ಕ್ಯಾಂಪಸ್ ಕಥನಗಳು – ಹಲ್ಲೆಗಳನ್ನು ಮೆಟ್ಟಿನಿಂತ ಪ್ರತಿರೋಧಗಳು

ಜನ ನ್ಯಾಯಮಂಡಳಿಯ ಮುಂದೆ ವಿದ್ಯಾರ್ಥಿಗಳು, ಉಪನ್ಯಾಸಕರು ಮತ್ತು ತಜ್ಞರು ಮಂಡಿಸಿದ ಹೇಳಿಕೆಗಳು, ಖಾಸಗೀಕರಣ ಮತ್ತು ಜಾಗತೀಕರಣವು ನಮ್ಮ ಶಿಕ್ಷಣ, ಶಿಕ್ಷಣ ಸಂಸ್ಥೆಗಳು ಹಾಗೂ ಅವುಗಳ ಘಟಕಗಳ ಮೇಲೆ ಉಂಟು ಮಾಡಿರುವ ದುಷ್ಪರಿಣಾಮದ ಅಗಾಧತೆಗೆ ಸಾಕ್ಷಿಯಾಗಿದ್ದವು. ಶಿಕ್ಷಣ ಶುಲ್ಕದ ಏರಿಕೆ, ಹಣಕಾಸು ನೆರವಿನ ಹಿಂತೆಗೆತ, ವಿದ್ಯಾರ್ಥಿವೇತನ ಕಡಿತ, ಪ್ರವೇಶ ಪ್ರಕ್ರಿಯೆಯ ಕೇಂದ್ರೀಕರಣ, ಸಂಸ್ಥೆಗೆ ಲಾಭದಾಯಕವಾಗಿಲ್ಲದ ಕೋರ್ಸುಗಳ ನಿಲುಗಡೆ ಮೊದಲಾದ ರೂಪದಲ್ಲಿ ಖಾಸಗೀಕರಣವು ಉನ್ನತ ಶಿಕ್ಷಣದ ಮೇಲೆ ನಡೆಸಿರುವ ದಾಳಿಯನ್ನು ವಿರೋಧಿಸಿ ವಿದ್ಯಾರ್ಥಿ-ಉಪನ್ಯಾಸಕರ ಸಮುದಾಯವು ನಡೆಸಿದ ಧೀರ ಹೋರಾಟಗಳನ್ನು ಹಾಗೂ ಹೋರಾಟದ ಮೂಲಕ ಸರ್ಕಾರದ ಈ ನೀತಿ-ನಿಯಮಗಳನ್ನು ವಿರೋಧಿಸಿದ್ದಕ್ಕಾಗಿ ಅವರು ಎದುರಿಸಿದ ಪ್ರತೀಕಾರ ಕ್ರಮಗಳನ್ನೂ ಈ ಸಾಕ್ಷ್ಯಗಳು ತೆರೆದಿಟ್ಟವು.

ಖಾಸಗೀಕರಣ ವಿರುದ್ಧದ ಹೋರಾಟದಲ್ಲಿ ಮುಂಚೂಣಿಯಲ್ಲಿ ಇರುವ ಈ ವಿದ್ಯಾರ್ಥಿ-ಉಪನ್ಯಾಸಕರ ಸಮುದಾಯವು, ಭಾರತದಲ್ಲಿ ಶಿಕ್ಷಣದ ಹಕ್ಕಿನ ಮೇಲೆ ಮತ್ತು ಸಾರ್ವಜನಿಕ ಶಿಕ್ಷಣ ವ್ಯವಸ್ಥೆಯನ್ನು ದುರ್ಬಲಗೊಳಿಸಲು ಸರ್ಕಾರವೇ ನಡೆಸುತ್ತಿರುವ ದಾಳಿಯನ್ನು ತಡೆಯುವ ಏಕೈಕ ಶಕ್ತಿಯಾಗಿಯೂ ಹೊರಹೊಮ್ಮಿರುವುದು ಈ ವಿಚಾರಣೆಯ ಸಂದರ್ಭದಲ್ಲಿ ನಿಚ್ಚಳವಾಯಿತು. … ನ್ಯಾಯಮಂಡಳಿಯ ಮುಂದೆ ಮಂಡಿಸಲಾದ ಸಾಕ್ಷ್ಯಗಳಿಂದ ಸ್ಪಷ್ಟವಾಗಿ ಮೂಡಿಬಂದ ಮತ್ತೊಂದು ಆತಂಕಕಾರಿ ವಿದ್ಯಮಾನವೆಂದರೆ, ಕ್ಯಾಂಪಸ್‌ಗಳಲ್ಲಿ ಹೆಚ್ಚುತ್ತಿರುವ ಕೋಮುವಾದ, ಪಠ್ಯಪುಸ್ತಕಗಳಲ್ಲಿ ಇತಿಹಾಸದ ತಿರುಚುವಿಕೆ, ಜಾತ್ಯತೀತ ಸತ್ಯಗಳನ್ನು ಕಿತ್ತುಹಾಕುವುದು ಮತ್ತು ಬಲಪಂಥೀಯ ಸರ್ಕಾರವು ತನ್ನ ಅಜೆಂಡಾವನ್ನು ಜಾರಿಗೊಳಿಸುವ ಸಲುವಾಗಿ ಶಿಕ್ಷಣ ಸಂಸ್ಥೆಗಳನ್ನು ಅತಿಕ್ರಮಿಸುತ್ತಿರುವುದರಿಂದ ವಿಶ್ವವಿದ್ಯಾಲಯಗಳ ಸ್ವಾಯತ್ತತೆಗೆ ಧಕ್ಕೆ ಉಂಟಾಗಿರುವುದು. ಸಮಾಜದಲ್ಲಿ ಅಸ್ತಿತ್ವದಲ್ಲಿರುವ ಹೊರದೂಡುವಿಕೆ, ಪ್ರತ್ಯೇಕತೆ, ಕಡೆಗಣಿಸುವಿಕೆ, ನಿರ್ಲಕ್ಷ್ಯದ ನಡೆಗಳನ್ನು ಉನ್ನತ ಶಿಕ್ಷಣ ಸಂಸ್ಥೆಗಳಲ್ಲೂ ಜಾರಿಗೆ ತರುವ ಸಲುವಾಗಿ ಅನುಸರಿಸುತ್ತಿರುವ ಅನ್ಯಾಯದ ಕ್ರಮಗಳನ್ನು ವಿದ್ಯಾರ್ಥಿಗಳು ಮತ್ತು ಉಪನ್ಯಾಸಕರು ಸಲ್ಲಿಸಿದ ಸಾಕ್ಷ್ಯಗಳು ಬಹಿರಂಗಪಡಿಸಿದವು.