ಜಗದ ಕವಿ ಶ್ರೀ ವಾಲ್ಮೀಕಿ ( ಮಕ್ಕಳಿಗಾಗಿ ಮಹನೀಯರ ಚಿತ್ರಣ)

"ಜಗದ ಕವಿ ಶ್ರೀ ವಾಲ್ಮೀಕಿ" ಪ್ರಕಾಶ್ ಕೆ. ನಾಡಿಗ್ ಅವರು ಮಕ್ಕಳಿಗಾಗಿ ಬರೆದಿರುವ ಕೃತಿ. ಈ ಕೃತಿಗೆ ಡಾ.ಎಸ್.ಪಿ ಪದ್ಮಪ್ರಸಾದ್ ಅವರ ಮುನ್ನುಡಿ ಬರಹವಿದೆ. ಕೃತಿಯ ಕುರಿತು ಬರೆಯುತ್ತಾ 'ಪ್ರಕಾಶ್ ಕೆ ನಾಡಿಗ್‌ರ "ಜಗದ ಕವಿ ಶ್ರೀ ವಾಲ್ಮೀಕಿ" ಕೃತಿ ಎಳೆಯರಿಗೆ ಕವಿಕುಲಗುರು ವಾಲ್ಮೀಕಿಯನ್ನು, ಅವನ ಮಹತ್ಕಾವ್ಯ, ಜಗತ್ಕಾವ್ಯವಾದ ಶ್ರೀಮದ್‌ರಾಮಾಯಣವನ್ನೂ ಸ್ಪೂರ್ತಿಯುತ ಉದ್ದೇಶದಿಂದ ರಚಿತವಾಗಿರುವ ಕೃತಿ. ಸಂಶೋಧನೆ ಅಥವಾ ವಿಮರ್ಶೆ ಇಲ್ಲಿಯ ಉದ್ದೇಶವಲ್ಲ. ರಾಮಾಯಣದಿಂದ ನಾವು ಏನು ಪಾಠ ಕಲಿಯಬಹುದು, ಆ ಕಾವ್ಯದ ಸಂದೇಶವೇನು, ರಾಮ, ಸೀತೆ, ಲಕ್ಷ್ಮಣ ಇವರೆಲ್ಲಾ ಯಾಕೆ ಆದರ್ಶವಾಗುತ್ತಾರೆ ಎಂಬುದನ್ನು ವಿವರಿಸುವ ಉದ್ದೇಶದ ಕೃತಿ ಇದು ಎಂದಿದ್ದಾರೆ. ಜೊತೆಗೆ ತನ್ನ ಉದ್ದೇಶದಲ್ಲಿ ಈ ಲೇಖಕರು ಯಶಸ್ವಿಯಾಗಿದ್ದಾರೆ. ರಾಮಾಯಣ ಮಹಾಭಾರತಗಳನ್ನು ಕುರಿತು ತುಂಬಾ ವಿಮರ್ಶೆಗಳು ಬಂದಿವೆ: ಸಂಶೋಧನೆಗಳು ನಡೆದಿವೆ. ರಾಮಾಯಣದಲ್ಲಿ ಭಿನ್ನ ಪರಂಪರೆಗಳಿವೆ. ಅವೆಲ್ಲಕ್ಕೂ ಜನಪದವೇ ಮೂಲ. ಆದರೆ ಯಾವುದೇ ರಾಮಾಯಣವಿರಲಿ- ಅಲ್ಲಿ ರಾಮನನ್ನು ಆದರ್ಶ ವ್ಯಕ್ತಿಯಾಗಿ, ಅನುಕರಣೀಯ ವ್ಯಕ್ತಿತ್ವ ಉಳ್ಳವನಾಗಿ ಚಿತ್ರಿತವಾಗಿದ್ಧಾನೆ. ಆದ್ದರಿಂದಲೇ ರಾಮಾಯಣ ಪಾರಾಯಣ ಯೋಗ್ಯ, ಅಭ್ಯಾಸ ಯೋಗ್ಯ. ವಾಲ್ಮೀಕಿ ರಾಮಾಯಣದಲ್ಲಿರುವ ಕಾವ್ಯಮಯತೆ ಮತ್ತು ವಿಸ್ತಾರ ಅನ್ಯ ರಾಮಾಯಣಗಳಲ್ಲಿ ಇಲ್ಲ. ಆದ್ದರಿಂದಲೇ ವಾಲ್ಮೀಕಿ ರಾಮಾಯಣ ತುಂಬ ಜನಪ್ರಿಯವಾಗಿರುವುದು. ವಾಲ್ಮೀಕಿಯಿಂದ ರಾಮಾಯಣ ಉಳಿದೆದೆ. ಹಾಗೆಯೇ ರಾಮಾಯಣದಿಂದಾಗಿ ವಾಲ್ಮೀಕಿಯೂ ಉಳಿದಿದ್ದಾನೆ. ಅದು ಹೇಗೆ ಎಂಬುದನ್ನು ಕಿರಿಯರಿಗೆ ಅರ್ಥವಾಗುವಂತೆ ಇಲ್ಲಿ ಲೇಖಕರು ನಿರೂಪಿಸಿದ್ದಾರೆ. ತಮ್ಮ ಈ ಬರೆಹವನ್ನು ಲೇಖಕರು ಮೂರು ಭಾಗವಾಗಿ ವಿಂಗಡಿಸಿಕೊಂಡು ರೂಪಿಸಿದ್ದಾರೆ. ಮೊದಲು-ವಾಲ್ಮೀಕಿ ಬದುಕಿನ ಕಥೆ ಹೇಳಿದ್ದಾರೆ. ಸಾಮಾನ್ಯ ಬೇಟೇಗಾರನಾಗಿದ್ದವನು ದರೋಡೆಕೋರನಾಗಿ ಮಹರ್ಷಿಯಾಗಿ ಬದಲಾದದ್ದು ಮೊದಲ ಭಾಗ. ಈ ಮಹರ್ಷಿಯಿಂದ ರಾಮಾಯಣ ರಚಿತವಾದದ್ದನ್ನು ತಿಳಿಸುತ್ತಾ ಅದರ ಕಥೆಯನ್ನು ಹೇಳಿರುವುದು ಎರಡನೆಯ ಭಾಗ. ಮೂರನೆಯ ಭಾಗದಲ್ಲಿ ರಾಮಾಯಣದ ಕೆಲವು ಪಾತ್ರಗಳು ಹೇಗೆ ಆದರ್ಶ ಎಂದು ವಿವರಿಸಿ ಮನದಟ್ಟಾಗುವಂತೆ ಬರೆದಿದ್ದಾರೆ. ಕೊನೆಯಲ್ಲಿ ವಾಲ್ಮೀಕಿ ಇಂದೂ ಹೇಗೆ ಪೂಜಿಸಲ್ಪಡುತ್ತಿದ್ದಾನೆ ಎಂಬುದನ್ನು ವಿವರಿಸಿದ್ದಾರೆ. ಇಲ್ಲಿನ ಸರಳವಾದ ಭಾಷೆ, ಮನಮುಟ್ಟುವಂತಹ ನಿರೂಪಣೆ, ರಾಮಾಯಣದ ಕಥೆಯನ್ನು ಕೆಲವೇ ಪುಟಗಳಲ್ಲಿ ಸಂಗ್ರಹಿಸಿರುವ ಕೌಶಲ-ಇವೆಲ್ಲಾ ಈ ಕೃತಿಯನ್ನು ಮೆಚ್ಚುವಂತೆ ಮಾಡುತ್ತವೆ ಎಂದು ಮೆಚ್ಚುಗೆ ಸೂಚಿಸಿದ್ದಾರೆ.