ಮಾನವೀಯತೆಯ ಮರುಹುಟ್ಟು

ಹಾದಿಯಲ್ಲಿ ಕಾಲು
ಇಟ್ಟಾಗೆಲ್ಲ ಆಕಸ್ಮಿಕವಾಗಿ
ಚುಚ್ಚುವ ಮುಳ್ಳುಗಳು
ಈಗೀಗ ವೇದನೆಯಾಗುವುದಿಲ್ಲ ||

ನಿತ್ಯಶಿಕ್ಷೆಯ ಬಿಸಿ ತಾಕುವ
ಖಾಲಿ ನಯನಗಳಿಗೆ
ನೋವು, ಆನಂದದ ವ್ಯತ್ಯಾಸ
ತಿಳಿಯುವುದಾದರೂ ಹೇಗೆ?

ನಮ್ಮೂರಿನ ಹಾದಿಗಳು ಸೌಹಾರ್ದತೆಯ
ಹಸಿರ ನೋಡಿ ದಶಕವೇ ಕಳೆದಿದೆ
ಈಗ ಅಲ್ಲಿ ಕೇಳುವ ಕರ್ಕಶ ಧ್ವನಿ
ಧರ್ಮಗಳ ಚಿಹ್ನೆಗಳಿಗೆ ಬೇಸರವಿಲ್ಲಿ ||

ಜಾಲಿಮರದ ಕೆಳಗೆ ಕುಳಿತು
ನೆರಳಿಲ್ಲದೆ ಬಿಸಿಲಿಗೆ ಒಣಗಿ
ಮುಳ್ಳುಗಳ ನೋವು ಪಡೆಯುವುದೇ
ಮಿಗಿಲು ಸೌಹಾರ್ದತೆ ಇಲ್ಲದ ಹಾದಿಯಲ್ಲಿ ||

ಮಾನವೀಯತೆ ಮರುಹುಟ್ಟಾಗಬೇಕಿದೆ
ಬಡ ತಾಯಂದಿರ ಮಡಿಲು
ಖಾಲಿಯಾಗುತ್ತಿದೆ ಹಾದಿ
ಉದ್ದಕ್ಕೂ ನಿಸ್ವಾರ್ಥಿಗಳಾಗೋಣ!

ಮೊಹಮ್ಮದ್ ಅಜರುದ್ದೀನ್