ನೆರಿಕೆ 

ಕೊಯ್ದು ಲೆಕ್ಕಿಯ ಸಿವುಡು ತಂದು
ಹಸಿರು ಆರುವ ಮುನ್ನ
ಮಲ್ಲಿಗೆಯಂತೆ ಜೋಡಿಸಿ ಹೆಣೆದು
ತ್ರಿಭುಜಾಕಾರದಲಿ ಬಂಧಿಸಿ
ತಲೆ ಮೈ ಸುತ್ತೆಲ್ಲಾ ಹೊನ್ನರಿಕೆ
ಹುಲ್ಲು, ಬಿಳಿಜೋಳದ ದಂಟು
ಪುಣ್ಯಕ್ಕೊದಗಿದರೆ ಅರ್ಧ ತೆಂಗಿನ ಗರಿ
ಎಲ್ಲವೂ ಹದವಾಗಿ ಕಲೆತು
ಕಲಿತು
ಬಾಗಿ ನಿಂತರೆ
ಅವ್ವನ ಬದುಕ ಜಗುಲಿಯೊಂದು ಮೂಡಿದಂತೆ.

ನೆಲಕೆ ಸಗಣಿಯ ಸಾರಿ
ನೆರಿಕೆಯ ಮೈಗೆ ಈ ಸುಗಂಧವನೆ ಬೀರಿ
ಒಳಗಿಂದ
ಹೊರಗಿಂದ
ಸುತ್ತ ಜಲದ ತಿಳಿವಿನಿಂದ
ನೆರಿಕೆಯ ಮಾತು ನೆರಿಕೆಯಲ್ಲೇ ಕೂಡಿ
ಹಬ್ಬಗಳ ಹೂಡಿ
ದೇವರ ಎಡೆ ಮಕ್ಕಳ ಮಡಿಲು ಸೇರಿ
ಬೆಳೆದು ನಿಂತವು ಫಲ
ಅವ್ವನ ಬಾಳತಪಸ್ಸಿನ ನೆಲ.

ಮುಳ್ಳಿಲ್ಲದ
ನಂಜಿಲ್ಲದ
ಅವ್ವನ ಆ ನೆರಿಕೆ ಈಗ
ಒಂದು ಕನಸು
ಚಿಮಣಿಯ ದೀಪ ಕುಡಿದ ಆ ಕನಸಿನ ಮಗ
ನಾನಾದುದೇ ಒಂದು ಸೊಗಸು.

ಚಿಮಣಿ ಎಂದರೆ ಅವ್ವ
ಅವ್ವನೆಂದರೆ ಚಿಮಣಿ

ಮೊನ್ನೆ ನನ್ನವಳು ತನ್ನ ಸೀರೆಯ ನಿರಿಗೆ ತೀಡುವಾಗ
ಅವ್ವನ ನೆರಿಕೆ ನೆನಪಾಯ್ತು
ಚಿಮಣೀ…!
ನನ್ನವಳು ಮುಡಿಸುವ ನಿತ್ಯದ
ದೇವರ ದೀಪವೇ ಎಂದೆನ್ನಿಸಿತು

ಚಿತ್ರ: ಎಸ್‌. ವಿ. ಹೂಗಾರ್‌

* ನೆರಿಕೆ - ಲೆಕ್ಕಿಯ ನೆರಿಕೆ ಮನೆ: ಬಯಲು ಸೀಮೆಯಲ್ಲಿ ಗುಂಪು ಗುಂಪಾಗಿ ಬೆಳೆಯುವ ಲೆಕ್ಕಿ ಗಿಡವನ್ನು ಕೋಯ್ದು ತಂದು, ತ್ರಿಭುಜಾಕಾರದಲ್ಲಿ ಜೋಡಿಸಿ ಬಟ್ಟೆ ನೇಯ್ದಂತೆ ಹುರಿಯಿಂದ ಬಿಗಿದು ಅದಕ್ಕೆ ಸೆಗಣಿ, ಕೆಮ್ಮಣ್ಣು, ಬಿಳಿ ಸುಣ್ಣವನ್ನು ಬಳಿದರೆ ಲೆಕ್ಕಿಯ ನೆರಿಕೆ ಮನೆ ಸಿದ್ಧ. ಹಳ್ಳಿಗಳಲ್ಲಿ ಸ್ನಾನದ ಬಚ್ಚಲುಗೆ ‘ಲೆಕ್ಕಿಯ ನೆರಿಕೆ’ಯನ್ನೂ ಹಲವರು ಈಗಲೂ ಕಟ್ಟಿರುತ್ತಾರೆ*