ಆರ‍್ತಿಕ ಅಬಿರುದ್ದಿ ಮತ್ತು ತಾಯ್ಮಾತಿನ ಶಿಕ್ಶಣ (ಮುಂದುವರೆದುದು)

Date: 15-01-2025

Location: ಬೆಂಗಳೂರು

"ಬಾಶೆ ಮಾತ್ರವಲ್ಲದೆ ಆಯಾ ಬಾಶೆಗಳ ಸಾಮಾಜಿಕ, ಸಾಂಸ್ಕೃತಿಕ ಅದ್ಯಯನ ಮಾಡಬೇಕಾಗುತ್ತದೆ. ಈ ಎಲ್ಲ ಅದ್ಯಯನಗಳು ಅವಕಾಶಗಳಾಗಿ ಆ ಸಮುದಾಯದವರಿಗೆ ಒದಗುತ್ತವೆ. ಹೀಗೆ ಆರ‍್ತಿಕ ಚಲನೆಯು ಬಿನ್ನ ಹರಿವನ್ನು ಪಡೆದುಕೊಳ್ಳುತ್ತದೆ ಎನ್ನುತ್ತಾರೆ," ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಆರ‍್ತಿಕ ಅಬಿರುದ್ದಿ ಮತ್ತು ತಾಯ್ಮಾತಿನ ಶಿಕ್ಶಣ (ಮುಂದುವರೆದುದು)’ ಕುರಿತು ಬರೆದಿದ್ದಾರೆ..

ತಾಯ್ಮಾತಿನಲ್ಲಿ ಶಿಕ್ಶಣ ಆರ‍್ತಿಕ ಬೆಳವಣಿಗೆಗೆ ಬೇಕಾದಶ್ಟು ಪೂರಕವಾಗಿರಬಲ್ಲದು. ತಾಯ್ಮಾತಿನ ಶಿಕ್ಶಣವನ್ನು ಕೊಡುವುದಕ್ಕೆ ಮುಂದಾದಾಗ ನೂರಾರು ಬಾಶೆಗಳಲ್ಲಿ ಶಿಕ್ಶಣವನ್ನು ಕೊಡಬೇಕಾಗುತ್ತದೆ. ಇದರಿಂದ ಹಲವು ಉದ್ಯೋಗಸ್ರುಶ್ಟಿಯಾಗುತ್ತವೆ.

ಯುವಕರಿಗೆ ಉದ್ಯೋಗಗಳನ್ನು ಒದಗಿಸುವುದು ದೊಡ್ಡ ಜನಸಂಕೆ ಇರುವ ಬಾರತದಂತಾ ದೇಶಕ್ಕೆ ಯಾವಾಗಲೂ ಒಂದು ದೊಡ್ಡ ಸವಾಲು. ಇಂತಾ ಸಂದರ‍್ಬದಲ್ಲಿ ಹೆಚ್ಚಿನ ತಾಯ್ಮಾತುಗಳಲ್ಲಿ ಶಿಕ್ಶಣವನ್ನು ಕೊಡುವುದನ್ನು ಮೊದಲು ಮಾಡಿದರೆ ಹಲವಾರು ಉದ್ಯೋಗಾವಕಾಶಗಳು ಬೆಳೆಯುತ್ತವೆ. ಮುಕ್ಯವಾಗಿ ಇವುಗಳಲ್ಲಿ ಹೆಚ್ಚಿನವು ಆಯಾ ಬಾಶೆಗಳ ಮಂದಿಗೆ ಸಿಗುತ್ತವೆ. ಆ ಬಾಶೆಯಲ್ಲಿ ಪಟ್ಯ ತಯಾರಿ ಕೆಲಸ, ಪೂರಕಪಟ್ಯ ತಯಾರಿ ಕೆಲಸ, ಆಕರ ಸಾಮಗ್ರಿ ತಯಾರಿಸುವುದು ಮತ್ತು ಶಿಕ್ಶಕರು ಹೀಗೆ ಹಲವಾರು ಅವಕಾಶಗಳು ಬೆಳೆಯುತ್ತವೆ. ಶಿಕ್ಶಣ ವ್ಯವಸ್ತೆಯ ಒಳಗೆ ಬಾರದ ಹೆಚ್ಚಾನುಹೆಚ್ಚು ಬಾಶೆಗಳು ಕೆಳರ‍್ಗದವರು ಆಡುವಂತವು ಮತ್ತು ಬುಡಕಟ್ಟುಗಳು ಆಡುವಂತವು ಆಗಿವೆ. ಅಂದರೆ ಈ ಬಾಶೆಗಳಲ್ಲಿ ಶಿಕ್ಶಣವನ್ನು ಆರಂಬಿಸಿದರೆ ಈ ಎಲ್ಲ ಸಮುದಾಯಗಳ ಹಲವಾರು ಮಂದಿಗೆ ಹೆಚ್ಚು ಹೆಚ್ಚು ಉದ್ಯೋಗಾವಕಾಶಗಳು ದೊರಕುತ್ತವೆ. ಈ ಬಾಶೆಗಳ ಮೇಲೆ ಪಟ್ಯಪೂರಕವಾಗಿ ಸಂಶೋದನಾ ಅವಕಾಶಗಳು ಕೂಡ ಹೆಚ್ಚಾಗುತ್ತವೆ. ಇದು ಮುಂದುವರೆದು ಹೊಸತಾಗಿ ಶಿಕ್ಶಣ ಪಡೆದವರಿಗೆ ಅವರ ಬಾಶೆಯಲ್ಲಿ ಓದುವುದಕ್ಕೆ ಸಾಹಿತ್ಯವನ್ನು ಒದಗಿಸುವ ಜವಾಬ್ದಾರಿ ಬರುತ್ತದೆ. ಆ ಮೂಲಕ ಹೆಚ್ಚು ಹೆಚ್ಚು ಅವಕಾಶಗಳು ಬೆಳೆಯುತ್ತಾ ಹೋಗುತ್ತವೆ. ಹೀಗೆ ಈ ಅವಕಾಶಗಳು ಆ ಸಮುದಾಯದ ಬೆಳವಣಿಗೆಗೆ ಮಾತ್ರವಲ್ಲದೆ ಇಡಿಯಾಗಿ ದೇಶದ ಬೆಳವಣಿಗೆಗೆ ಪೂರಕವಾಗುತ್ತವೆ. ಇದು ಇನ್ನೂ ಮುಂದುವರೆದು ಮಾದ್ಯಮ, ಸೇವೆ ಮೊದಲಾದ ವಲಯಗಳನ್ನು, ವ್ಯಾಪಾರ-ವ್ಯವಹಾರಗಳನ್ನು ಆವರಿಸಿಕೊಳ್ಳುತ್ತದೆ. ಸಹಜವಾಗಿಯೆ ಇದು ಆರ‍್ತಿಕ ಬೆಳವಣಿಗೆಗೆ ಪೂರಕವಾಗಿರುವುದು ಮಾತ್ರವಲ್ಲದೆ ಹಲವು ಉದ್ಯೋಗಾವಕಾಶಗಳಿಗೆ ಕಾರಣವಾಗುತ್ತದೆ.

ತಾಯ್ಮಾತಿನಲ್ಲಿ ಶಿಕ್ಶಣವನ್ನು ಕೊಡುವುದು ಎಂದರೆ ಅದಕ್ಕೆ ಬೇಕಾಗಿರುವ ಪೂರಕ ಸಿದ್ದತೆಯನ್ನು ಮಾಡಿಕೊಳ್ಳಬೇಕು. ಇದುವರೆಗೆ ಕೇವಲ ಕೆಲವೆ ಬಾಶೆಗಳಲ್ಲಿ ಶಿಕ್ಶಣವನ್ನು ಒದಗಿಸುತ್ತಿರುವುದರಿಂದ ಪಟ್ಯ ಮೊದಲಾಗಿ ಇತರೆಲ್ಲ ಸಾಮಗ್ರಿಗಳು ಈ ಕೆಲವೆ ಬಾಶೆಗಳಲ್ಲಿ ಇವೆ. ಈಗ ಉಳಿದೆಲ್ಲ ಬಾಶೆಗಳಲ್ಲಿ ಇವುಗಳನ್ನು ತಯಾರಿಸಬೇಕು. ಪಟ್ಯಗಳನ್ನು ನಿರ‍್ಮಿಸುವ, ವ್ಯಾಕರಣ, ನಿಗಂಟು ಮೊದಲಾದ ಪೂರಕ ಪಟ್ಯಗಳನ್ನು ತಯಾರಿಸುವ, ಜನಪದ ಸಾಹಿತ್ಯ, ಕಲೆ ಮೊದಲಾದವನ್ನು ಸಂಗ್ರಹಿಸುವ ಮೊದಲಾದ ಕೆಲಸಗಳನ್ನು ಮಾಡಬೇಕಾಗುತ್ತದೆ. ಬಾಶೆ ಮಾತ್ರವಲ್ಲದೆ ಆಯಾ ಬಾಶೆಗಳ ಸಾಮಾಜಿಕ, ಸಾಂಸ್ಕೃತಿಕ ಅದ್ಯಯನ ಮಾಡಬೇಕಾಗುತ್ತದೆ. ಈ ಎಲ್ಲ ಅದ್ಯಯನಗಳು ಅವಕಾಶಗಳಾಗಿ ಆ ಸಮುದಾಯದವರಿಗೆ ಒದಗುತ್ತವೆ. ಹೀಗೆ ಆರ‍್ತಿಕ ಚಲನೆಯು ಬಿನ್ನ ಹರಿವನ್ನು ಪಡೆದುಕೊಳ್ಳುತ್ತದೆ. ಪಟ್ಯ ನಿರ‍್ಮಾಣ, ಶಿಕ್ಶಕ ತರಬೇತಿ ಕೆಲಸ, ಶಿಕ್ಶಕ ಹುದ್ದೆಗಳು, ಪಟ್ಯತಯಾರಿ, ಪಟ್ಯತಯಾರಿಗೆ ಬೇಕಾದ ಇತರೆ ಕೆಲಸಗಳು, ಕಲೆ, ಸಂಗೀತ ಮೊದಲಾದವುಗಳ ಕೆಲಸ ಇವೆಲ್ಲ ಬೆಳೆಯುತ್ತವೆ. ಪಟ್ಯೇತರವಾದ ಹಲವಾರು ಕೆಲಸಗಳೂ ಬೆಳೆಯುತ್ತವೆ. ಪಟ್ಯತಯಾರಿ ಪ್ರಕ್ರಿಯೆ ಬಗೆಗೆ ಮುಂದೆ ಮಾತನಾಡಿದೆ, ಅಲ್ಲಿ ಈ ಬಗೆಗೆ ಇನ್ನಶ್ಟು ಚರ‍್ಚೆ ದೊರೆಯುತ್ತದೆ.

ತಾಯ್ಮಾತಿನ ಶಿಕ್ಶಣ ಒಂದು ಬಾಶೆಗೆ ಹಲವಾರು ಸಾಮಾಜಿಕ ಆಯಾಮಗಳನ್ನು ತೆರೆಯುತ್ತದೆ. ಇದುವರೆಗೆ ಬಹುತೇಕ ಬಾರತೀಯ ಬಾಶೆಗಳಿಗೆ ಸಾಂಜದ ಹಲವಾರು ಆಯಾಮಗಳು ಮುಚ್ಚಿಕೊಂಡಿವೆ. ಶಿಕ್ಶಣವನ್ನು ಆ ಬಾಶೆಯಲ್ಲಿ ಕೊಡುತ್ತಿದ್ದಂತೆ ಈ ಎಲ್ಲ ಆಯಾಮಗಳು ತೆರೆದುಕೊಳ್ಳುತ್ತವೆ. ಬರಹ, ಮುದ್ರಣ, ತಂತ್ರಾಂಶ ಬೆಳವಣಿಗೆ, ಸಿನಿಮಾ ಮೊದಲಾದ ಮಾದ್ಯಮಗಳ ಬೆಳವಣಿಗೆ ಈ ಮೊದಲಾದ ವಲಯಗಳಲ್ಲಿ ಒಂದು ಬಾಶೆ ಸರಳವಾಗಿ ಪ್ರವೇಶವನ್ನು ಪಡೆಯುವುದಕ್ಕೆ ಸಾದ್ಯವಾಗುತ್ತದೆ. ಇನ್ನೊಂದೆಡೆ ಒಂದು ಬಾಶೆಯು ಸಮಾಜದ ಎಲ್ಲೆಡೆ ಕಾಣತೊಡಗುತ್ತಿದ್ದಂತೆ ವಿವಿದ ಬಗೆಯ ವೇದಿಕೆಗಳಲ್ಲಿ ಬಾಶೆಯು ಕೇಳಿಸತೊಡಗುತ್ತದೆ. ಆಗ, ಪ್ರದಾನ ಬಾಶೆಗಳಿಗೆ ಒದಗಿರುವ ವೇದಿಕೆಗಳೆಲ್ಲವೂ ಈ ಬಾಶೆಗೆ ತೆರೆದುಕೊಳ್ಳುತ್ತವೆ. ಇವು ಆಡಳಿತ ವಲಯದಲ್ಲಿ ಇರಬಹುದು, ಸಮಾಜಸೇವಾ ವಲಯದಲ್ಲಿ ಇರಬಹುದು, ಮಾರುಕಟ್ಟೆ ವಲಯವಾಗಿರಬಹುದು ಇಲ್ಲವೆ ಶಿಕ್ಶಣ ವ್ಯವಸ್ತೆಯೂ ಆಗಿರಬಹುದು. ಇಲ್ಲೆಲ್ಲ ಬಾಶೆ ಆದಾರಿತವಾದ ಉದ್ಯೋಗಗಳು ಹುಟ್ಟುತ್ತವೆ. ಪತ್ರಿಕೋದ್ಯಮದ ಉದಾಹರಣೆಯೊಂದನ್ನು ತೆಗೆದುಕೊಳ್ಳುವುದಾದರೆ, ವರದಿಗಾರರಿಂದ ಹಿಡಿದು ಸಂಪಾದಕರವರೆಗೆ ಇನ್ನೊಂದೆಡೆ ವಿತರಕರವರೆಗೆ ಹಲವು ಹಂತಗಳಲ್ಲಿ ಉದ್ಯೋಗಗಳು ಹುಟ್ಟಿಕೊಳ್ಳುತ್ತವೆ. ಹೀಗೆ ತಾಯ್ಮಾತಿನ ಶಿಕ್ಶಣವು ದೇಶದಲ್ಲಿ ದೊಡ್ಡ ಸಂಕೆಯ ಉದ್ಯೋಗಗಳನ್ನು ಹುಟ್ಟಿಸುವುದಕ್ಕೆ ಕಾರಣವಾಗುತ್ತದೆ.