ಕನ್ನಡ ಮತ್ತು ತೆಲುಗು ಸಹಸಂಬಂದ

Date: 14-07-2024

Location: ಬೆಂಗಳೂರು

"ಕನ್ನಡ ಮತ್ತು ತೆಲುಗು ಬಾಶೆಗಳ ನಡುವೆ ಕಂಡುಬರುವ ಸಮಾನತೆಗಳನ್ನು ತುಸು ಬಿನ್ನವಾಗಿ ನೋಡಬೇಕು. ಕನ್ನಡ ಬಾಶೆ ಬಹು ಉದ್ದನೆಯ ಗಡಿಯನ್ನು ತೆಲುಗಿನೊಂದಿಗೆ ಹಂಚಿಕೊಂಡಿದೆ. ಬಹುತೇಕ ನೀಲಗಿರಿಯಿಂದ ಮರಾಟವಾಡದವರೆಗೆ ಕನ್ನಡ ತೆಲುಗಿನ ಗಡಿಯನ್ನು ಹಂಚಿಕೊಂಡಿದೆ," ಎನ್ನುತ್ತಾರೆ ಅಂಕಣಕಾರ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಕನ್ನಡ ಮತ್ತು ತೆಲುಗು ಸಹಸಂಬಂದ’ ಕುರಿತು ಬರೆದಿರುವ ಲೇಖನ.

ಸಾಮಾನ್ಯವಾಗಿ ಕನ್ನಡ ಬಾಶೆಯ ಸಂಬಂದ, ಸಂಪರ‍್ಕ ಎಂದಾಗ ಈ ಹಿಂದೆ ಈ ಅಂಕಣದಲ್ಲಿ ಮಾತಾಡಿದ ಪ್ರಮುಕವಾದ ಬಾಶೆಗಳ ಸಂಬಂದದ ಕುರಿತು ಮಾತನಾಡುವುದು ಹೆಚ್ಚು ಕಾಣಿಸುತ್ತದೆ. ಅವುಗಳೆಂದರೆ, ಪ್ರಾಕ್ರುತ-ಸಂಸ್ಕೃತ, ಅರಾಬಿಕ್-ಪರ‍್ಶಿಯನ್ ಮತ್ತು ಇಂಗ್ಲೀಶು. ಅದು ನಿಜ. ಈ ಮೂರು ಬಾಶೆಗಳು ಕನ್ನಡದ ಮೇಲೆ ಬೀರಿದ ಪ್ರಬಾವ ವ್ಯಾಪಕವೂ ಆಳವೂ ಆದುದು. ಅದೆ ವೇಳೆಗೆ ಆ ಬಾಶೆಗಳೂ ಕನ್ನಡದ ಸಹಜೀವನದಲ್ಲಿ ಸಾಕಶ್ಟು ಬದಲಾವಣೆಗೂ ಒಳಗಾಗಿವೆ. ಇದರ ಜೊತೆಗೆ ಕನ್ನಡವು ಇನ್ನೂ ಹಲವು ಬಾಶೆಗಳ ಜೊತೆಗೆ ಕಾಲಾಂತರದಿಂದ ಕೂಡು ಬಾಳುವೆ ನಡೆಸಿಕೊಂಡು ಬಂದಿದೆ. ಈ ಇತರ ಬಾಶೆಗಳ ಜೊತೆಗಿನ ಕೂಡುಬಾಳುವೆಯ ಕುರಿತು ಇನ್ನು ಮಾತನಾಡಬಹುದು.

ಕನ್ನಡ ಮತ್ತು ತಮಿಳುಗಳಿಗಿಂತ ತುಸು ದೂರದ ಸಂಬಂದವನ್ನು ಕನ್ನಡ ಮತ್ತು ತೆಲುಗು ಹೊಂದಿವೆ. ತೆಲುಗು ಪ್ರತ್ಯೇಕವಾದ ಸಮಯದಲ್ಲಿ ಬಹುಶಾ ಕನ್ನಡ-ತಮಿಳು ಇವು ಇನ್ನೂ ಅಶ್ಟು ಪ್ರತ್ಯೇಕವಾಗಿರಲಿಕ್ಕಿಲ್ಲ. ಕನ್ನಡ ಮತ್ತು ತೆಲುಗುಗಳ ನಡುವಿನ ಹಲವಾರು ಸಮಾನ ಅಂಶಗಳು ಮೂಲದಿಂದ ಬಂದಿರಬಹುದೆಂಬ ಅನುಮಾನ ಇಟ್ಟುಕೊಳ್ಳಬಹುದಾದರೂ ಕನ್ನಡ ಮತ್ತು ತಮಿಳುಗಳ ನಡುವೆ ಇರುವಶ್ಟು ಸಾದ್ಯತೆಗಳು ಇರುವುದಿಲ್ಲ. ಹಾಗಾಗಿ, ಕನ್ನಡ ಮತ್ತು ತೆಲುಗು ಬಾಶೆಗಳ ನಡುವೆ ಕಂಡುಬರುವ ಸಮಾನತೆಗಳನ್ನು ತುಸು ಬಿನ್ನವಾಗಿ ನೋಡಬೇಕು. ಕನ್ನಡ ಬಾಶೆ ಬಹು ಉದ್ದನೆಯ ಗಡಿಯನ್ನು ತೆಲುಗಿನೊಂದಿಗೆ ಹಂಚಿಕೊಂಡಿದೆ. ಬಹುತೇಕ ನೀಲಗಿರಿಯಿಂದ ಮರಾಟವಾಡದವರೆಗೆ ಕನ್ನಡ ತೆಲುಗಿನ ಗಡಿಯನ್ನು ಹಂಚಿಕೊಂಡಿದೆ. ಕನ್ನಡ ಮತ್ತು ತಮಿಳುಗಳ ನಡುವೆ ಪರಸ್ಪರ ಹತ್ತಿರದಲ್ಲಿ ಇರುವ ಒಳನುಡಿಗಳು ತೋರುವ ಒಂದುತನ ಕನ್ನಡ ಮತ್ತು ತೆಲುಗು ಬಾಶೆಗಳ ನಡುವೆ ಈ ರೀತಿಯಲ್ಲಿ ಇಲ್ಲ. ಅಂದರೆ ಮರಾಟವಾಡದಲ್ಲಿ ಕನ್ನಡ ಮತ್ತು ತೆಲುಗುಗಳು ತೋರಿಸುವ ಸಮಾನ ಅಂಶಗಳು ಮತ್ತು ನೀಲಗಿರಿಯಲ್ಲಿ ಕನ್ನಡ ಮತ್ತು ತೆಲುಗುಗಳು ತೋರಿಸುವ ಅಂಶಗಳು ಬಿನ್ನವಾಗಿವೆ. ಅಲ್ಲದೆ, ಕೋಲಾರ-ಚಿತ್ತೂರಿನಲ್ಲಿ, ತುಮಕೂರು-ಬಳ್ಳಾರಿ-ಅನಂತಪುರದಲ್ಲಿ, ಬೀದರ-ಮೆಹಬೂಬನಗರದಲ್ಲಿ ಬಿನ್ನವಾಗಿದೆ. ಯಾದಗಿರಿ ಪರಿಸರದಲ್ಲಿ ಬಳಕೆಯಲ್ಲಿರುವ ಬಾಶೆ ಕನ್ನಡವೊ ತೆಲುಗೊ ಎಂಬ ಅನುಮಾನಗಳೂ ಬರುವಶ್ಟು ಮಟ್ಟಿಗೆ ಅವೆರಡೂ ಬೆರೆತುಹೋಗಿವೆ. ಈ ಬೆಳವಣಿಗೆ ಸ್ಪಶ್ಟವಾಗಿ ಮೂಲದಿಂದ ಬಂದ ಸಮಾನ ಲಕ್ಶಣಗಳ ಕಾರಣದಿಂದ ಅಲ್ಲ. ಬದಲಿಗೆ, ಕನ್ನಡ ಮತ್ತು ತೆಲುಗು ಬಾಶೆಗಳು ಮೂಲದಿಂದ ಬೇರೆಯಾಗಿ ಬೆಳೆದು ಆನಂತರ ಪರಸ್ಪರ ಸಂರ‍್ಕದಲ್ಲಿ ಪರಸ್ಪರ ಪ್ರಬಾವಕ್ಕೆ ಒಳಗಾಗಿ ಬೆಳೆಸಿಕೊಂಡ ಲಕ್ಶಣಗಳಾಗಿವೆ. ಆದರೆ ಪರಸ್ಪರ ಒಂದು ಪ್ರದೇಶದಲ್ಲಿ ಬಳಕೆಯಲ್ಲಿರುವ ಕನ್ನಡ ಮತ್ತು ತಮಿಳು ಬಾಶೆಗಳ ಒಳನುಡಿಗಳಲ್ಲಿ ಕಂಡುಬರುವ ಸಮಾನ ಲಕ್ಶಣಗಳನ್ನು ಹೀಗೆ ಕನ್ನಡ-ತೆಲುಗು ಒಳನುಡಿಗಳ ನಡುವೆ ಮಾತಾಡುವಶ್ಟು ಸುಲಬವಾಗಿ ಮಾತನಾಡಲು ಆಗದು. ಅವುಗಳಲ್ಲಿ ಮೂಲದಿಂದ ಬೆಳೆಸಿಕೊಂಡ-ಉಳಿಸಿಕೊಂಡ ಸಮಾನ ಅಂಶಗಳೂ ಇವೆ, ಆನಂತರ ಪರಸ್ಪರ ಪ್ರಬಾವಕ್ಕೆ ಒಳಗಾಗಿರುವ ಅಂಶಗಳೂ ಇವೆ. ಕನ್ನಡ-ತೆಲುಗುಗಳ ನಡುವೆ ಈ ಬಗೆಯ ಸಂಬಂದ ಇರದೆ ಇರುವುದಕ್ಕೆ ಕಾರಣ ಕನ್ನಡ ಮತ್ತು ತೆಲುಗು ಬಾಶೆಗಳ ನಡುವಿನ ಸಂಬಂದ ಬಹು ದೂರದ್ದಾಗಿರುವುದೆ ಮುಕ್ಯ ಕಾರಣ.

ಯಾದಗಿರಿ ಪರಿಸರದಲ್ಲಿ ಬಳಕೆಯಲ್ಲಿರುವ ಕನ್ನಡದಿಂದ ಒಂದು ಉದಾಹರಣೆಯನ್ನು ಇಲ್ಲಿ ಮಾತಿಗೆ ತೆಗೆದುಕೊಳ್ಳಬಹುದು. ಬಸ್ಟಾಂಡ್ಲು ಬಸ್ಸುಗೊಳು ಬಾಳ ಅದಾವ. ಇಂತಾ ವಾಕ್ಯಗಳು ಯಾದಗಿರಿಯ ಸುತ್ತಮುತ್ತ ಪರಿಸರದಲ್ಲಿ ಅತ್ಯಂತ ಸಹಜ. ಇದು ಕನ್ನಡವೊ, ತೆಲುಗೊ ತಿಳಿಯುವುದು ಕಶ್ಟವೆ. ಯಾಕೆಂದರೆ ಇಲ್ಲಿ ಕನ್ನಡ ಮತ್ತು ತೆಲುಗಿನ ಪದಗಳು ಪರಸ್ಪರ ಬೆರೆಯುವುದಕ್ಕಿಂತ ಬದಲಾಗಿ ಕನ್ನಡ ಮತ್ತು ತೆಲುಗುಗಳ ವ್ಯಾಕರಣಗಳ ಪರಸ್ಪರ ಬೆರೆಯುವಿಕೆ ಕಾಣಿಸುತ್ತದೆ. ನೆಲೆಯನ್ನು ಹೇಳುವ ಸಪ್ತಮಿ ರೂಪ -ಲು ಇದು ತೆಲುಗಿನಲ್ಲಿ ಸಹಜವಾಗಿ ಬಳಕೆಯಾಗುವ ರೂಪ. ಅದರಂತೆ ಬಸ್ಸುಗೊಳು ಎನ್ನುವಲ್ಲಿ ಇರುವ ಬಹುವಚನ ರೂಪ ಸಹಜವಾಗಿ ಕನ್ನಡದಲ್ಲಿ ಬಳಕೆಯಲ್ಲಿ ಇಲ್ಲ. ಅಂದರೆ, ಮನುಶ್ಯ ಅಲ್ಲದ ಸಂರ‍್ಬದಲ್ಲಿ ಕನ್ನಡದಲ್ಲಿ ಸಾಮಾನ್ಯವಾಗಿ ಬಹುವಚನ ರೂಪವನ್ನು ಬಳಸುವುದಿಲ್ಲ. ಆದರೆ ಇಲ್ಲಿ ಕೊಟ್ಟಿರುವ ವಾಕ್ಯದಲ್ಲಿ ಈ ಬಹುವಚನ ರೂಪ ಬಳಕೆಯಾಗಿದೆ. ಇದು ಸ್ಪಶ್ಟವಾಗಿ ಮೂಲದಿಂದ ಬೆಳೆದು ಬಂದ ಲಕ್ಶಣಗಳಾಗಿರದೆ ಕನ್ನಡ ಮತ್ತು ತೆಲುಗುಗಳು ಬೇರೆಯಾಗಿ ಬೆಳೆಸಿಕೊಂಡ ಲಕ್ಶಣಗಳನ್ನು ಮತ್ತೆ ಪರಸ್ಪರ ಪ್ರಬಾವದಿಂದ ಹಂಚಿಕೊಂಡ ಕತೆಯಾಗಿದೆ. ಇಲ್ಲಿ ಒಂದು ವಿಶಯವನ್ನು ಹೇಳಬೇಕು. ಜಗತ್ತಿನಲ್ಲಿಯೆ ಬಾಶಾಸಂಪರ‍್ಕದ ಅದ್ಯಯನದ ಬಹು ಕುತೂಹಲದ ಉದಾಹರಣೆಗಳನ್ನು ಈ ಪರಿಸರ ಕೊಡುತ್ತದೆ.

ಈ ಮೂಲಕ ಕನ್ನಡ ಮತ್ತು ತೆಲುಗು ಬಾಶೆಗಳು ಹೇಗೆ ಪರಸ್ಪರ ಪ್ರಬಾವದಲ್ಲಿ ಬದುಕಿವೆ ಎಂಬುದನ್ನು ತಿಳಿದುಕೊಳ್ಳುವುದಕ್ಕೆ ಸಾದ್ಯವಾಗುತ್ತದೆ. ಇದರ ಜೊತೆಗೆ ಕನ್ನಡ ಮತ್ತು ತೆಲುಗಿನ ಗಡಿಯಗುಂಟ ಪರಸ್ಪರ ಬಾಶೆಗಳ ಒಳನುಡಿಗಳು ಹೀಗೆಯೆ ಸಹಸಂಬಂದದಲ್ಲಿ ಬದುಕಿವೆ. ಸಾಕಶ್ಟುಮಟ್ಟಿಗೆ ಪದಕೋಶವನ್ನೂ ಇವು ಹಂಚಿಕೊಳ್ಳುತ್ತವೆ. ಕರ‍್ನಾಟಕ ಬಾಶಿಕ ಪರಿಸರದ ಸಂದರ‍್ಬದಲ್ಲಿ ಹಯ್ದರಾಬಾದ ಕರ‍್ನಾಟಕ ಪರಿಸರ ಸಣ್ಣ ಬಾಶಿಕ ಕ್ಶೇತ್ರದಂತೆ ಇದೆ. ಅಂದರೆ, ಬಿನ್ನ ಬಾಶಾಮನೆತನಗಳಿಗೆ ಸಂಬಂದಿಸಿದ ಬಾಶೆಗಳು ಒಂದೆಡೆ ಪರಸ್ಪರ ಪ್ರಬಾವಿಸುತ್ತ ಒಂದಾಗಿ ಬದುಕಿರುವ ಪರಿಸರ. ಇಲ್ಲಿ ಕನ್ನಡ-ತೆಲುಗು-ಮರಾಟಿ-ರ‍್ದು ಬಾಶೆಗಳು ಇವುಗಳ ಜೊತೆಗೆ ಇನ್ನೂ ಹಲವು ಬಾಶೆಗಳು ಪರಸ್ಪರ ಕೂಡಿ ಬದುಕಿವೆ. ಇಲ್ಲಿ ಒಂದು ಕುತೂಹಲದ ಅಂಶವನ್ನು ಹೇಳಬೇಕು. ಅದು ಕನ್ನಡ ಮತ್ತು ತೆಲುಗಿನ ಸಂಬಂದಕ್ಕೆ ಸಂಬಂದಿಸಿರುವಂತದ್ದು. ಹಯ್ದರಾಬಾದ ಕರ‍್ನಾಟಕ ಪರಿಸರದಲ್ಲಿ ಕನ್ನಡ ಮತ್ತು ತೆಲುಗು ಇಲ್ಲಿರುವ ಮರಾಟಿ ಮತ್ತು ಉರ‍್ದು ಕೂಡ ಸಮಾನ ತಾನದಲ್ಲಿ ನಡೆಯುತ್ತವೆ. ಈ ಬಗೆಯ ಸಮಾನ ಲಕ್ಶಣಗಳನ್ನು ಕನ್ನಡ ಮತ್ತು ತೆಲುಗು ಹಂಚಿಕೊಳ್ಳುವುದು ಬಹಳ ಅಪರೂಪ.

ಇನ್ನು ಇಂದಿನ ಕರ‍್ನಾಟಕ ಪರಿಸರದಲ್ಲಿ ಬಳಕೆಯಲ್ಲಿರುವ ಹಲವಾರು ತೆಲುಗಿನ ಒಳನುಡಿಗಳು ಇಲ್ಲವೆ ತೆಲುಗು ಬಾಶಾಬಗೆಗಳು ಕನ್ನಡ ಮತ್ತು ತೆಲುಗು ಬಾಶೆಗಳ ಸಂಬಂದವನ್ನು ಬೆಸೆಯುವ ಕೆಲಸವನ್ನು ಮಾಡುತ್ತಿವೆ. ಇವುಗಳಲ್ಲಿ ದೊಡ್ಡ ಸಂಕೆಯಲ್ಲಿ ಇರುವ ವಡರಿ, ಹಾಗೆಯೆ ಚೆಂಚು, ದಾಸರಿ ಮೊದಲಾಗಿ ಇನ್ನೂ ಹಲವು ಒಳನುಡಿಗಳನ್ನು ಇಲ್ಲಿ ಗಮನಿಸಬಹುದು. ಅದರಂತೆಯೆ ಇಂದಿನ ತೆಲಂಗಾಣ ಮತ್ತು ಆಂದ್ರಪ್ರದೇಶಗಳಲ್ಲಿ ಬಳಕೆಯಲ್ಲಿರುವ ವಿವಿದ ಕನ್ನಡದ ಒಳನುಡಿಗಳು, ಬಾಶಾಬಗೆಗಳು ಕೂಡ ಹೀಗೆಯೆ ಇವೆ. ಅನಂತಪುರ, ಹಿಂದೂಪುರ, ಮಂತ್ರಾಲಯ, ಮೆಹಬೂಬ್ ನಗರ ಮೊದಲಾದ ಪರಿಸರಗಳಲ್ಲಿ ಬಳಕೆಯಲ್ಲಿರುವ ಕನ್ನಡ ಬಾಶಾಬಗೆಗಳನ್ನೂ ಇಲ್ಲಿ ಹೆಸರಿಬಹುದು.