ನಡೀತಿದೆ ಬಿಸಿನೆಸ್

"ಪ್ರೀತಿಯೆನ್ನುವುದು ಕಥೆಯೋ?
ಕವಿತೆಯೋ?"
ತನ್ನ ಪುಸ್ತಕದಂಗಡಿಯಲಿ
ಒರೆಸುತ ಪುಟಗಳಿಗಂಟಿದ ಧೂಳ ಬರಿಗೈಯಲಿ
ಕೇಳುವಾಗವನು ಅವಳ ಪುರುಸೊತ್ತಿನಲಿ,
ಕಾತುರವೇನಿಲ್ಲ ಅವನ ಕಣ್ಣಲಿ!

"ಯಾವುದಾದರೂ ವ್ಯತ್ಯಾಸವೇನಿಲ್ಲ,
ಎರಡರಲ್ಲೂ ಯಾರಿಗೂ ಪ್ರೀತಿಯಿಲ್ಲ!"
ಅವಳ ಬೆರಳ ಸಂದಿಯ ನಿಗಿ ನಿಗಿ ಸಿಗರೇಟ್
ಉರಿದುಳಿದ ತುಂಡುಗಳಲ್ಲಿ
ಹುದುಗಿಸಿ ತಲೆ ಅಸು ನೀಗುತ್ತದೆ.

ಮೂಲೆಯಲ್ಲಿದ್ದ ಕಸದ ಡಬ್ಬಿಗೆ
ಕುಳಿತಲ್ಲಿಂದಲೇಗುರಿಯಿಟ್ಟ ಪರಿಗೆ
ಅವಳ ಕೈಲಿದ್ದ ತುಟಿ ಬಿಗಿದ ಪೇಪರು ಕಪ್ಪಿಗೆ
ಇನ್ನೂ ಕೊನೆ ಗುಟುಕಿನ ಸವಿ ಸಣ್ಣಗೆ

ಅವನು ಬೆಪ್ಪಾಗಿ ನೋಡುತ್ತಾನೆ
ಸಿನಿಕತೆ, ಬೈದುಕೊಳ್ಳುತ್ತಾನೆ.
ತನ್ನೊಬ್ಬಳೇ ಗಿರಾಕಿ,
ಅವಳೂ ಲೇಖಕಿ!

"ನಾನೂ, ನೀನೂ
ಗುಡ್ಡೆ ಮಾಡಿದ ತರಗೆಲೆಗಳಂತೆ
ಬಿಡಿ ಬಿಡಿ ಪದಗಳು.
ಎಂದೂ, ಏನನ್ನೂ ಓದದವರಷ್ಟೇ
ನಮ್ಮನ್ನು ಜೋಡಿಸಬಹುದು.

ಪ್ರೀತಿ
ಮೌನಿಯಾದ ಹೃದಯದ ಹಾಡಿಗೆ
ಶ್ರೋತೃವನ್ನು ಹುಡುಕುವುದು, ಇಲ್ಲವೇ
ಶ್ರೋತೃವಾಗುವುದು."

ಅವಳ ಮಾತಿಗೆ ಅವನು ಮುಗುಳು ನಕ್ಕನೆಂದರೆ
ಮತ್ತೊಂದು ಕಪ್ ಚಹಾ ಬಂತು ಎಂತಲೇ.

ಅವಳು ಮಾತು ಬದಲಿಸುತ್ತಾಳೆ
"ಹೇಗೆ ನಡೀತಿದೆ ಬಿಸಿನೆಸ್?"

"ಹೂಂ ನಡೀತಿದೆ ಬಿಸಿನೆಸ್"
ಅವಳು ನಕ್ಕು
ಮತ್ತೊಂದು ಸಿಗರೇಟಿಗೆ ಉಸಿರು ಕೊಡುತ್ತಾಳೆ.

-ಪೂರ್ಣಿಮಾ ಮಾಳಗಿಮನಿ