ಸಮವೇನುಂಟು

ಹಬ್ಬವಿದೆನ್ನುತ ಕೊಡಗಿಗೆ ಬಂದೆವು
ಇಬ್ಬನಿ ತಬ್ಬಿತು ವರದಂತೆ
ಕಬ್ಬಿಗನೆದೆಯಲಿ ಚಿಗುರಿತು ಕಾವ್ಯವು
ಕಬ್ಬಿನ ಹಾಲಿನ ಸವಿಯಂತೆ

ಮಡಿಕೇರಿಯ ಚಳಿಗಾಲವ ಸವಿಯಲು
ತಡಬಡಿಸದೆ ನಾವ್ ನಿಂದಿಹೆವು
ಗಡಗಡ ನಡುಗುವ ಚಳಿಯಲು ಸೊಬಗನು
ಕಡೆಗಣಿಸದೆ ನಾವೊಪ್ಪಿದೆವು

ತೆಳ್ಳಗೆ ಬಳುಕುವ ನಲ್ಲೆಯ ಜೊತೆಯಿರೆ
ಝಲ್ಲೆನಿಸಿತು ಮೈ ಮನವನ್ನ
ಗಲ್ಲವ ಹಿಂಡಲು ಕೂಸ ನಿರೀಕ್ಷೆಯು
ಮೆಲ್ಲನೆ ಕೆಣಕಿತು ತನುವನ್ನ

ಸುಂದರ ತಾಣದಿ ಬಂಧುರವಾದವು
ಕುಂದದ ಯೌವ್ವನದುತ್ಸಾಹ
ಸಂದಿದೆ ಬಾಳಲಿ ನೆನಪಿನಲುಳಿಯುವ
ಚೆಂದದ ಪ್ರಕೃತಿಯ ಪ್ರೋತ್ಸಾಹ

ಕುಳಿಗೆನ್ನೆಯ ಬಲು ಸುಂದರ ಪತ್ನಿಯು
ಬಳಿಯಿರೆ ಸ್ವರ್ಗಕೆ ಸುಮ ನಂಟು
ಬೆಳೆಗಳನರಳಿಸಿ ಆಸೆಯ ನೀಗಲು
ಚಳಿಗಾಲದ ಸಮವೇನುಂಟು

- ವೈಲೇಶ್ ಪಿ ಎಸ್ ಕೊಡಗು