ಜೇಡರ ಬಲೆಯ ದಿಗ್ಭಂಧನ

ಅರ್ಧಸುಟ್ಟು ಇನ್ನರ್ಧ ದಿಕ್ಕೆಡಿಯಾದ
ಸಿಗರೇಟಿನ ಚೂರೊಂದು
ಗಾಳಿಗದುರಿ ಮಾತನಾಡುತಿದೆ
ಅದಕ್ಕೇನೋ
ಸುಟ್ಟು ಕಾಲಲಿ ತಿಕ್ಕಿದವನ
ಚರಿತ್ರೆ ಸಾರುವ ಆಸೆಯಂತೆ
ಈಗೀಗ ಹೊಸಕುವದು ನವ್ಯಯುಗದ
ಪ್ಯಾಷೆನ್ ಆಗಿದೆ

ಈಗೀಗ ಅಲ್ಲ ಬಿಡಿ,
ಹರಪ್ಪ-ಮಹೆಂಜೋದಾರೋದಿಂದಲೂ
ಚರಿತ್ರೆ ಸಾರುವ
ಇತಿಹಾಸ ಪುಟವನು
ಜೇಡರ ಬಲೆಯು ದಿಗ್ಭಂಧಿಸಿ
ಮೋಜುಗಾಗಿ ಗೇಲಿ ಮಾಡಿದೆ
ಅದಕ್ಕೂ,
ಅಲ್ಪಾಯುಷದ ಶಿಕ್ಷೆ ಜಾರಿಯಾಗಿದೆ....

ಕೀಟ ತಿಂದು ಹರಿದ
ಪುಟದಲ್ಲಿದ್ದವರೆಲ್ಲ
ಮೂಗು,ಕಣ್ಣು,ಕಿವಿ ಕಳೆದುಕೊಂಡವರ
ಅಸ್ಪಷ್ಟವಾದ ವಾಕ್ಯಗಳು,
ಅನತಿ ದೂರದಲಿರುವಂತೆ ವಿಚಿತ್ರ ಕೂಗು
ಪುಟ ಹೊರಳಿಸಿದ ತೋರ್ಬೆರಳಿನ
ತೇವಗೊಂಡ ಕುರುಹು
ಪಳುವಳಿಕೆಯಂತಿರುವ

ಕೊಳೆತ ಸೀರೆಯೊಳಗೊಂದಿಷ್ಟು
ಸ್ಖಲಿಸಿ ಹೋದವರ ವೀರ್ಯ,
ಹೆಕ್ಕಿ ತೆಗೆದ ಭಯಕ್ಕೆ ಮಣ್ಣು ಎಳೆದು
ಮುಚ್ಚಿಕೊಂಡಿದೆ

ಟಾರುಕಿತ್ತ ರೋಡಿನೊಂದಿಗೆ
ವಾದಕ್ಕಿಳಿಯಬೇಡ,
ಅದನ್ನೂ ಅತ್ಯಾಚಾರಗೈಯಲಾಗಿದೆ

ಹುಡಿ ಧೂಳೆದ್ದ ರೋಡಿನ ತುಂಬ
ಹತ್ಯಗೈದವನ ಬೆವರುಹನಿಗಳ ಚಿತ್ತಾರ...!
ಕಲ್ಲುಬಂಡೆಗೆ ಚಿಮ್ಮಿದ ಹಸಿರಕ್ತದ
ವಾಸನೆಗೆ ಇರುವೆ ಸಾಲುಗಳೇ ಸಾಕ್ಷಿ
ರುಂಡ ಛೇಧಿಸಿ,ಮಣ್ಣು ಮೆತ್ತಿಕೊಂಡು
ತುಕ್ಕು ಹಿಡಿದ ಮುದಿಖಡ್ಗಕ್ಕೂ
ಪ್ರಾಯಶ್ಚಿತ್ತದ ಬಿಕ್ಕಳಿಕೆ....!

ಮೋಡಕ್ಕಿನ್ನು ಪುರಾವೆಗಳನು ಸಲ್ಲಿಸಬೇಡ,
ಅದಕ್ಕೂ ತೇಪೆ ಹಚ್ಚಿ ಗುರುತು ಸಿಗದಂತೆ
ತಿರುಚಲಾಗಿದೆ....