ವರ್ಷಗಳಾರು

ಜೊತೆ ಹೆಜ್ಜೆಹಾಕಿದ ದಿನಗಳಿಗೆ
ವರ್ಷಗಳಾರು
ನಿನ್ನೆ ಮೊನ್ನೆ ಕೈ ಹಿಡಿದ ನೆನಪುಗಳಿಗೆ
ಮಕ್ಕಳಿಬ್ಬರು.

ವರ್ಷದ ಪ್ರೀತಿಗೆ ಹರ್ಷದ ರೀತಿಗೆ
ಕಳೆಯಿತಾರು.
ಕಾಲದ ಓಟಕ್ಕೆ ದಿನಗಳ ಆಟಕ್ಕೆ
ಉರುಳಿತಾರು.

ಕನಸೋ? ನನಸೋ? ಕನವರಿಕೆಯಲ್ಲೆ
ಕಾಲ ಉರುಳುತ್ತಿದೆ.
ಹಗಲೋ? ಇರುಳೋ? ಎಣಿಕೆಯಲ್ಲೆ
ದಿನ ಹೊರಳುತ್ತಿದೆ.

ಕ್ಷಣ ತಪ್ಪಾದರೂ ಮಾತಿಲ್ಲದ ಮೌನ ಪ್ರತಿಭಟನೆ
ಮಾತಿಗಿಂತ ಹರಿತಾಗಿ ಮೌನದ ಈಟಿ
ಹೇಳುವುದು ತಿದ್ದಿ ನಡೆಯುವ ದಾಟಿ
ಹೆಜ್ಜೆ ಹಾಕಲಿ ಹೇಗೆ ತಪ್ಪುಗಳಿಲ್ಲದೆ ?

ಕಳೆದ ದಿನದಿನವೂ ಹೊಸತಿತ್ತು
ಮನಸಿತ್ತು ಮುನಿಸಿತ್ತು
ಜಾರಿದ ಕ್ಷಣಕ್ಷಣವೂ ಸೊಗಸಿತ್ತು
ಒಲವಿತ್ತು ವರಸೆಯಿತ್ತು.

ಭಿನ್ನ ಹೆಜ್ಜೆ ಸಹಜ ನಡಿಗೆಗೆ
ದಾರಿ ಮಾತ್ರ ಸಾಗುತಲಿರಲಿ
ಅಳು-ನಗುಗಳ ಬೆಸುಗೆಗೆ
ವರ್ಷಗಳುರುಳುತ್ತಿರಲಿ ಪ್ರೀತಿ ಚಿಗುರುತಿರಲಿ

- ಅಂಬರೀಷ ಎಸ್‌.ಪೂಜಾರಿ