ಅಲ್ಲೀಗ ಏನೂ ಉಳಿದಿಲ್ಲ

ಅಲ್ಲೀಗ ಎಲ್ಲವೂ ಮಣ್ಣಪಾಲಾಗಿವೆ
ಮುಗಿಲೆತ್ತರಕ್ಕೆ ಬೆಳೆದುನಿಂತಿದ್ದ ಕಟ್ಟಡ
ಮತ್ತೆ ಭೂತಳವನು
ತನ್ನಡಿಪಾಯವನು ತಾನೇ ಶೋಧಿಸುತಿದೆ
ಹೊರಟ ನೆಲೆಯೆಡೆಗೇ ಮತ್ತೆ ಮರಳಿಬಂದಿದೆ

ಬಲಿಷ್ಠ ಗೋಡೆಗಳು
ಭೀಮನ ಬಾಹುದ್ವಯಗಳನು ಸೋಲಿಸುವಂತಿದ್ದ ಕಂಬಗಳು
ಅತ್ಯಾಕರ್ಷಕ ಛಾವಣಿ
ಎಲ್ಲವೂ...ಎಲ್ಲವೂ ಮಣ್ಣು ಈಗ
ಗೋಡೆಯ ಬಣ್ಣ, ಕಂಬಗಳನು ನಿರ್ಮಿಸಿದ ಕೈ, ಆ ಕೈಯ್ಯ ಕುಸುರಿ,
ಕಾರ್ಮಿಕರ ಬೆವರ ಹನಿಗಳು,
ಶಿಲ್ಪಿಯ ಕನಸು
ಎಲ್ಲವೂ ಮಣ್ಣಲ್ಲಿ ಮಣ್ಣಾಗಿದೆ
ಗುರುತಿಸಿ ತೆಗೆಯದಂತೆ

ಮನುಷ್ಯ ಓಡಾಡಬೇಕಾದ ಕಡೆಯಲ್ಲೆಲ್ಲಾ
ಯುದ್ಧ ಟ್ಯಾಂಕರ್ ಗಳು ಚಲಿಸುತ್ತಿವೆ
ಸಂಚಾರದ ಏಕತಾನತೆ ಕಳೆದುಕೊಳ್ಳಲು
ಆಗೊಮ್ಮೆ ಈಗೊಮ್ಮೆ ಹೂಂಕರಿಸುತ್ತಿವೆ
ಸುಪ್ತ ಆಕ್ರೋಶದ ಪ್ರತಿನಿಧಿಯಾಗಿ

ಅಲ್ಲೀಗ ಏನೂ ಉಳಿದಿಲ್ಲ
ಮನುಷ್ಯ ಸಂಬಂಧಗಳು
ಮಾನವೀಯ ನಂಬಿಕೆಗಳೆಲ್ಲವೂ
ಮೌನವಾಗಿ ಗೋರಿ ಸೇರಿಕೊಂಡಿವೆ
'ಸತ್ತ ಮನುಷ್ಯರ' ಸ್ಮಶಾನದಲ್ಲಿ
ಸ್ವಾರ್ಥ, ಅಸೂಯೆ, ಅವಕಾಶವಾದಿತನಗಳು
ಪೆಣದಿನಿಗಳಾಗಿ ಹೊಟ್ಟೆ ತುಂಬಿಸಿಕೊಳ್ಳುತ್ತಿವೆ

ಈಗ ತಾನೇ ಹುಟ್ಟಿದ ಮಗು
ಬಾಯನ್ನು ಹಿರಿದಗಲ ಮಾಡಿ,
ಪಿಳಿಪಿಳಿ ಕಣ್ಣು ಮಾಡಿ ನೋಡುತ್ತಿದೆ-
ಆ ಬಾಂಬು ದಾಳಿ, ಸಾವು, ನೋವು, ಕ್ಷಿಪಣಿ ಮಣ್ಣು ಮಸಿ ಎಲ್ಲವನ್ನೂ....
ಮತ್ತು ಮನಸ್ಸಿನಲ್ಲೇ
ಅಂದುಕೊಳ್ಳುತ್ತಿದೆ-

'ಭೂಮಿಯೆಂದರೆ ಇಷ್ಟೇ,
ಬರೀ ಯುದ್ಧ'
***
✍️ವಿಶ್ವನಾಥ ಎನ್ ನೇರಳಕಟ್ಟೆ