ಮೂಕ ಸಾಕ್ಷಿ

ಒಂದು ದ್ವಂಸ ಇನ್ನೊಂದು ವಿದ್ವಂಸ
ಒಂದು ನಾಶ ಇನ್ನೊಂದು ವಿನಾಶ
ಬಣ್ಣ ಹಸಿರೋ ಕೇಸರಿಯೋ
ಇನ್ನಾವುದೋ...
ಮುಗಿಲೆತ್ತರಕ್ಕೆ ಚಿಮ್ಮಿದ್ದು ಮಾತ್ರ
ಮನುಷ್ಯ ರಕ್ತ ದೇಹರೂಪದಲ್ಲಿ
ಕಗ್ಗೊಲೆಯಾಗಿದ್ದು ಮಾನವೀಯತೆ
ಅನಾಥವಾಗಿ ರಕ್ತದಲಿ ಬಿದ್ದು ಬಿಕ್ಕಳಿಸಿದ್ದು
ಹಣ್ಣು ಹೂವು ಪೆನ್ಸಿಲ್ಲು ಅಳತೆ ಟೇಪು
ಮತ್ತು ಅಮಾಯಕ ಸುಂದರ ಕಾಗದ
ವಿಲವಿಲ ಒದ್ದಾಡಿ ಸತ್ತಿದ್ದು
ಶ್ರಮ ಜೀವಿಯ ಬೆವರ ಹನಿಗಳು
ಬೀದಿಪಾಲಾಗಿದ್ದು ಅವಲಂಬಿತರ
ಗರೀಬ ಮನಸ್ಸುಗಳ ಕಣ್ಣೀರು
ಮಣ್ಣುಪಾಲಾದ ಅನಾಥರ ಬದುಕು
ಹೀಗೆ ಪ್ರತಿನಿತ್ಯ ಪ್ರತಿಕ್ಷಣ
ಬಡವರ ಕತ್ತು ಕೊಯ್ಯುವ
ಕಣ್ಣು ಕೀಳುವ ರೊಟ್ಟಿ ಕಸಿದು
ಧರೆಯಲ್ಲಿ ಕೈಲಾಸ ಕಟ್ಟುವ
ರಕ್ತ ಸಮುದ್ರದಾಚೆಯ ಸ್ವರ್ಗ
ಸುಖಕೆ ಹಪಹಪಿಸುವ ಧರ್ಮಾಂದರ
ಕಚ್ಚಾ ಕನಸಿನ ಸರಕನ್ನೆ ಅಫೀಮವಾಗಿಸಿ
ಸಮಾಜಕೆ ವಿಷ ಹಂಚುವ ಯಂತ್ರಗಳನು
ಹಗಲಿರುಳು ಕಣ್ಣಿಗೆ ಎಣ್ಣೆ ಬಿಟ್ಕೊಂಡು
ಕಾಯುವ ಸರ್ಪಗಾವಲು,
ಕಳ್ಳ ಪೋಲಿಸ್ ಆಟಕೆ
ಮೂಕ ಸಾಕ್ಷಿಯಾಗುವ
ಸಮತೂಕದ ಕುರುಡು ತಕ್ಕಡಿ !