ಪುನರ್ಭವ

ಪ್ರತಿ ಶಿಶಿರದ ಆಳದಲೂ ನನಗೆ
ಬೇಸಿಗೆಯ ಚಿಗುರು ಕಾಣಿಸುತ್ತದೆ
ಅಸಂಖ್ಯ ಕಂಬಳಿಹೊದ್ದ ಇಳೆಯ ಒಳಗೆ
ಸಣ್ಣಗೆ ಉರಿವ ಹಿತಬಿಸಿಯ ಹಣತೆ
ಪ್ರತಿ ಋತುವಿನ ಮುಖವಾಡ ನನಗೂ
ಶಿಶಿರದಲಿ ಬೇಗೆಯ ನಾಟಕ,
ಬೇಗೆಯಲಿ ಮಳೆಯ ತಾಲೀಮು,
ಬದುಕಿಡೀ ಅಲಿಖಿತ ರಂಗಮಂಚ

ನನಗೆ ಗೊತ್ತು.

ಮುಂದೆ ಬೇಸಿಗೆ ರಣ ಇದೆ
ಶಿಶಿರದಲಿ ಹೆಚ್ಚೇ ಕೈ ಸುಟ್ಟುಕೊಳ್ಳುವೆ
ಬೆರಳುಗಳಲಿ ಉರಿದೀಪವ ಸವರುವೆ
ಕೆಂಡಗಳನು ದಿಟ್ಟಿಸುವೆ
ಬೇಗೆ ಮತ್ತು ಶಿಶಿರದ ನಡುವೆ
ಮಳೆಹನಿಗಳ ಪದ ಸೇತುವೆ ಕಟ್ಟುವೆ
ಈ ಜೀವ ಯಾವುದನೂ ಮರೆಯದಿರಲಿ
ಯಾವುದನೂ ವೃಣದಂತೆ ಹಚ್ಚಿಕೊಳ್ಳದಿರಲಿ

ಕಾಪಾಡಿಕೊಳ್ಳಬೇಕಾಗಿದೆ ನನ್ನದೆ ವಸಂತವೊಂದನು
ಮರುಭೂಮಿಯ ಆಳದಲಿ ಹಿಮವನು
ಯಾವ ಶಿಶಿರವೂ
ಯಾವ ಮಳೆಯೂ
ಯಾವ ವೈಶಾಖವೂ
ಒಳಮನೆಯನು ಅಲುಗಿಸದಹಾಗೆ
ಕನಸುಗಳನು ನೆಲಕೆ ಒರಗಿಸದ ಹಾಗೆ

ಸಂಗ್ರಹಿಸುತಿರುವೆ
ಶಿಶಿರದಾಳದ ಬೇಗೆಯ ಚಿಗುರನು
ಜೊತೆಗೆ
ನಾಳೆ ಬೇಗೆಯ ಸೆರಗಿನಲಿ ತೊಟ್ಟಿಕ್ಕುವ
ಮಳೆಯನು

ಪದಗಳು ಋತುವಿನ ಬೇಟೆಗೆ ಹೊರಟಿವೆ
ಮತ್ತೆ ಸಿಗುವೆ