ಬೆಟ್ಟದಡಿಯ ಬಿದಿರ ಹೂ

ಕೃತಿಯ ಲೇಖಕಿಯಾದ ಆರತಿಯವರು ತ್ರಿಪುರ ರಾಜ್ಯದಲ್ಲಿ ಕೈಗೊಂಡಂತಹ ಪ್ರವಾಸದ ಕಥಾನಕ ಪುಸ್ತಕ. ತ್ರಿಪುರವೆಂಬುದು ಭಾರತದ ಈಶಾನ್ಯ ತುದಿಯಲ್ಲಿರುವಂತಹ ಒಂದು ಪುಟ್ಟ ರಾಜ್ಯ. ಪರ್ವತಗಳಿಂದ ಆವೃತಗೊಂಡಿರುವ ಈ ರಾಜ್ಯದ ಸೊಬಗನ್ನು ವರ್ಣಿಸುವುದು ಅಷ್ಟು ಸುಲಭದ ಮಾತಲ್ಲ. ಆದರೆ, ತಮ್ಮ ಪ್ರವಾಸದಲ್ಲಿ ತಾವು ನೋಡಿದ, ಕೇಳಿದ ಮತ್ತು ಅನುಭವಿಸಿದ ವಿವರಗಳನ್ನು ಕಣ್ಣಿಗೆ ಕಟ್ಟಿದ ರೀತಿಯಲ್ಲಿ ಈ ಪುಸ್ತಕದಲ್ಲಿ ಲೇಖಕರು ದಾಖಲಿಸಿದ್ದಾರೆ. ಪುಸ್ತಕದ ಮೂಲ ಉದ್ದೇಶದ ಜೊತೆ ಜೊತೆಗೆ ಉಪಕಥೆಗಳನ್ನು ಕೂಡ ಒಳಗೊಂಡಿರುವ ಈ ಪುಸ್ತಕವು ಓದುಗರಿಗೆ ತರಿಪುರ ದರ್ಶನ ಮಾಡಿಸುತ್ತದೆ. ಕೇವಲ ಅಲ್ಲಿನ ಪ್ರವಾಸಿ ಸ್ಥಾನಗಳ ಕುರಿತಷ್ಟೇ ಅಲ್ಲದೇ, ತಾವು ಅಲ್ಲಿ ಭೇಟಿಯಾದ ಸಾಹಿತಿಗಳು, ಕವಿಗಳು ಹೀಗೆ ಹಲವಾರು ವ್ಯಕ್ತಿಗಳ ಕುರಿತಾದ ವಿಷಯಗಳನ್ನು ಕೂಡ ದಾಖಲಿಸುತ್ತಾ ಹೋಗುತ್ತಾರೆ. ಪ್ರವಾಸಿ ಸ್ಥಳಗಳಲ್ಲಿ ಪ್ರವಾಸಿಗರು ಪಡುವ ಪಾಟಲು, ಭಾಷೆ ಅರಿಯದೇ ಇದ್ದಾಗ ಆಗುವಂತಹ ಪಜೀತಿಗಳ ಕುರಿತು ಬಹಳಷ್ಟು ಮಹತ್ತರವಾದ ವಿಷಯಗಳನ್ನು ಈ ಪುಸ್ತಕದಲ್ಲಿ ಲೇಖಕರು ತಿಳಿಸಿದ್ದಾರೆ. ಒಂಟಿ ಹೆಣ್ಣಿನ ಕುರಿತು ಸಮಾಜವಾಡುವ ಕುಹಕ ಮಾತುಗಳು, ಲೇಖಕರು ಅಂತಹ ಸಂಧರ್ಭಗಳನ್ನು ದಿಟ್ಟತನದಿಂದ ಎದುರಿಸಿದ ಬಗೆ ಹೀಗೆ ಎಲ್ಲ ಅನುಭವಗಳ ವಿವರಣೆ ಈ ಪುಸ್ತಕದಲ್ಲಿದೆ.