♀ ಕುಸ್ತಿಪಟುವಿನ ಸ್ವಗತ

ಗೆಳತಿ,
ಈ ಭವ್ಯ ಭಾರತದ
ಪವಿತ್ರ ಮಣ್ಣಲಿ
ಉರುಳಾಡಿ ಹೊರಳಾಡಿ
ಬದುಕನ್ನು ಬೇಯಿ
ಅರಳಿದ್ದೇನೆ;
ಸೋತು ಸೊರಗಿದ್ದೇನೆ;
ಗೆದ್ದು ಬಾಗಿದ್ದೇನೆ.

ಅದೆಷ್ಟೋ ಕುಸ್ತಿಕಲಿಗಳ ವಿರುದ್ಧ
ತೊಡೆತಟ್ಟಿ ನಿಂತಿದ್ದೇನೆ;
ಮುಷ್ಟಿಗೆ ಮುಷ್ಟಿ ಹಿಡಿದು
ಪಟ್ಟು ಹಾಕಿ
ಪಟ್ಟ ಏರಿದ್ದೇನೆ.

ಈ ನೆಲದ
ಕೀರ್ತಿಪತಾಕೆ ಹಾರಾಡುವಾಗ
ಎಲ್ಲರ ಎದೆಮಿಡಿತ
ಆಲಿಸಿದ್ದೇನೆ;
ಹಾರೈಕೆಯ ಹಾರವನು
ಎದೆಗಪ್ಪಿ ನಮಿಸಿದ್ದೇನೆ.

ಗೆಳತಿ,
ಆ ಕುಸ್ತಿ ಅಖಾಡದಲಿ
ಮಣ್ಣು ಮುಕ್ಕಿಸುವುದು ಸುಲಭ!
ಬದುಕಿನ ಅಖಾಡದಲಿ?
ಕಾಮುಕ ಕೈಗಳ ಕಾರೆಮುಳ್ಳು
ಸವರಿ ಸವರಿ ಚುಚ್ಚಿದರೂ;
‘ಹೆಣ್ತನ’ ಇನ್ನೂ ನೆಲಕ್ಕೆ ಅಪ್ಪಳಿಸಿಲ್ಲ!

ಈಗ,
ಬದುಕು-ಭವಿಷ್ಯ-ಹೆಸರನ್ನು
ಬೀದೀಲಿ ಇಟ್ಟು;
‘ಆತ್ಮಗೌರವ’ಕ್ಕಾಗಿ ತೊಡೆ ತಟ್ಟಿದ್ದೇನೆ.
‘ಬೇಟಿ ಬಚಾವೋ - ಮನ್ ಕಿ ಬಾತ್’
ಬರೀ, ಮೌತ್ ಕಿ ಮಾತಾದರೂ;
ನನ್ನೀ ಮನದ ದನಿಗೆ ಮಲಗುವ ಮಾತೇ ಇಲ್ಲ.

ಆ ಕಡೆ ಅಧಿಕಾರದ ಅಮಲಿನ ಪಟ್ಟು
ಸತ್ಯವನ್ನು ಬಂಧಿಸಿಟ್ಟರೂ;
ನನ್ನ ಹೋರಾಟ
ಒಳಗೂ ಹೊರಗೂ
ಹೊರಹೊರಗೂ; ಕೊನೆವರೆಗೂ...

- ಗಿರೀಶ್ ಮೂಗ್ತಿಹಳ್ಳಿ