ಬೆಂಗಳೂರು: ಆಚಾರ್ಯರ ಪುಣ್ಯರಾಧನೆ-4ರ ಅಂಗವಾಗಿ ಹಮ್ಮಿಕೊಂಡಿದ್ದ ‘ಬನ್ನಂಜೆ ಗೋವಿಂದಾಚಾರ್ಯ ಪುರಸ್ಕಾರ 2024’ ಪ್ರಶಸ್ತಿ ಪ್ರದಾನ ಸಮಾರಂಭವು 2024 ಡಿ.13 ಶುಕ್ರವಾರದಂದು ಬೆಂಗಳೂರಿನ ನಯನ ಸಭಾಂಗಣದಲ್ಲಿ ನಡೆಯಿತು.

2024ನೇ ಸಾಲಿನ ‘ಬನ್ನಂಜೆ ಗೋವಿಂದಾಚಾರ್ಯ ಪುರಸ್ಕಾರ’ವನ್ನು ಕೆನಡಾ ಮ್ಯಾನಿಟೋಬಾ ವಿಶ್ವವಿದ್ಯಾಲಯದ ಪ್ರೊಫೆಸರ್ ಬಿ.ಎಂ ರಮೇಶ್ ಅವರಿಗೆ ಗುರುರಾಜ ಕರ್ಜಗಿ, ವಿಜಯಸಿಂಹ ಆಚಾರ್ಯ ಹಾಗೂ ಪ್ರೊ. ಮಲ್ಲೇಪುರಂ ವೆಂಕಟೇಶ್ ಅವರು ಪ್ರದಾನಿಸಿದರು.

ಸಮಾರಂಭದಲ್ಲಿ ಉಪಸ್ಥಿತರಿದ್ದ ವೇದಾಂತಿಗಳಾದ ಶ್ರೀ ವಿಜಯ್ ಸಿಂಹ ಆಚಾರ್ಯರು ಮಾತನಾಡಿ, "ವ್ಯಾಖ್ಯಾನಕ್ಕೆ ಅನುಗುಣವಾಗಿ ಅವರು ಶ್ಲೋಕಗಳನ್ನು ಹೇಳಿದಾಗ, ಶ್ಲೋಕಬದ್ಧ ಪಠ್ಯವಾಗಿ ರೂಪುಗೊಳ್ಳುತ್ತಿತ್ತು. ಒಬ್ಬ ವ್ಯಾಖ್ಯಾನಕಾರನನ್ನ ಎದುರುಗಡೆ ನೋಡುವಂತಹ ಭಾಗ್ಯ ನನ್ನದಾಗಿತ್ತು. ಇದರಿಂದ ಅವನು ಹೇಗೆ ಕೆಲಸಮಾಡುತ್ತಾರೆ, ವಿಚಾರಗಳನ್ನು ಹೇಗೆ ಗ್ರಹಿಸುತ್ತಾರೆ, ಎನ್ನುವುದನ್ನು ಹತ್ತಿರದಿಂದ ನೋಡುವ ಅವಕಾಶವನ್ನು ನಾನು ಕಂಡುಕೊಂಡಿದ್ದೆ. ಅವರಿಗೆ ಬಹಳ ಗ್ರಂಥಗಳನ್ನು ಬರೆಯುವ ಕನಸ್ಸಿತ್ತು. ಆದರೆ ಸಮಯದ ಮಿತಿ ಕೂಡ ಅವರಿಗೆ ತಿಳಿದಿತ್ತು," ಎಂದರು.

ಪ್ರಶಸ್ತಿ ಪುರಸ್ಕೃತ ಬಿ.ಎಂ ರಮೇಶ್ ಮಾತನಾಡಿ, "ಎಲೆಮರೆಯ ಕಾಯಿಯಂತೆ ಇದ್ದ ನನ್ನನ್ನು ಇಂದು ಗುರುತಿಸಿ,ಇಂತಹ ಪ್ರತಿಷ್ಠಿತ ಪ್ರಶಸ್ತಿಯನ್ನು ನೀಡಿದ ಬನ್ನಂಜೆ ಪ್ರತಿಷ್ಠಾನಕ್ಕೆ ನನ್ನ ಧನ್ಯವಾದಗಳು. ಸನಾತನ ಧರ್ಮ, ವೇದ ಉಪನಿಷತ್ ಗಳ ಸಾರವನ್ನೇ ತುಂಬಿಕೊಂಡಿರುವ ಮಹಾಭಾರತ ಮಹಾನ್ ಗ್ರಂಥ. ಮಹಾಭಾರತ, ರಾಮಾಯಣ, ಪುರಾಣಗಳನ್ನು ನಾನು ಬಾಲ್ಯದಿಂದಲೇ ಓದುತ್ತಾ ಬಂದಿದ್ದೇನೆ. ಕನ್ನಡ ಮಾತ್ರವಲ್ಲದೇ ಪ್ರತಿಯೊಂದು ಭಾಷೆಯಲ್ಲಿ ಅನುವಾದಿಸಲ್ಪಟ್ಟ ಕೃತಿಗಳನ್ನು ಓದುತ್ತಾ, ಅಧ್ಯಯನ ಮಾಡಿದ್ದು, ಪತ್ರೀ ಕೃತಿಯು ಕೂಡ ಸೊಗಸಾಗಿ ಮೂಡಿದೆ,’ ಎಂದು ತಿಳಿಸಿದರು.

ಸಮಾರಂಭದಲ್ಲಿ ‘ನನ್ನ ಪಿತಾಮಹ’ ನಾಟಕ ಪ್ರದರ್ಶನವನ್ನ ಮಾಡಲಾಯಿತು.