ಕನಕದಾಸರು

ಕುರಿಯಮಂದೆ ದನದಹಿಂಡು ಮೇವನುಂಡು ಹಾಲುಕರೆದವು
ನೋವುಕೊಡದೆ ತಲೆಯಬಾಗಿ ಕೂಡಿಯಾಡಿ ಮುಂದೆ ನಡೆದವು

ಅಡವಿತಿರುಗಿ ಅರಿವುಮಾಗಿ ಕುರುಬನಾದನು
ದನವಕಾಯ್ದು ಎಲ್ಲಬಲ್ಲ ಗೊಲ್ಲನಾದನು
ಕುರಿಯ ಹಿಕ್ಕೆಯೊಳಗೆ ಲಿಂಗ ಅಡಗಿ ಕುಳಿತನು
ಕ್ಷೀರಕುಂಭ ಗೋವಿನೊಳಗೆ ಅಮೃತವಾದನು

ಬ್ರಹ್ಮಲಿಖಿತ ಕುರುಬ ತಿಮ್ಮ ದಾಸನಾದನು
ಧರ್ಮ ಬಲ್ಲ ಗೊಲ್ಲಕೃಷ್ಣ ದೇವನಾದನು
ಆರುಮೂರು ಅಳಿದು ಕನಕ ದಾಸನಾದನು
ದೇವದಾಸ ದೈವದಾಸ ವ್ಯಾಸದಾಸನಾದನು

ಕಟ್ಟಕಡೆಯ ಮನುಜನಾದ ಮುಕುಟ ಇಳುವಿದ
ಅರಸನೊಬ್ಬ ತಿರುಕನಾಗಿ ಡೊಂಕು ತಿದ್ದಿದ
ರಾಗಿಭತ್ತ ಮೇಲುಕೀಳು ಸಮಕೆ ಕೂಗಿದ
ಕೊಂಕು ತಿವಿತ ಕೀರ್ತನೆಗಳ ಧ್ವನಿಯನೆತ್ತಿದ

ಬಾಡರಾಜ್ಯ ಬೇಡವೆಂದು ಹೊರಟು ಬಂದನು
ಕಾಗಿನೆಲ್ಲಿ ನೆಲೆಯನಾಯ್ದು ಒಲಿದು ನಿಂದನು
ತಿಮ್ಮಗೊಂದು ಕುಮ್ಮೂರಲಿ ಗುಡಿಯ ಕಟ್ಟಿದ
ಹಂಸಪಕ್ಷಿ ರಾಜರಾಣಿ ನಳಕಾವ್ಯ ಹಾಡಿದ

ಬಿದ್ದ ಜನರು ಎದ್ದು ಬರಲು ಕೈಯ ಹಿಡಿದನು
ವೇದಶಾಸ್ತ್ರ ತತ್ವ ತರ್ಕ ಸೋಸಿ ನುಡಿದನು
ಕೆಣಕಿದವಗೆ ತಿಣುಕುವಂತ ಮರ್ಮಘಾತವು
ಅಳಿದಮೇಲು ಉಳಿದಜನಕೆ ಇವನ ಶಂಖವು

-ಜೀವರಾಜ ಹ ಛತ್ರದ