ಒಡಲಾಗ್ನಿಯ ನುಡಿ

ಮೈ ಮೇಲೆ ಬಟ್ಟೆಯಿರುವಾಗಲೇ
ಬೆತ್ತಲಾಗಿಸಿ ಅಳೆದು ತೂಗುವ ಕಣ್ಣುಗಳೇ
ಬಿಚ್ಚಿಸಿ ಆಸ್ವಾದಿಸುವ ಆತುರವೇಕೆ
ಸಾಕಾಗಲಿಲ್ಲವೇ ಅಂಕು ಡೊಂಕಿನ
ಮಾಟದ ದೇಹದ ಉಬ್ಬುತಗ್ಗಿನ ನೋಟ?

ಬಟ್ಟೆ ಬಿಚ್ಚಲು ಹಿಂಸಿಸುವ ಮುನ್ನ
ನೆನಪಾಗಲಿಲ್ಲವೇ ಅಂತಹುದ್ದೇ ದೇಹವೊಂದು
ತನ್ನೊಡಲಲ್ಲಿ ತನ್ನದೇ ರಕ್ತ ಕೊಟ್ಟು
ತಾನು ಬಯಸಿ ಬಗೆದೆ ಅಂಗದಿಂದಲೇ
ಈ ಭೂಮಿಗೆ ತಂದಿದ್ದೆಂದು?

ತನ್ನನ್ನು ಹೆತ್ತ ದೇಹವನ್ನು
ಮರೆಯಿಲ್ಲದೆ ಮೆರವಣಿಗೆ ಮಾಡುವಾಗ
ಎದೆ ಹಾಲಿನ ಜೀವಾಮೃತ ನೀಡಿದ ಅವ್ವ,
ಜೊತೆಯಲ್ಲಿ ಆಡಿ ಬೆಳೆದ ಅಕ್ಕ ತಂಗಿಯರು
ಎದೆಯೊಳಗೆ ಪ್ರೀತಿಯ ಮೊಳಗಿಸಿದ ಹುಡುಗಿ
ಮೊಗೆಮೊಗೆದು ಸುಖ ನೀಡಿದ ಹೆಂಡತಿ
ತನ್ನದೇ ರಕ್ತಹಂಚಿಕೊಂಡ ಮಗಳು
ಯಾರೆಂದರೆ ಯಾರೂ ಕಣ್ಣೆದುರು ಸುಳಿಯಲಿಲ್ಲವೆ
ಮೃಗದ ಅಟ್ಟಹಾಸಗೈದು ಮೆರೆಯುವಾಗ

ಇದು ಶತಶತಮಾನದ ದುರಂತ ಶಾಪ
ಸೀರೆ ಸೆಳೆಯುವುದನ್ನೇ ಧರ್ಮಗ್ರಂಥವನ್ನಾಗಿಸಿ
ಕನ್ನೆ ತಟ್ಟಿಕೊಂಡು ಶಾಂತಂಪಾಪಂ ಹೇಳಿಕೊಂಡು
ಮಾಯಾವಿ ಸೀರೆಗೆ ಬೆರಗುಗೊಂಡವರು ನಾವು
ಅಪಾಯವನ್ನರಿತೂ ಮೂರು ಗೆರೆ ಎಳೆದು
ಕದ್ದೊಯ್ಯುವ ವಿಮಾನವನ್ನೇ ವೈಭವಿಕರಿಸಿ
ಅವಳ ನೋವನ್ನು ನಿರುಮ್ಮಳವಾಗಿ ಕಡೆಗಣಿಸಿ
ಅಳಿಲಿನ ಬೆನ್ನ ಮೇಲಿನ ಮೂರು ಗೆರೆಗಳಿಗೆ
ದೀರ್ಘದಂಡ ನಮಸ್ಕಾರ ಹಾಕಿ
ಪಾಪ ತೊಳೆದು ಹೋಗಿದೆಯೆಂದು
ಕೇಕೆ ಹಾಕಿ ಕುಪ್ಪಳಿಸಿದವರಿಂದ
ಮತ್ಯಾವ ನಿರೀಕ್ಷೆ ಇಟ್ಟುಕೊಳ್ಳಲು ಸಾಧ್ಯ ಹೇಳು

ಕುಸಿದು ಹೋಗಿದ್ದೇವೆ
ದೇಹ, ಮನಸ್ಸು ಭಾವನೆಗಳ ಮೇಲೆ
ಸಾವಿರಾರು ವರ್ಷಗಳಿಂದ ನಡೆಯುತ್ತಿರುವ
ಅವ್ಯಾಹತ ದಾಳಿ, ಶೋಷಣೆಗಳಿಂದ
ಸಾಕಿನ್ನು, ನೆಲಕ್ಕೆ ಬಿದ್ದ ಹನಿ ಹನಿ ರಕ್ತವೂ
ಬೀಜಾಸುರವಾಗಿ ಆಹುತಿ ಪಡೆಯುವ
ಮಹಾ ಸಂಧಿ ಕಾಲಕ್ಕೆ ಮುನ್ನುಡಿ ಬರೆಯಬೇಕಿದೆ

- ಶ್ರೀದೇವಿ ಕೆರೆಮನೆ