ನಾನು ನಿನ್ನನ್ನು ಪ್ರೇಮಿಸುತ್ತೇನೆ
ಕ್ಯಾಂಡಲ್ ಲೈಟಿನ ಮಬ್ಬು ಬೆಳಕಿನಲ್ಲಿ
ಬರೆಯಲ್ಪಡುವ ಪ್ರೇಮಜಾತಕ ನನ್ನದಲ್ಲ
ಬೆಳಕಿಲ್ಲದೆಯೂ ಬೆಳಗುವ ನಿನ್ನ ಕಣ್ಣುಗಳ
ತಿಳಿ ಬೆಳಕಿನಲ್ಲಿ ಅರಳುವ ಪ್ರೀತಿ ನನ್ನದು
ನಾನು ನಿನ್ನನ್ನು ಪ್ರೇಮಿಸುತ್ತೇನೆ
ಎದೆ ನಡುಗಿಸುವ ಸಂಗೀತದ ಆರ್ಭಟದಲ್ಲಿ
ಕತ್ತೆತ್ತಿ ನಿಲ್ಲುವ ಪ್ರೇಮ ನನ್ನದಲ್ಲ
ನಿರ ನಿರ ನೀರವ ಮೌನದಲ್ಲಿ
ಎದೆಬಡಿತದ ಸದ್ದಿಗೆ ಲಯಗೂಡಿಸುವ ಪ್ರೀತಿ ನನ್ನದು
ನಾನು ನಿನ್ನನ್ನು ಪ್ರೇಮಿಸುತ್ತೇನೆ
ತಾಜ್‌ಮಹಲ್ಲಿನ ಎದುರಲ್ಲಿ
ಭುಜಕ್ಕೆ ತಲೆ ಆನಿಸಿ ಕುಳಿತಾಗ
ಹೊಮ್ಮಿಬರುವ ಪ್ರೇಮ ನನ್ನದಲ್ಲ
ಎದೆಗೂಡಿನಲ್ಲಿಯೇ ಪ್ರೇಮಸೌಧ ಕಟ್ಟಿಕೊಂಡು
ನಿನ್ನನ್ನು ಆರಾಧಿಸುವ ಪ್ರೀತಿ ನನ್ನದು
ನಾನು ನಿನ್ನನ್ನು ಪ್ರೇಮಿಸುತ್ತೇನೆ
ವರ್ಷಕ್ಕೆ ಒಂದು ದಿನವನ್ನು ಗೊತ್ತು ಮಾಡಿಕೊಂಡು
ಹೊತ್ತು ನೋಡಿಕೊಂಡು ಕೆರಳಿ ನಿಲ್ಲುವ ಪ್ರೇಮ ನನ್ನದಲ್ಲ
ವರ್ಷವಿಡೀ ನಿನ್ನನ್ನು ಕಾಣದೆಯೂ
ನಿನ್ನ ಲಕ್ಷ ನೆನಪುಗಳಲ್ಲೇ
ಬದುಕುವ ಪ್ರೀತಿ ನನ್ನದು
ವಿಶ್ವನಾಥ ಎನ್ ನೇರಳಕಟ್ಟೆ
ಲೇಖಕ ವಿ.ಎನ್. ನೇರಳಕಟ್ಟೆ ಕಾವ್ಯನಾಮದ ಮೂಲಕ ಕತೆ-ಕಾವ್ಯ ರಚನೆಯಲ್ಲಿ ತೊಡಗಿಸಿಕೊಂಡಿದ್ದು, ದಕ್ಷಿಣ ಕನ್ನಡ ಜಿಲ್ಲೆ ಬಂಟ್ವಾಳ ತಾಲ್ಲೂಕಿನ ಪಂತಡ್ಕದ ವಿಶ್ವನಾಥ್ ಎನ್. ನೇರಳಕಟ್ಟೆ ಅವರು, ‘ಡಾ.ನಾ. ಮೊಗಸಾಲೆಯವರ ಸಾಹಿತ್ಯದಲ್ಲಿ ಪ್ರಾದೇಶಿಕತೆ’ ವಿಷಯದಲ್ಲಿ ಪಿಎಚ್‌ಡಿ ಸಂಶೋಧನೆ ನಡೆಸಿದ್ದಾರೆ. ಪ್ರಸ್ತುತ ಸಿದ್ಧಕಟ್ಟೆಯ ಸರ್ಕಾರಿ ಪದವಿ ಕಾಲೇಜಿನಲ್ಲಿ ಕನ್ನಡ ಉಪನ್ಯಾಸಕರಾಗಿದ್ದಾರೆ. ‘ತುಸು ತಿಳಿದವನ ಪಿಸುಮಾತು’ ಅಂಕಣ ಬರಹ ಬರೆಯುತ್ತಿದ್ದಾರೆ.
ಕೃತಿಗಳು: ಮೊದಲ ತೊದಲು, ಕಪ್ಪು ಬಿಳುಪು (ಕವನ ಸಂಕಲನ), ಹರೆಯದ ಕೆರೆತಗಳು (ಚುಟುಕು ಸಂಕಲನ) ಮತ್ತು ಸಾವಿರದ ಮೇಲೆ (ನಾಟಕ). ಇವರಿಗೆ ಪುಟ್ಟಣ್ಣ ಕುಲಾಲ್‌ ಯುವ ಕತೆಗಾರ ಪುರಸ್ಕಾರ’, ‘ಯೆನಪೋಯ ಎಕ್ಸಲೆನ್ಸಿ ಪ್ರಶಸ್ತಿ ಹಾಗೂ ಚಂದನ ಸಾಹಿತ್ಯ ವೇದಿಕೆ ನೀಡುವ ಸಾಹಿತ್ಯ ರತ್ನ ಪ್ರಶಸ್ತಿ ಸಂದಿವೆ.
More About Author
Concept & Creation 
©2024 Book Brahma Private Limited.
