ತಿರುವುಗಳು 

ಪುಟ್ಟ ಪಾದಗಳ
ಅಡ್ಡದಿಡ್ಡಿ ಹೆಜ್ಜೆಗಳು ನನ್ನವು
ಗೋಡೆ ಹಿಡಿದು
ಅಪ್ಪನ ಹಿಂದೆ ಹೆಜ್ಜೆ ಸವೆಸುತ್ತಾ
ಆಗಷ್ಟೇ ತೊದಲುವುದ ಕಲಿಯುತ್ತಿದ್ದೆ
ಅಪ್ಪನ ಹೆಗಲು ಪಲ್ಲಕ್ಕಿಯಾಗಿತ್ತು
ತನಗೆ ಕಾಣದ್ದನ್ನೆಲ್ಲ ನನಗೆ ತೋರಿಸುತ್ತಿದ್ದ ಅಪ್ಪಾ..
ನನ್ನ ಬದುಕಿನ ಮೊದಲ ತಿರುವು

ರೊಟ್ಟಿ ಸುಡುವ ವಾಸನೆ ಬರುವಾಗರೆಲ್ಲ
ಅವ್ವನ ಕಣ್ಣಲ್ಲಿ ನೀರು ತುಂಬುತ್ತಿದ್ದವು
ಹೊರಗೆ ಗುಡುಗು ಸಿಡಿಲುಗಳಿದ್ದರೂ
ಅವ್ವನ ಮಡಿಲು ಮಾತ್ರ ಪ್ರಶಾಂತ ಸ್ವರ್ಗವಾಗಿತ್ತು
ಮನೆಯ ದೀಪ ಆರಿದಾಗ
ಅದೇ ಕಣ್ಣುಗಳು ಹೊಳೆಯುತ್ತಿದ್ದವು
ಭಯ ಆವರಿಸುವ ಮುಂಜೆಯೇ
ನಾವುಗಳು ಎಚ್ಚರವಾಗುತ್ತಿದ್ದೆವು
ಹಾಗೆ ಪ್ರತೀ ಬಾರಿ ಭಯ ಹೋಗಲಾಡಿಸುತ್ತಿದ್ದ ಅವ್ವಾ..
ನನ್ನ ಬದುಕಿನ ಎರಡನೇ ತಿರುವು

ತಿನ್ನುವ ಆಸೆಯಿದ್ದರೂ
ಪಾಲಿನ ಆಸೆ ಬಿಟ್ಟು
ತನ್ನ ಬಯಕೆಗಳನ್ನೆಲ್ಲಾ ಹಿಂಗಿಸಿಕೊಳ್ಳುತ್ತಾ..
ಕೋಪದಲ್ಲಿ ಕಿವಿ ಹಿಂಡಿ ಅಧಿಕಾರ ತೋರದೆ
ಹೋಂ ವರ್ಕ್ ಮಾಡಿಕೊಟ್ಟು ಹೊರೆ ಇಳಿಸುತ್ತಿದ್ದ ಅಣ್ಣಾ..
ನನ್ನ ಬದುಕಿನ ಮೂರನೆ ತಿರುವು

ಬುದ್ಧಿ ಬೆಳೆದಂತೆ ಸಿಕ್ಕಿ
ಚಡ್ಡಿ ಎಳೆದು
ತೊಡೆ ಗಿಂಟಿ
ತೂರಿಕೆ ಸೊಪ್ಪು ಸೋಕಿಸಿ
ಬೇಲದ ಮರ ಹತ್ತಿಸಿ
ರೋಜಾ ಪೊದೆಯ ಹಣ್ಣು ತಿನ್ನಿಸಿ
ಕೆರೆಯಲ್ಲಿ ಈಜು ಕಲಿಸಿದ
ಗೆಳೆಯರ ಕುಟುಂಬ
ನನ್ನ ಬದುಕಿನ ನಾಲ್ಕನೇ ತಿರುವು

ಬೆಂಚಿನ ಮೇಲೆ ನಿಲ್ಲಿಸಿ
ಬಸ್ಕಿ ಹೊಡೆಸಿ
ಜೀವನದ ಹುರುಪು ತುಂಬುತ್ತಾ..
ಕೀಟಲೆ ಮಾಡಿದಾಗ
ಒಂಟಿ ಕಾಲಿನಲ್ಲಿ ಮನೆಯವರೆಗೂ ನಡೆಸುತ್ತಿದ್ದ
ಗುರುವೃಂದದವೇ..
ನನ್ನ ಬದುಕಿನ ಐದನೇ ತಿರುವು

ಅಳು ನಗುವಿನ ಮಹತ್ವ ತಿಳಿಸಿ
ನೋವು ನಲಿವಿನ ಅಂತರ ಕಲಿಸಿ
ಜೀವನದ ಏರಿಳಿತಗಳ ದರ್ಶನ ಮಾಡಿಸಿ
ನೂರು ಪಾಠ ಕಲಿಸಿದ
ಖಾಲಿ ಜೇಬು, ಖಾಲಿ ಹೊಟ್ಟೆ
ಖಾಲಿ ಕೈ-ಕಾಲುಗಳು, ಹರಿದ ಬಟ್ಟೆಗಳು
ಚಾವಣಿ ಇಲ್ಲದ ಮನೆ, ಬಿಸಿ ಬೆವರು
ನನ್ನ ಬದುಕಿನ ಆರನೇ ತಿರುವುಗಳು

ಮುಂದೊಂದು ದಿನ ಬರುವ
ಒಲವಿನ ಗೆಳತಿ
ಅವಳಿಂದ ಬರುವ
ಮುದ್ದು ಮಕ್ಕಳು
ನಮ್ಮ ಸುತ್ತ ಮುತ್ತ ಇರುವ
ಕೋಟಿ ಕೋಟಿ ಜೀವ ಜಂತುಗಳು
ವಿಸ್ಮಯಗಳು, ಅಭೂತಪೂರ್ವ ಶಕ್ತಿಗಳು
ಗಿಡಮರಗಳು, ಪ್ರಾಣಿ ಪಕ್ಷಿಗಳು, ಪಂಚಭೂತಗಳು
ನನ್ನ ಗೋರಿ, ಅದರ ಮೇಲಿನ ದೀಪ ಹಾಗೂ
ನೆಚ್ಚಿನ ಪುಸ್ತಕಗಳು
ನನ್ನ ಬದುಕಿನ ಕೊನೆ ತಿರುವುಗಳು

-ಅನಂತ ಕುಣಿಗಲ್