ಬಿಡುಗಡೆಗೊಳಿಸು ಗುರುದೇವ

ನನ್ನನೊಮ್ಮೆ ಬಿಡುಗಡೆಗೊಳಿಸು ಗುರುದೇವ
ತೊಟ್ಟಿಕೊಂಡ ಬಟ್ಟೆ
ನೀರಿಗಿಳಿಯುವ ಮುನ್ನ ಕಳಚುವಂತೆ
ಕೆಟ್ಟುನಿಂತ ಗಡಿಮುಳ್ಳು
ಹೊಸ ಸೇಲ್ ನಿಂದ ಅಂಕಿ ಬಿಟ್ಟು
ಮುಂದೆ ಹೋಗುವಂತೆ
ರಾತ್ರಿಯಲಿ ಬಿಡುಬಿಟ್ಟ ಕನಸುಗಳು
ಬೆಳಕು ಕಂಡು ಹೊರಡುವಂತೆ
ಬಂಧನದಲ್ಲಿದ್ದ ಹಕ್ಕಿಯೊಂದು
ಮುಕ್ತಿ ಪಡೆದು ಬಯಲಿನಡಿಗೆ ಹಾರುವಂತೆ
ಚತುರ್ಮುಖಗಾಳಿಗೆ ಸಿಕ್ಕು ಹುಡಿ ಮಣ್ಣು
ಗಾಳಿಯೊಂದಿಗೆ ಲೀನವಾಗುವಂತೆ
ಮೋಡ ಹೊತ್ತ ಮುಗಿಲು ಗಾಳಿಗದುರಿ
ಮಳೆಹನಿಗಳನ್ನು ಬಿತ್ತುವಂತೆ
ಅಡಗಿ ಕುಳಿತ ಪ್ರಾಣವೊಂದು
ಅಪ್ಪಣೆ ಇಲ್ಲದೇ ಥಟ್ಟನೆ ಹೊರಡುವಂತೆ
ಮಂಜು ಕರಗಿ ನೀರಾಗಿ
ನೀರು ನದಿಯಾಗುವಂತೆ,
ನದಿಯು ಸಾಗರವನು
ಸೇರುವ ಚೈತನ್ಯಶಕ್ತಿಯಂತೆ
ಬಿಡುಗಡೆಗೊಳಿಸು ಗುರುದೇವ

ನೇತ್ರದಿಂದ ನೋಟವನು
ಶ್ರೋತೃಗಳಿಂದ ಸ್ವರ ಮೋಹವನು
ಚರ್ಮದಿಂದ ಸ್ಪರ್ಶಕಾಂತಿಯನು
ಕಾಲುಗಳಿಂದ ನೆಲದ ತುಣುಕನು
ಕೈಗಳಿಂದ ಬೃಹತ್ ಅಪ್ಪುಗೆಯನು
ಕಾಯದಿಂದ ವಾಯುವನು
ಆತ್ಮದಿಂದ ಪರಮಾತ್ಮನನು
ಅರಿಷಟ್ವರ್ಗಗಳಿಂದ ನಿಮ್ಮ ಸ್ಮರಣಿಕೆಯನು
ಬಿಡುಗಡೆಗೊಳಿಸು ಗುರುದೇವ....

ಸೆಳೆದುಬಿಡು ನನ್ನದಲ್ಲದ ನನ್ನನ್ನು
ಆದಿ-ಅಂತ್ಯವಿರದ ನಿಮ್ಮ ಪಾದದಡಿಗೆ
ಮೈಲಿಗೆಯನ್ನೇ ಮಡಿಯನ್ನುವ
ಭಾವಬಂಧನದಿಂದ ಬಯಲಕಡೆಗೆ
ಹಳ್ಳ-ಕೊಳ್ಳ,ಗಾಳಿ-ಬೆಳಕು
ಬೆನ್ನುಬಿದ್ದ ಬಟಾಬಯಲ ಕಡೆಗೆ
ಭಾವ ಪರಾಧೀನ ಜಗತ್ತಿನಿಂದ ನಶ್ವರದಡಿಗೆ
ಅಂತೆ-ಕಂತೆಗಳ ಸಂತೆಯಿಂದ ಸತ್ಯದಡಿಗೆ

ಬಿಡುಗಡೆಗೊಳಿಸಿ ಗುರುದೇವ
ಆದಿ-ಅಂತ್ಯವಿರದ ನಿಮ್ಮ ಪಾದದಡಿಗೆ
ನಿಮ್ಮ ಪಾದದಡಿಗೆ