ಪೆರಮಾತಿನ ಶಿಕ್ಶಣ: ಕೆಲ ಸಮಸ್ಯೆಗಳು-ಬದುಕಿನಲ್ಲಿ ಸೋಲು

Date: 12-02-2025

Location: ಬೆಂಗಳೂರು

"ಪೆರಮಾತಿನ ಶಿಕ್ಶಣ ಮಕ್ಕಳನ್ನು ಅವರದಲ್ಲದ ಇನ್ನೊಂದಕ್ಕೆ ಕಸಿ ಮಾಡುವುದರಿಂದ ಇಂತದೆಲ್ಲ ಅನಾಹುತಗಳ ಸಾದ್ಯತೆಗಳನ್ನು ಕಾಣಬಹುದು. ಇಂತಾ ಹಲವಾರು ಅದ್ಯಯನಗಳೂ ಬಂದಿವೆ. ಪೆರಮಾತಿನ ಶಿಕ್ಶಣದಲ್ಲಿ ಮುಂದೆ ಬಂದಿರುವವರಲ್ಲಿ ಹೆಚ್ಚಿನವರು ಕಂಟಪಾಟದ ಮೂಲಕ, ನೆನಪಿಟ್ಟುಕೊಳ್ಳುವ ಮೂಲಕ ವಿಶಯಗಳನ್ನು ಪರಿಕ್ಶೆಯಲ್ಲಿ ಒಪ್ಪಿಸಿ ಹೆಚ್ಚು ಅಂಕಗಳನ್ನು ಪಡೆದುಕೊಂಡು ಬಂದಿರುವುದನ್ನು ಕಾಣಬಹುದು," ಎನ್ನುತ್ತಾರೆ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಪೆರಮಾತಿನ ಶಿಕ್ಶಣ: ಕೆಲ ಸಮಸ್ಯೆಗಳು-ಬದುಕಿನಲ್ಲಿ ಸೋಲು’ ಕುರಿತು ಬರೆದಿದ್ದಾರೆ.

ಪೆರಮಾತಿನ ಶಿಕ್ಶಣ ಪಡೆದು ಹೆಚ್ಚಿನ ಅಂಕಗಳೊಂದಿಗೆ ಪಾಸಾಗಿ ದೊಡ್ಡ ದೊಡ್ಡ ಉದ್ಯೋಗಗಳನ್ನು ಪಡೆದುಕೊಂಡಿರುವ ಹಲವರನ್ನೂ ಈ ಸಮಾಜದಲ್ಲಿ ಕಾಣಬಹುದು. ಇವರನ್ನು ತೋರಿಸಿ ಪೆರಮಾತಿನ ಶಿಕ್ಶಣದ ಸಾದನೆ ಎಂದೂ ಬಿಂಬಿಸಬಹುದು. ಆದರೆ ಮುಕ್ಯವಾಗಿ ಶಿಕ್ಶಣದ ಉದ್ದೇಶ ದೊಡ್ಡ ಸಂಬಳದ ಉದ್ಯೋಗವನ್ನು ಪಡೆದುಕೊಳ್ಳುವುದು ಅಲ್ಲ. ಹಾಗಾಗಿ ಅವರ ಈ ಸಾದನೆಯನ್ನು ಇಲ್ಲಿ ಮುಕ್ಯವಾಗಿ ಪರಿಗಣಿಸಬೇಕಿಲ್ಲ ಮತ್ತು ಅದು ಶಿಕ್ಶಣದ ಸಾದನೆಯೂ ಅಲ್ಲ. ಬದಲಿಗೆ ಅವರು ಬದುಕಿನಲ್ಲಿ ಬರುವ ಸಮಸ್ಯೆಗಳನ್ನು ಹೇಗೆ ಎದುರಿಸುತ್ತಾರೆ, ಎಶ್ಟು ಮಾನಸಿಕ ಸಾಮರ್‍ತ್ಯವನ್ನು ಬೆಳೆಸಿಕೊಂಡಿದ್ದಾರೆ, ಎಶ್ಟುಮಟ್ಟಿಗೆ ಸ್ವಂತ ಆಲೋಚನೆಯನ್ನು ಬೆಳೆಸಿಕೊಂಡಿದ್ದಾರೆ ಎಂಬುವುಗಳನ್ನು ಗಮನಿಸಬೇಕು. ಅವರು ಎಶ್ಟುಮಟ್ಟಿಗೆ ಸ್ರುಜನಾತ್ಮಕ ಗುಣವನ್ನು ಮತ್ತು ಎಶ್ಟುಮಟ್ಟಿಗೆ ತರ‍್ಕಿಕತೆಯನ್ನು ಬದುಕಿನಲ್ಲಿ ರೂಡಿಸಿಕೊಂಡಿದ್ದಾರೆ ಎಂಬ ವಾಸ್ತವಗಳನ್ನು ಗಮನಿಸಬೇಕಾಗುತ್ತದೆ.

ಇಲ್ಲಿ ಗಮನಿಸಬೇಕಾದ ಮಹತ್ವದ ವಿಚಾರವೆಂದರೆ ಆದುನಿಕ, ಇಂಗ್ಲೀಶ್ ಬಾಶೆಯ ಮಾದ್ಯಮದಲ್ಲಿ ಶಿಕ್ಶಣ ಪಡೆದು ದೊಡ್ಡ ಸಂಬಳದ ಉದ್ಯೋಗಗಳಲ್ಲಿ ಇರುವ ಹೆಚ್ಚಿನವರು ಮಾನಸಿಕ ಕಿನ್ನತೆಯನ್ನು, ಸ್ವಂತಿಕೆ ಇಲ್ಲದೆ ಬಳಲುವುದನ್ನು ಕಾಣಬಹುದು. ದೊಡ್ಡ ದೊಡ್ಡ ನಗರಗಳಲ್ಲಿ, ದೊಡ್ಡ ದೊಡ್ಡ ಸಂಬಳದ ಉದ್ಯೋಗಗಳಲ್ಲಿ ಇಂತಾ ಮಂದಿಯನ್ನು ಹೆಚ್ಚಾಗಿ ಕಾಣಬಹುದು. ಇದರಿಂದಾಗಿ ವಯಕ್ತಿಕ ಜೀವನವೂ, ಕುಟುಂಬ ಜೀವನವೂ ಕುಸಿದುಹೋಗುತ್ತವೆ. ಅದರಿಂದಾಗಿ ಒಟ್ಟು ಸಾಮಾಜಿಕ ರಚನೆ ಕೆಡುವುದಕ್ಕೆ ಇದು ದಾರಿಯಾಗುತ್ತದೆ. ಇದು ಬಹುದೂರದ ವಿಚಾರವೆಂದು ಅನಿಸಿದರೂ ಈಗಾಗಲೆ ಪೆರಮಾತಿನ ಶಿಕ್ಶಣ ಪಡೆದುಕೊಂಡು ಬಂದಿರುವ ಹಲವರು ಇಂತಾ ಸಮಸ್ಯೆಗಳಲ್ಲಿ ಇರುವುದನ್ನು ಕಾಣಬಹುದು. ತಾಯ್ಮಾತಿನ ಶಿಕ್ಶಣ ಸಾಹಿತ್ಯವನ್ನು ಅರ‍್ತ ಮಾಡಿಕೊಳ್ಳುವುದಕ್ಕೆ ಮಾತ್ರವಲ್ಲದೆ ಅನುಬವಿಸುವುದಕ್ಕೆ ಹೆಚ್ಚಿನ ಅವಕಾಶವನ್ನು ಒದಗಿಸುತ್ತದೆ. ಸಹಜವಾಗಿ ಸಾಹಿತ್ಯವನ್ನು ಅನುಬವಿಸುವವರಲ್ಲಿ ಹೆಚ್ಚಿನವರು ಸಂಬಂದಗಳಿಗೆ ಬೆಲೆ ಕೊಡುವವರಾಗಿರುತ್ತಾರೆ. ಇದರಿಂದ ವಯಕ್ತಿಕ ಬದುಕಿನಲ್ಲಿ ಸಂಬಂದಗಳ ಬೆಲೆ ಅರಿತು ನಡೆಯುವುದು ಸಾದ್ಯವಾಗುತ್ತದೆ.

ಪೆರಮಾತಿನ ಶಿಕ್ಶಣ ಮಕ್ಕಳನ್ನು ಅವರದಲ್ಲದ ಇನ್ನೊಂದಕ್ಕೆ ಕಸಿ ಮಾಡುವುದರಿಂದ ಇಂತದೆಲ್ಲ ಅನಾಹುತಗಳ ಸಾದ್ಯತೆಗಳನ್ನು ಕಾಣಬಹುದು. ಇಂತಾ ಹಲವಾರು ಅದ್ಯಯನಗಳೂ ಬಂದಿವೆ. ಪೆರಮಾತಿನ ಶಿಕ್ಶಣದಲ್ಲಿ ಮುಂದೆ ಬಂದಿರುವವರಲ್ಲಿ ಹೆಚ್ಚಿನವರು ಕಂಟಪಾಟದ ಮೂಲಕ, ನೆನಪಿಟ್ಟುಕೊಳ್ಳುವ ಮೂಲಕ ವಿಶಯಗಳನ್ನು ಪರಿಕ್ಶೆಯಲ್ಲಿ ಒಪ್ಪಿಸಿ ಹೆಚ್ಚು ಅಂಕಗಳನ್ನು ಪಡೆದುಕೊಂಡು ಬಂದಿರುವುದನ್ನು ಕಾಣಬಹುದು. ಶಿಕ್ಶಣ ನೆನಪಿಟ್ಟುಕೊಳ್ಳುವುದಕ್ಕಿಂತ ಅರ‍್ತ ಮಾಡಿಕೊಳ್ಳುವುದಕ್ಕೆ ಕಾರಣವಾಗಬೇಕು. ನೆನಪಿರುವತನಕ ಬದುಕು ಸಾಗುತ್ತದೆ, ನೆನಪಿಟ್ಟುಕೊಂಡಿರುವುದಕ್ಕಿಂತ ಬಿನ್ನವಾದ ಸಮಸ್ಯೆಗಳು ಬಂದಾಗ ಅವನ್ನು ಎದುರಿಸಲು ಸಾದ್ಯವಾಗದೆ ಸೋಲುತ್ತಾರೆ. ಹಾಗಾಗಿ ಇಂತಾ ಸ್ತಿತಿಗೆ ಪೆರಮಾತಿನ ಶಿಕ್ಶಣ ಕಾರಣವಾಗುವುದಾದರೆ ಅದು ಸೋಲು ಎಂದು ಹೇಳಬೇಕಾಗುತ್ತದೆ.

ಪ್ರದಾನವಾಗಿ ಮಕ್ಕಳ ಮನೋವಿಕಾಸದಲ್ಲಿ ಮತ್ತು ಮಕ್ಕಳ ಸಾಮಾಜಿಕತೆಯ ಬೆಳವಣಿಗೆಯಲ್ಲಿ ಆಗುವ ಸಮಸ್ಯೆಗಳನ್ನು ಮೊದಲಿಗೆ ಇಲ್ಲಿ ಉಲ್ಲೇಕಿಸಬಹುದು. ತಾಯ್ಮಾತಿನ ಶಿಕ್ಶಣವು ಅತ್ಯಂತ ಸಹಜವಾಗಿ ತರುವ ಆ ಸಹಜ ವಾತಾವರಣವನ್ನು ಪೆರಮಾತಿನ ಶಿಕ್ಶಣ ಮಕ್ಕಳಿಗೆ ಕೊಡಲಾರದು. ಅದೊಂದು ತೀರಾ ಬಿನ್ನವಾದ, ಸಂಪರ‍್ಣ ಹೊಸದಾದ ಜಗತ್ತಿನಂತೆ ಮಕ್ಕಳಿಗೆ ತೋರುತ್ತದೆ. ಆ ಹೊಸತಾದ ಜಗತ್ತಿಗೆ ಹೊಂದಿಕೊಳ್ಳುವುದೆ ಒಂದು ದೊಡ್ಡ ಸಮಸ್ಯೆಯಾಗಿಬಿಡುತ್ತದೆ. ಅದರಂತೆಯೆ ಈ ವ್ಯವಸ್ತೆ, ಬಹುಬಾಶಿಕ ಪರಿಸರದಲ್ಲಿ ಇರುವ ಬಹುಸಂಕೆಯ ಬಾಶೆಗಳು ಶಿಕ್ಶಣದಲ್ಲಿ ಮತ್ತು ಅದಕ್ಕೆ ಅಂಟಿಕೊಂಡು ಇನ್ನೂ ಹಲವು ವಲಯಗಳಲ್ಲಿ ಪ್ರಾತಿನಿದ್ಯವನ್ನು ಪಡೆದುಕೊಳ್ಳದೆ ಹೋಗುವುದರಿಂದ ಅವುಗಳ ಬಗೆಗೆ ಮಕ್ಕಳು ಕೀಳರಿಮೆಯನ್ನು ಬೆಳೆಸಿಕೊಳ್ಳುತ್ತವೆ. ಹೀಗಾಗಿ ಆ ಬಾಶೆಗಳನ್ನು ಆಡುವವರಿಗೂ ಈ ಕೀಳರಿಮೆ ಅಂಟಿಕೊಂಡು ಮಕ್ಕಳ ನಡುವೆ ಸಮಾನ ಮನೋಬಾವ ಬೆಳೆಯದಂತೆ ಆಗಬಹುದು. ಹೀಗಾಗಿ ಇದು ಬಹುತ್ವದ ಪರಿಸರಕ್ಕೂ ತೊಂದರೆಯನ್ನು ಮಾಡಬಹುದು.

ಹೀಗೆ ಶಿಕ್ಶಣದಲ್ಲಿ ಮುಂದುವರೆದ ಹಲವರಲ್ಲಿಯೂ ಇನ್ನೂ ಬಿನ್ನವಾದ ಸಮಸ್ಯೆಗಳು ಇರುತ್ತವೆ. ಅವರಲ್ಲಿ ಕೆಲವರು ನಿರ‍್ದಿಶ್ಟ ವಿಶಯಗಳಲ್ಲಿ ಸೋಲುವುದನ್ನು ಕಾಣಬಹುದು. ಬಾಶೆಯಲ್ಲಿ ಹೆಚ್ಚಿನವರು ಸೋಲುತ್ತಾರೆ. ವ್ಯಾಕರಣವನ್ನು ಹಿಡಿಯುವಲ್ಲಿ ಅಸಾದ್ಯ ಸ್ತಿತಿಯಲ್ಲಿರುತ್ತಾರೆ. ಗಣಿತವನ್ನು ಪಡೆಯುವುದರಲ್ಲಿಯೂ ಇಂತದೆ ಸಮಸ್ಯೆಗಳನ್ನು ಕಾಣಬಹುದು. ಉತ್ತಮ ಅಂಕಗಳೊಂದಿಗೆ ಪಾಸಾಗಿ ದೊಡ್ಡ ಉದ್ಯೋಗದಲ್ಲಿರುವ ಹಲವರು ಒಂದು ಪತ್ರ ಬರೆಯುವ ಕುಶಲತೆಯನ್ನೂ ಹೊಂದಿರುವುದಿಲ್ಲ, ಒಬ್ಬರನ್ನು ಎದುರಿಸುವ ಸ್ತಿತಿಯಲ್ಲಿಯೂ ಇರುವುದಿಲ್ಲ.

ಒಟ್ಟಾರೆಯಾಗಿ ತಾಯ್ಮಾತಿನ ಶಿಕ್ಶಣ ಪಡೆದವರಲ್ಲಿ ಬದುಕಿನಲ್ಲಿ ಸಮಸ್ಯೆಗಳನ್ನು ಎದುರಿಸುವವರೂ, ಪೆರಮಾತಿನ ಶಿಕ್ಶಣವನ್ನು ಪಡೆದವರಲ್ಲಿ ಸೋತವರೂ ಹೆಚ್ಚು ಇರುತ್ತಾರೆ ಎಂಬುದನ್ನು ಗಮನಿಸಬಹುದು. ಪೆರಮಾತಿನ ಶಿಕ್ಶಣದಲ್ಲಿ ಬಂದೂ ಬದುಕಿನಲ್ಲಿ ಯಶ ಕಂಡವರೂ ಇದ್ದೆ ಇರುತ್ತಾರೆ, ಇಡಿಯಾಗಿ ಎಲ್ಲರಿಗೂ ಈ ವಾದವನ್ನು ಸಾಮಾನ್ಯೀಕರಿಸುವುದು ಯಾವತ್ತೂ ಅಪಾಯ. ಆದರೆ ಅಂತವರ ಸಂಕೆ ಕಡಿಮೆ ಇರುತ್ತದೆ. ಹೀಗೆ ಬಂದವರಲ್ಲಿ ಹಲವರು ಅವರವರ ವಯಕ್ತಿಕ ಸಾರ‍್ತö್ಯದಿಂದ ಬಂದವರು ಇರುತ್ತಾರೆ. ಪೆರಮಾತಿನ ಶಿಕ್ಶಣ ಕಾರಣವಾಗಿ ಹೀಗೆ ಬೆಳೆದಿರುವರು ಎಂದು ಹೇಳುವುದು ಬಹು ಕಶ್ಟದ ವಿಚಾರ.