ವಿಶ್ವೇಶ್ವರಿ

‘ವಿಶ್ವೇಶ್ವರಿ’ ಇದು ಡಾ. ವಾಸಯ್ಯ ಎನ್‌ ಅವರ ಕೃತಿಯಾಗಿದ್ದು, ಕನ್ನಡ ಸಾಹಿತ್ಯವನ್ನು ಅನ್ಯಾನ್ಯ ನೆಲೆಗಳಲ್ಲಿ ಸಮೃದ್ಧಗೊಳಿಸಿದ ಜನಪ್ರಿಯ ಲೇಖಕರಲ್ಲಿ ಡಾ.ಸುಧಾಮೂರ್ತಿ ಅವರದು ಎದ್ದುಕಾಣುವ ಹೆಸರು. ಅವರದು ಬಹುಮುಖ ಪ್ರತಿಭೆ ಹಾಗೂ ನಾನಾ ಮುಖಗಳ ವ್ಯಕ್ತಿತ್ವ, ಸೃಜನಶೀಲ, ಚಿಂತನಶೀಲ, ಸಾಹಸಶೀಲ, ಉದ್ಯಮಶೀಲ, ವಿನಯಶೀಲ ವ್ಯಕ್ತಿತ್ವವನ್ನು ಮೈಗೂಡಿಸಿಕೊಂಡ ಅವರು ದೇಶ ವಿದೇಶಗಳಲ್ಲಿ ಸೈ ಎನಿಸಿಕೊಂಡ ಅಪರೂಪದ ಸಾಧಕರು. ಸುಧಾಮೂರ್ತಿ ಅವರು ನಮ್ಮ ನಾಡಿನ ಅಭಿಮಾನದ ಮೂರ್ತಿ. ದೇಶಕ್ಕೆ, ಜಗತ್ತಿಗೆ ಅವರು ಅಲಂಕಾರ ಪ್ರಾಯರು ಎಂದರೆ ಅತ್ಯುಕ್ತಿಯಾಗದು. ಅವರ ಬದುಕು ಸಾಹಸ ಸಾಧನೆ, ಯಶೋಗಾಥೆ ಅವರ ಕೃತಿಗಳಂತೆ ರೋಮಾಂಚನಕಾರಿಯಾಗಿವೆ. ಅವರು ವೈವಿಧ್ಯಮಯವಾದ, ಅಪಾರವಾದ ಅನುಭವಗಳ ಗಣಿಯೇ ಆಗಿದ್ದಾರೆ. ಅವರದು ಬಂಡಾಯ ಪ್ರವೃತ್ತಿ; ಪ್ರಗತಿಶೀಲ ನಿಲುವು. ಅವರು ದಿಟ್ಟತನದಿಂದ, ಎದೆಗಾರಿಕೆಯಿಂದ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಬಳಸಿಕೊಂಡು ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಸಮದಂಡಿಯಾಗಿ ಸಾಹಿತ್ಯ ಕೃಷಿಯನ್ನು ಮಾಡುತ್ತಾ ಬಂದಿದ್ದಾರೆ. ಟಾಟಾ (ಟೆಲ್ಲೊ) ಕಂಪೆನಿಯಲ್ಲಿ ಲಿಂಗ ತಾರತಮ್ಯದ ನಿಲುವನ್ನು ಪ್ರಶ್ನಿಸಿ ಪತ್ರ ಬರೆದು ವಿಶೇಷ ಸಂದರ್ಶನದ ಮೂಲಕ ಅಲ್ಲಿ ನೇಮಕಗೊಂಡ ಮೊದಲ ಮಹಿಳಾ ಇಂಜಿನಿಯರ್ ಎಂಬ ಖ್ಯಾತಿಗೂ ಅವರು ಪಾತ್ರರಾಗಿದ್ದಾರೆ. ಇದು ಪುರುಷರಿಗೆ ಮಾತ್ರ ಸಾಧ್ಯವಾಗುವ ಕೆಲಸ ಎಂಬ ಮನೋಭಾವನೆಯನ್ನು, ಅಪಪ್ರಥೆಗಳನ್ನು ಬದಲಾಯಿಸಿ ಮಹಿಳೆ ಎಲ್ಲ ರಂಗಗಳಲ್ಲೂ ಕೆಲಸ ಮಾಡಬಲ್ಲಳು. ಅವಳಲ್ಲಿ ಅಗಾಧವಾದ ಶಕ್ತಿ ಸಾಮರ್ಥ್ಯಗಳಿವೆ ಎಂಬುದನ್ನು ಅವರು ತಮ್ಮ ಬದುಕಿನಲ್ಲಿ, ಬರವಣಿಗೆಯಲ್ಲಿ ತೋರಿಸಿಕೊಡುತ್ತಾ ಬಂದಿದ್ದಾರೆ. ಅವರದು ನಿಜವಾಗಿಯೂ ಕ್ರಾಂತಿಕಾರಿ ಮನೋಧರ್ಮ. ಬದುಕಿನ ಸಮಸ್ಯೆಗಳನ್ನು ಸವಾಲಾಗಿ ಸ್ವೀಕರಿಸಿ ಯಶಸ್ಸು ಕಂಡ ಸಾಹಸಿಯೂ ಆಗಿದ್ದಾರೆ. ಅಂತೆಯೇ ಡಾ.ವಾಸಯ್ಯ ಎನ್. ಅವರು ಸಮಕಾಲೀನ ಸಂವೇದನೆಗಳು ಮತ್ತು ಸುಧಾಮೂರ್ತಿ ಅವರ ಸಾಹಿತ್ಯವನ್ನು ಕುರಿತು ವಿಚಾರ ಸಂಕಿರಣವನ್ನು ಅಯೋಜಿಸಿ ಸುಧಾ ಮೂರ್ತಿ ಅವರ ವ್ಯಕ್ತಿತ್ವ ಮತ್ತು ಸಾಹಿತ್ಯದ ಕುರಿತ ವಿಷಯಗಳನ್ನೊಳಗೊಂಡ ಪುಸ್ತಕ ಇದಾಗಿದೆ.