ಕಳು ಅರಸ ಎಂಬ ಪರಿಕಲ್ಪನೆಯನ್ನು ತಿಳಿದುಕೊಂಡಿರುತ್ತವೆ. ಹಾಗಾಗಿ ಅರಸ ಎಂದರೇನು ಎಂದು ಕಲಿಯಬೇಕಾದ ಅವಶ್ಯಕತೆ ಇರುವುದಿಲ್ಲ ಮತ್ತು ತಮ್ಮ ಈ ಕಲಿಕೆಯನ್ನು ಪುಸ್ತಕದಲ್ಲಿ ಒದಗಿಸುವ ಚಿತ್ರದೊಂದಿಗೆ ಹೋಲಿಸಿ ನೆನಪಿನಲ್ಲಿ ಇಟ್ಟುಕೊಳ್ಳಬೇಕಾದ ಅವಶ್ಯಕತೆ ಇರುವುದಿಲ್ಲ. ಬದಲಿಗೆ ಚಿತ್ರವೊಂದನ್ನು ಒದಗಿಸುತ್ತಿದ್ದಂತೆಯೆ ಆ ಪದವನ್ನು ಮಕ್ಕಳು ಕೊಡುವ ಸ್ತಿತಿಯಲ್ಲಿ ಇರುತ್ತಾರೆ. ಹಾಗಾಗಿ ಶಿಕ್ಶಕರಿಗೆ ಇದು ಕಲಿಸುವ ಪ್ರಕ್ರಿಯೆಯಲ್ಲಿ ಒಂದು ನೆಗೆತ. ಮಕ್ಕಳು ದ್ವನಿಗಳ ಹೊಂದಿಕೆಯ ಕಡೆಗೆ ಗಮನ ಹರಿಸಬಹುದು. ಅಲ್ಲದೆ ಈ ಪದದಲ್ಲಿ ಬಳಕೆಯಾಗುವ ದ್ವನಿ ಮತ್ತು ಆ ದ್ವನಿಗಳ ಲಿಪಿರೂಪಗಳ ನಡುವಿನ ನಂಟನ್ನು ಮಕ್ಕಳು ಹಿಡಿದುಕೊಂಡಿರುತ್ತಾರೆ. ಈ ಹಿಡಿತ ಒಂದುವೇಳೆ ಮಕ್ಕಳಲ್ಲಿ ಇನ್ನೂ ಸಾದ್ಯವಾಗಿಲ್ಲದ ಸ್ತಿತಿ ಇದ್ದಾಗಲೂ ಈ ಪದಗಳನ್ನು ಕಲಿಸುವುದಕ್ಕೆ ಬಹುದೊಡ್ಡ ಸಮಸ್ಯೆ ಏನೂ ಆಗಲಿಕ್ಕಿಲ್ಲ. ಆದರೆ ಇಂಗ್ಲೀಶಿನ ಸಂದರ‍್ಬದಲ್ಲಿ ಇದು ಇಶ್ಟು ಸರಳವಿಲ್ಲ. ಇನ್ನೂ ಮುಂದುವರೆದು ಕನ್ನಡ ದ್ವನಿಗಳ ಕನ್ನಡ ಲಿಪಿಗಳನ್ನು ಕಲಿಸಿದ ನಂತರ ಈ ಲಿಪಿರೂಪಗಳ ಹೊಂದಿಕೆ ನಿಯಮಗಳನ್ನು ಕನ್ನಡ ಮ್ಕಕಳಿಗೆ ಕಲಿಸಬೇಕಾದ ಅನಿವರ‍್ಯತೆಯೂ ಇರುವುದಿಲ್ಲ. ಸಹಜವಾಗಿ ಅದಾಗಲೆ ಮಕ್ಕಳು ತಮ್ಮ ದಿನಜೀವನದಲ್ಲಿ ಆ ದ್ವನಿಗಳನ್ನು ಹೊಂದಿಸುವ ಕ್ರಮವನ್ನು ತಿಳಿದುಕೊಂಡಿರುತ್ತಾರೆ.

ಹಾಗಾಗಿ ದ್ವನಿ ಮತ್ತು ಲಿಪಿಗಳ ನಡುವಿನ ನಂಟು ತಿಳಿದುಕೊಂಡರೆ ಪದಗಳನ್ನು ಕಲಿಸುವುದು ಹೆಚ್ಚು ಸಹಜವಾಗುತ್ತದೆ. ಹಾಗೆ ನೋಡಿದರೆ ಕಾಗುಣಿತಗಳನ್ನು ಕಲಿಸುವುದು ಅಂದರೆ ನೆನಪಿನಲ್ಲಿ ಇಟ್ಟುಕೊಳ್ಳುವಂತೆ ಮಾಡುವುದು ಅಸಾದ್ಯ. ಕೇವಲ ಇಪ್ಪತ್ತಾರು ಲಿಪಿಗಳನ್ನು ಇಂಗ್ಲೀಶಿನಲ್ಲಿ ಕಲಿಸುವುದು ಕಶ್ಟವಾದರೆ ಕನ್ನಡದ ಸಾವಿರಾರು ಕಾಗುಣಿತಗಳನ್ನು ಕಲಿಸುವುದು ಇನ್ನೆಶ್ಟು ಸಮಸ್ಯೆಯಾಗಬಹುದು? ಆದರೆ ಹಾಗೆ ವಾಸ್ತವದಲ್ಲಿ ಆಗುವುದಿಲ್ಲ ನೋಡಿ. ಕನ್ನಡದ ಅಶ್ಟು ಲಿಪಿಗಳನ್ನೂ ಕಲಿಸುವುದಕ್ಕೆ ಆಗುವ ಶ್ರಮಕ್ಕಿಂತ ಹೆಚ್ಚು ಇಂಗ್ಲೀಶಿನ ಇಪ್ಪತ್ತಾರು ಲಿಪಿಗಳನ್ನು ಕಲಿಸುವಾಗ ಆಗುತ್ತದೆ. ಈ ಶ್ರಮ ಮಕ್ಕಳಿಗೆ ಅದರಂತೆ ಕಲಿಸುವ ಶಿಕ್ಶಕರಿಗೂ ಕೂಡ. ಇಂಗ್ಲೀಶಿನ ದ್ವನಿ ಮತ್ತು ಲಿಪಿಗಳ ನಡುವಿನ ನಂಟು ಮಕ್ಕಳಲ್ಲಿ ಅಶ್ಟು ಸಹಜವಾಗಿ ಊರಿಕೊಂಡಿರುವುದಿಲ್ಲ/ಊರಿಕೊಳ್ಳುವುದಿಲ್ಲ. ಇಂಗ್ಲೀಶಿನ ಪದದ ಪರಿಚಯ ಇರುವುದಿಲ್ಲ. ನೋಡಿ, ಎಲ್ಲವೂ ಅಪರಿಚಿತ. ದ್ವನಿ, ಲಿಪಿ, ದ್ವನಿ-ಲಿಪಿಗಳ ನಡುವಿನ ನಂಟು, ಈಗ ಎರಡನೆಯ ಹಂತದಲ್ಲಿ ಪದ, ದ್ವನಿಗಳ ಹೊಂದಿಕೆ ನಿಯಮಗಳು, ದ್ವನಿ-ಲಿಪಿ-ಪದ ಹೊಂದಿಕೆ ನಡುವಿನ ನಂಟು ಇವೆಲ್ಲವೂ ಗೊತ್ತಿಲ್ಲದವು.

ಗಮನಿಸಿ, ಮಕ್ಕಳು ಎಶ್ಟೆಲ್ಲವನ್ನೂ ಇಲ್ಲಿ ಕಲಿಯಬೇಕಾಗುತ್ತದೆ. ಇದರ ನಂತರ ಬರುವ ಸಮಸ್ಯೆ ಹೀಗೆ ದ್ವನಿ-ಲಿಪಿಗಳ ಹೊಂದಾಣಿಕೆಯಿಂದ ಕಲಿಯುವ ಪದ ತಾಯ್ಮಾತಿನದಾಗಿದ್ದರೆ ಅದನ್ನು ಮಕ್ಕಳು ಬೇಗ ಹಿಡಿದುಕೊಳ್ಳುತ್ತಾರೆ. ಒಂದು ಪದ ಕಲಿಯುವುದು ಎಂದರೆ ಅದರ ಬರವಣಿಗೆ ರೂಪವನ್ನು ಕಲಿಯುವುದು ಅಲ್ಲ. ಪ್ರತಿಯೊಂದು ಪದವೂ ಒಂದು ಪರಿಕಲ್ಪನೆ. ಆ ಪರಿಕಲ್ಪನೆಯನ್ನು ಮಕ್ಕಳು ಪಡೆದುಕೊಳ್ಳಬೇಕಾಗುತ್ತದೆ. ತಾಯ್ಮಾತಿನ ಪದಗಳ ಪರಿಕಲ್ಪನೆ ಮಕ್ಕಳಿಗೆ ಇರುತ್ತದೆ. ಹೊಸ ಪದಗಳನ್ನು ಕೊಟ್ಟಾಗಲೂ ಆ ಪದದ ಪರಿಕಲ್ಪನೆಯನ್ನು ಹಿಡಿಯುವುದಕ್ಕೆ ಮಕ್ಕಳಿಗೆ ಹೆಚ್ಚು ಕಶ್ಟವಾಗುವುದಿಲ್ಲ. ಮಕ್ಕಳ ಸಾಮಾಜಿಕತೆಯ ಪರಿಚಯದ ಬಲದಿಂದ ಈ ಪದಗಳ ಪರಿಕಲ್ಪನೆಯನ್ನು ಅವು ಬೇಗ ಹಿಡಿದುಕೊಳ್ಳುತ್ತವೆ. ಆದರೆ ಇಂಗ್ಲೀಶಿನ ಸಂದರ‍್ಬದಲ್ಲಿ ಹಾಗೆ ಆಗುವುದಿಲ್ಲ. ಅರಸ ಎಂಬ ಪದಕ್ಕೆ ಇಂಗ್ಲೀಶ್ ಮಾದ್ಯಮ ಶಿಕ್ಶಣದಲ್ಲಿ ಕಿಂಗ್ ಎಂಬ ಪದವನ್ನು ಕೊಟ್ಟಾಗ ಈ ಮೇಲೆ ಮಾತನಾಡಿದ ಒಂದು ಪದ ಕಲಿಯುವುದಕ್ಕೆ ಬೇಕಾದ ಎಲ್ಲವನ್ನೂ ಮಗು ಪಡೆದುಕೊಂಡಿರುವ ಸ್ತಿತಿಯಲ್ಲಿ ಇರಬೇಕು. ಆದರೆ ಅದು ಆಗುವುದಿಲ್ಲ. ಕನ್ನಡದಲ್ಲಿಯೂ ಅರಸ ಎಂಬುದಕ್ಕೆ ಬಿನ್ನ ಪದಗಳಿವೆ. ಯಾವುದೆ ಬಾಶೆಯಲ್ಲಿ ಹೀಗೆ ಬಿನ್ನ ಪದಗಳಿರುವುದು ಸಾದ್ಯ. ಇಲ್ಲಿ ಮ್ಕಕಳು ಅರಸ ಎನ್ನುವ ಪದದ ಬದಲು ರಾಜ ಎನ್ನುವ ಇನ್ನೊಂದು ಪದ ಕೊಡಬಹುದು. ಆದರೆ ಮಕ್ಕಳಲ್ಲಿ ಆ ಪದದ ಪರಿಕಲ್ಪನೆ ನೆಲೆಗೊಂಡಿರುವ ಕಾರಣ, ದ್ವನಿ-ಲಿಪಿ ಅವುಗಳ ನಂಟು, ದ್ವನಿಹೊಂದಿಕೆ ನಿಯಮಗಳು ಈ ಮೊದಲಾದವು ಮಕ್ಕಳಲ್ಲಿ ಸಹಜವಾಗಿ ಬೆಳೆಯುವುದರಿಂದಾಗಿ ಇದೊಂದು ಸಮಸ್ಯೆ ಅಲ್ಲ. ಹೀಗಾಗಿ ಅರಸ ಪದ ಕಲಿಕೆ ಆಗುತ್ತದೆ. ಆದರೆ ಕಿಂಗ್ ಪದ ನೆನಪಿನಲ್ಲಿ ಇಟ್ಟುಕೊಂಡಿರಬೇಕಾಗುತ್ತದೆ. ಅದು ಮಗುವಿನ ಪ್ರಾಗ್ನಿಕ ಆಳಕ್ಕೆ ಇಳಿಯುವುದು ಸುಲಬವಲ್ಲ. ಇಲ್ಲಿ ಅರಸ, ರಾಜ, ಕಿಂಗ್ ಎಂಬ ಪದಗಳನ್ನು ಸರಳವಾಗಿ ಪರ‍್ಯಾಯ ರೂಪಗಳಂತೆ ಕಲಿಸಬಹುದಲ್ಲ ಎಂಬ ವಾದ ತರಬಹುದು.

ಒಂದು ಬಾಶೆಯ ಪ್ರತಿಯೊಂದು ಪದವೂ ಆ ಬಾಶೆಯ ಸಾಂಸ್ಕೃತಿಕ ಹಿನ್ನೆಲೆಯನ್ನು ಒಳಗೊಂಡಿರುವುದರಿಂದ ಅದು ಅಶ್ಟು ಸರಳ ಆಗುವುದಿಲ್ಲ. ಒಂದು ಪದವನ್ನು ಕಲಿಯುವುದು ಎಂದರೆ ಸಂಸ್ಕೃತಿಯನ್ನು ಕಲಿಯುವುದು ಎಂದೆ ಅರ‍್ತ. ಅರಿತ ಸಂಸ್ಕೃತಿಯ ಪದಗಳನ್ನು ಮಕ್ಕಳಿಗೆ ಕಲಿಸುವಾಗ ಇಡಿಯಾಗಿ ಮಗುವಿನ ಹಿನ್ನೆಲೆ ಪೂರಕವಾಗಿ ಇರುತ್ತದೆ. ಇನ್ನೊಂದು ಬಾಶೆಯ ಪದಗಳನ್ನು ಕಲಿಯುವಾಗ ಇನ್ನೊಂದು ಸಂಸ್ಕೃತಿಯನ್ನು ಕಲಿಯುವ ಸ್ತಿತಿಯೊಂದು ನರ‍್ಮಾಣವಾಗುತ್ತದೆ. ಹಾಗಾಗಿ ಇದು ಸುಲಬದ ಸಮಸ್ಯೆ ಅಲ್ಲ.