ಮಳೆ ಎಂಬ ಭ್ರಮೆ

ಅದೇ ವ್ಯಥೆ
ಅದೇ ಕಥೆ
ಪುನರಾವರ್ತನೆ
ಮುತ್ತಾಗಿಬೇಕಿದ್ದ ಕಣ್ಣೀರ ಬಿಂದು
ಯಾರದೋ ಸೊತ್ತಾಗಿ
ಆವಿಯಾಗುವುದು

ಭವಿಷ್ಯ ನಿರ್ಣಯ
ಹಲವು ಹೊಲಸಾದ ಮನಸುಗಳು ಸೇರಿ,
ಕಾಗೆಗಳ ಕಲರವಕೆ
ಸೋತು ಸೊರಗಿರುವ
ಕೆಲವೇ ಕೋಗಿಲೆಗಳ
ಉಗ್ರ ಹೋರಾಟ

ತೀರ್ಪುನೀಡುವವರ
ಯಾಜಮಾನ್ಯ ಮಾಡುವವವರ
ಅಸಹನೀಯ ಮೌನ
ಒಮ್ಮೊಮ್ಮೆ ಒಪ್ಪಿತವಾದೀತು
ಅದೇ ಗೆಲುವೆಂದು ಭ್ರಮಿಸಿ
ಸಂಭ್ರಮಿಸಿ, ಎತ್ತಿದ ತಲೆಗಳ
ಬಿಲಕ್ಕೆ ತಳ್ಳಿ ಮತ್ತೆ ಮುಚ್ಚಿಬಿಡುವುದು

ಸತ್ಯಕ್ಕೆ ಜಯ, ಧರ್ಮಕ್ಕೆ ಜಯ
ಎಂಬ ಹಳೇ ಸ್ಲೋಗನ್ನುಗಳ
ಪ್ರದರ್ಶಸಿ, ಹರ್ಷಿಸಿ
ಕೊನಗೇನು ಮಾಡಲಾಗದೆ ಚಡಪಡಿಸಿ
ಸೌಹಾರ್ದ ಸಮಾಜಕ್ಕೆ ನನ್ನದೊಂದು
ಕೊಡುಗೆ ಎಂದು ತೃಪ್ತಿಹೊಂದುವುದು

ಗೆಲುವೊಂದೇ ಮಾನದಂಡ
ಕೈಗೊಂದು ದೊಡ್ಡ ದಂಡ
ಬೀಸುವುದು ಎಲ್ಲ ಕಡೆ
ಮಿಂಚು ಬರಿಸುವುದು
ಮಳೆ ಎಂಬ ಭ್ರಮೆಯಲಿ
ಮುಳುಗಿಸುವುದು

ಅದೇ ಆತ್ಮವಿಶ್ವಾಸ
ಎದೆಯಲ್ಲಿ ತುಂಬಿ
ದಾರಿಕಾಯುವುದು
ಮುಂದಿನ ಪೀಳಿಗೆಗೆ
ದಾಟಿಸುವುದು