ಅಲೆಗಳ ಜೊತೆಗೊಂದು ಅಲೆದಾಟ

ನಿಷ್ಟಾವಂತ ಬೆಳಕಿನಲಿ ಶ್ರೇಷ್ಟ
ದೃಷ್ಟಾಂತಗಳ ಕನಸು ಕಾಣುತ್ತಾ
ಕಾರ್ಮೋಡಗಳ ನಡುವೆ
ನೂರಾರು ಬಾರಿ
ಕಣ್ತೆರೆದರು ಏನೂ ಕಾಣಲೇ ಇಲ್ಲ
ಬಾಯ್ದೆರೆದು ನಿಂತಿದ್ದು ಮಾತ್ರ
ಸೋಲಿನ ಸಂಕೇತವೇ
ಆಗಿತ್ತು

ಖಾಲಿ ಕೈಲಿ ಹೊರಟಿದ್ದು ತಿಳಿಯದೇ
ಬೊಗಸೆಗಳ ತುಂಬಿಕೊಂಡು
ಅಪ್ಪಿಕೊಂಡು
ಉಡಿಯೊಳಗೆ ಸುರಿದಂತಹ ಭಾವ
ನಡೆಯುವಾಗ ಎಡವಿದೆ
ಕೆಡವಿದ ಕಲ್ಲುಗಳು
ಕೈಬಿಟ್ಟು ಹೋದ ಕನಸುಗಳ
ಆತ್ಮಗಳಾಗಿದ್ದವು

ಎದೆಯಲ್ಲಿ ಹರಿಯುತ್ತಿರುವ ನದಿಯೊಳಗೆ
ಹರಿದ ಸೀರೆಗಳ ಗಂಟೊಂದು
ತೇಲಿಬಂತು
ತೆರೆದು ನೋಡಿ ತಲೆಕೊಟ್ಟುಬಿಟ್ಟೆ
ಅದರೊಟ್ಟಿಗೆ ಅಲೆಯುತ್ತ ಸಾಗಿದೆ
ತೀರವನ್ನು ಹುಡುಕುತ್ತಲೇ ಇದ್ದೇನೆ
ತಡೆಹಿಡಿದುಕೊಂಡ
ಮುಳ್ಳುಕಂಟಿಯೊಂದು
ಇನ್ನಷ್ಟು ದಿನ ಇಲ್ಲೆ ಇದ್ದು ಹೋಗೆಂದು
ಮನವಿ ಮಾಡಿಕೊಳ್ಳುತಿದೆ

ನರನಾಡಿಗಳು ನಗರದಲ್ಲಿರುವ
ಗಾಳಿಯ ಊಟ ಸೇವಿಸಿ
ಸಂಕಟಪಡುತ್ತಿವೆ
ಬಾಳಿನ ಜೀವಂತಿಕೆಗಾಗಿ
ಬಾಗಿನಡೆಯುವ ಯೋಚನೆಯಲ್ಲಿದ್ದೆ
ನಗುವನ್ನು ನಾಜುಕಿನಿಂದ
ಹೊದ್ದುಕೊಂಡಾಗಿನಿಂದ
ನಗುವುದೊಂದೆ ಸಧ್ಯದ
ಯೋಚನೆ ಮತ್ತು ಯೋಜನೆಯಾಗಿಹೋಗಿದೆ.

ನನ್ನೆಡೆಗೆ ತೇಲಿ ಬರುವ ಗೇಲಿಮಾತುಗಳಿಗೆ
ಪೋಲಿ ಉತ್ತರಗಳನ್ನು ಕಂಡುಕೊಂಡು
ಹೋಲಿ ಬಣ್ಣಗಳಲಿ ಅದ್ದಿ
ಕೈ ಮೈಗೆಲ್ಲ ಬಳಿದುಕೊಂಡು
ಸಂಭ್ರಮಿಸುತ್ತಿರುವೆ
ಕೆಣಕುವವರ ನಡುವೆಯೇ ಬದುಕಲು
ಧೀರ್ಘ ಉಸಿರಿನ್ನು ನೀಡುವ ಮ(ನೆ)ನ
ಹುಡುಕುತ್ತಾ
ಅಲೆಯುತ್ತಿರುವೆ

ಕಲಾಕೃತಿ : ಎಸ್‌. ವಿಷ್ಣುಕುಮಾರ್‌